Ilassutitut tusarniaaqqinneq uuminnga: Takornariartitsinermut, sumiiffinni nunami aalajangersimasuni zone-nut agguaasarneq il.il. inuussutissarsiutigalugu ingerlatsinermi aammalu killeqartumik sumiiffiit ilaanni angalaarsinnaaneq pillugit Inatsisartut inatsisissaattut siunnersuut

Ippassaq nassiunneqartumi tusarniaanermi allakkiami ersippoq innersuussineq immikkoortumut § 9, imm. 1, nr. 6 aamma 7-imut tunngasoq. Tamatuma ilaanera kukkuneruvoq. Taakkua tassaapput suliap ingerlanneqarnerani siusinnerusumi isumaliutersuutit ilaasussaanngitsut. Siunnersuummi ilaanngillat § 9, imm. 1, nr. 6 imaluunniit 7. Taamaasilluni siunnersuut imaqanngilaq piumasaqaammik najugaqartuunissamik aamma akileraartartuunissamik ingerlatseqatigiiffimmi aqutsisunut imaluunniit ingerlatseqatigiiffiup sulisuinut.

Inatsimmi siunertaavoq Kalaallit Nunaannut takornariartitsisarnerup ineriartortinneqarnerata siuarsarneqarnissaa, kiisalu qularnaarniarneqarluni takornariartitsisarnerup ingerlanneqartarnissaa ilaatigut sillimaniarnermik, peqqissutsimik aamma avatangiisinik isiginiaalluni ingerlanneqartarnissaa, kiisalu aamma takornariartitsisartut inuiaqatigiit kalaallit ineriartortinneqarnerannut tunniussaqartarnissaat.

Siunnersuut periarfissaqartitsivoq Kalaallit Nunaanni takornariartitsisarnerup ineriartortinneqarneranik siuarsaasoqarnissaanik, killiliussat ersarinnerusut iluanni, periarfissaqartitsisunik ineriartortitsineq, ilutigisaanillu isiginiagassanik eqqaaneqartunik suliaqarneq. Inatsisikkut taamaattumik piumasaqaataalissaaq Kalaallit Nunaanni takornariartitsisarnermik ingerlatsinermut akuersissummik - licensimik peqartarnissaq. Kiisalu aamma siunnersuutigineqarpoq akuersissummik pigisaqartunut piumasaqaataassasoq maani najugaqartuuneq Kalaallit Nunaannullu tamakkiisumik akileraartartuuneq.

Ilutigisaanillu siunertaavoq inatsimmi pisinnaatitsisoqarnissaa nunap immikkoortuini sumiiffinni zone-nik taaneqartunik aaqqissuussisoqartarnissaanut malittarisassiortoqarnissaa. Zone-nik aaqqissuussinerit qularnaassavaat inuussutissarsiornikkut ingerlatsiviit allat ingerlatsisinnaanerat isiginiaalluni sumiiffiit qanoq atorneqarsinnaanerinik, sillimaniarnermik, peqqissusissamik, avatangiisinik aamma piujuaannartitsinermik.

Siunnersuut tamanut tusarniaassutigineqarpoq piffissami 24. april -5. juni 2024. Tusarniaanermi akissutit suliamut ilanngussorneqareerneranni maanna siunnersuut ilassutitut tusarniaassutigineqaqqippoq. Allannguutit pingaarnerit makkuupput:

• Allannguuteqarpoq § 2, imm. 1 -imi, erseqqissarumallugu siunnersuut takornariartitsinernik neqerooruteqartartunut makkunani sammisuusoq:
  1) ulluinnarluni angalaartarnerit unnuinertaqanngitsut, aamma
  2) angalaarnerit ullunik arlaqartunik sivisussusillit.
• Oqaasertaa assigiissaarilluni allanngortinneqarpoq “akuersissut” taarserneqarluni “licensimik”.
• Licensi piffissamut killiligaanngitsumut tunniunneqartarpoq.
• § 3, imm. 6-8 misiliineruvoq pissutsinik erseqqissaanertut, licenseqarnissamik pisariaqartitsiviunngitsut.
• Nassuiaatitut § 4 -amut oqaaseqaatini misilinneqarpoq itisilerniarlugu assersuutit arlaqartut atorlugit pisuni qanoq ittuni immikkut aalajangersakkamik sanioqqutsinissamik akuersisoqarsinnaanersoq. Itisilerineq suliaavoq erseqqissarumallugu immikkut akuersissuteqarneq ileqqunik tunngavilimmik atsikkutigiissaarinissamillu tunngavilimmik aammalu naligiissitaanermik tunngavilimmik tunniunneqartartoq.
• § 5, imm. 2 -mi, erseqqissarneqarpoq paasissutissanik tamanut saqqummiussisarneq taamaallaat kisitsisit paasissutissat siunnerfigalugit suliarineqartartoq.
• § 5, imm. 3 -mi, erseqqissagaavoq paasissutissanik avitsisarneq licensimik aaqqissuussinerup allanut suliassanngortinneqarsinnaaneranik pissuteqartoq.
• Aningaasaliissutissanut § 9 -mi piumasaqaat allanngortinneqarpoq imaalillugu “affaanit amerlanerusut”.
• § 9, imm. 1 nr. 6 aamma 7 -imi piumasaqaatinngortinneqarpoq ingerlatseqatigiiffimmi pisortaasut Kalaallit Nunaanni allaffeqassasut, tamakkiisumillu Kalaallit Nunaannilu akileraartartuullutik, kiisalu sulisuusut affaannit amerlanerusut Kalaallit Nunaanni inuit allattorsimaffianni nalunaarsorsimassasut.
• Ilassusiisoqarpoq § 10, imm. 6 -imi, erseqqissarumallugu sillimaniarnermut pilersaarummik suliaqartoqassanngitsoq inatsisini allani sillimaniarnermut piumasaqaateqarsimappat ingerlatsinermut atasunik. Assigisaanik § 10, imm. 7 -imi ilanngunneqarpoq qinnuteqartut sillimaniarnermut pilersaartusiortussaanerup avataaniissinnaaneri, naliliisoqarpat ingerlatsineq sillimaniarnikkut pinartoqanngitsoq.
• Aalajangersagaq kinaassusersiunngitsumik – objektiviusumik akisussaaneq, § 11 -imi siusinnerusukkut siunnersuummiittoq siunnersuummit peerneqarpoq.
• Sillimasiissuteqarnissamut atasumik aalajangersakkami erseqqissarneqarpoq suliffeqarfik inuussutissarsiortutut akisussaaffimmut sillimmasiisimassasoq. Imm. 2 -mi erseqqissarneqarpoq tamanna atuutinngitsoq pisuni inuussutissarsiornermut akisussaaffimmut sillimmasiisoqarfiunngitsumi, ingerlatassanut pineqartunut atasumik.
• Piujuaannartitsineq pillugit malittarisassanut piumasaqaatitut aalajangersagaq siunnersuummi siuliani §13 siunnersuummit peerneqarpoq.
• Pisortat sulianut aningaasartuutaasa utertillugit akilersinneqartarnerannut atatillugu erseqqissaatigineqarpoq aalajangersakkami akitsuusiinissamut pisinnaatitsisoqartoq.
• Aalajangersakkami zone-nut immikkoortitserisarnermut malittarisassiorsinnaatitsisumi, § 15, imm. 2-mi erseqqissaasiisoqarpoq imm. 1-ip kingorna malittarisassat nunami tamarmi pilersaarusiortarnermut inatsisinullu allanut aalajangersakkat akerliussanngitsut, sumiiffinni aalajangersimasuni inuussutissarsiornikkut ingerlatsisoqarsinnaanera, piffissani aalajangersimasuni imaluunniit atugassarititaasuni immikkut ittuni.
• § 17, imm. 3-mi ilanngussisoqarpoq eqqartuussivinnut suliassanngortitsisoqarsinnaanera aalajangiinernik ingerlaannartumik aalajangernerup atortuulerneranik kinguneqartanngitsoq, Naalakkersuisut allatut aalajangiisimanngippata.

Tusarniaassutigineqartuni ilaapput allannguutit immikkut nalunaaqutsigaanngitsut aammali allannguutit nalunaaqutsikkat track and change atorlugu.

Tusarniaanermut akissutinik nassiussinissamut piffissaliunneqarpoq: pingasunngorneq 16. juli 2024.

Oqaaseqaatigiumasat nassiuteqquneqarput uunga isiin@nanoq.gl assilinerilu uunga odka@nanoq.gl