Uunga siunnersuummut missingiut: Aatsitassanut tunngasunik suliaqarneq pillugu Inatsisartut inatsisaat nr. xx, xx. xxxx 2023-meersoq (aatsitassanut inatsit), aamma Uunga siunnersuummut missingiut: Aatsitassat pillugit ingerlatallu tamatumunnga pingaarutillit pillugit Inatsisartut inatsisaata (aatsitassanut ikummatissanullu inatsit) allanngortinneqarnissaa pillugu Inatsisartut inatsisaat nr. xx, xx. xxx 2023-meersoq

Matumuuna ”Uunga siunnersuut: Aatsitassanut tunngasunik suliaqarneq pillugu Inatsisartut inatsisaat nr. xx, xx. xxxx 2023-meersoq (aatsitassanut inatsit)”, aamma ” Uunga siunnersuut Aatsitassat pillugit ingerlatallu tamatumunnga pingaarutillit pillugit Inatsisartut inatsisaata (aatsitassanut ikummatissanullu inatsit) allanngortinneqarnissaa pillugu Inatsisartut inatsisaat nr. xx, xx. xxx 2023-meersoq” 2023-mi upernaakkut ataatsimiinnermi saqqummiunneqarnissaat siunertaralugu tusarniaassutigalugit nassiunneqarput.

Siunnersuutit marluk ataatsimoortillugit tusarniaassutigalugit nassiunneqarput, tassami aatsitassanut ikummatissanullu inatsisip allanngortinneqarnissaanut siunnersuut, aatsitassanut tunngasunik suliaqarneq pillugu inatsisissatut siunnersuutip akuerineqarnerata sunniutigisussaammagu.

Tunngaviusoq aamma siunertaq

Aatsitassat pillugit ingerlatallu tamatumunnga pingaarutillit pillugit Inatsisartut inatsisaanni aatsitassanik piiaanermut tunngasut tamarmik maleruagassiivigineqarput, ilanngullugit ikummatissiassanut akuersissutit, aatsitassarsiorluni misissuinissamut aamma aatsitassanik piiaanissamut akuersissutit, annikitsumik aatsitassarsiornissamut akuersissutit aamma avatangiisinut tunngasut. Inatsit Aatsitassanik Suliassaqarfinnut Avatangiisinut Aqutsisoqarfimmit, Aatsitassanut Ikummatissanullu Aqutsisoqarfimmit aamma Aatsitassanut Inatsisillu Atuutsinneqarnerannut Naalakkersuisoqarfimmit aqunneqarpoq.

Inatsit pissutsinut assigiinngisitaartunut tunngassuteqartoq ilaatigut innuttaasunut suliffeqarfinnullu paasiuminaatsutut issinnaammat, ilaatigullu aalajangersakkat ilaanni aatsitassanut akuersissutit nalinginnaasut, annikitsumik aatsitassarsiornissamut akuersissutit aamma ikummatissiassanut akuersissutit maleruagassiivigineqarlutik aatsitassanut ikummatissanullu inatsimmi pisutut, qulequttat pingaarnerinnartigut sammineqartariaqartarlutik, aatsitassanut suliassaqarfimmi maleruagassiinerup inatsisini arlalinni, suliassaqarfinni ataasiakkaani immikkut maleruagassiiviusuni, aggulunneqarnissaa naapertuutsinneqarpoq. Taamaattumik siunnersuutigineqarpoq pissutsit ullumikkut aatsitassanut ikummatissanullu inatsimmi maleruagassiivigineqartut siunissami inatsisini assigiinngitsuni pingasuni maleruagassiivigineqalissasut. Aatsitassarsiorfinnik ingerlatsinermut nalinginnaasumut tunngatillugu pissutsit pillugit aatsitassanut tunngasunik suliaqarnermut inatsit immikkoortoq, annikitsumik aatsitassarsiornissamut akuersissutit aamma najukkani illuliornermut attaveqaasersuutinullu suliniutinut aatsitassanik piiaanermut tunngatillugu pissutsit pillugit annikitsumik aatsitassarsiornermut inatsit immikkoortoq (2023-mi ukiaanerani ataatsimiinnissamut saqqummiunneqartussatut pilersaarutigineqarpoq) aammalu ikummatissiassanut nunalu iluata toqqorsivittut atorneqartarneranut tunngatillugu pissutsit pillugit maannakkut aatsitassanut ikummatissanullu inatsit. Inatsisini pingasuusuni taakkunani akuersissutinut maleruagassaqartitsinermut avatangiisinullu tunngasut pineqartunut ilaatinneqassapput. Ikummatissiassanut tunngatillugu siusinnerusukkut inatsisissatut siunnersuut suliassaqarfimmi tassani atuuttussaq suliarineqaraluarpoq, kisianni Naalakkersuisut ulloq 24/6 2021 aalajangermata ikummatissiassanut ingerlatassat atorunnaarsikkiartuaarneqassasut, suliassaqarfiup taassuma aatsitassanut ikummatissanullu inatsimmi kingusinnerusukkut allannguuteqartartumi maleruagassiivigineqarnerata ingerlaannarnissaa aammalu inatsisip taassuma atuutsiinnarnissaa naapertuussorineqarpoq.

Aatsitassanut ikummatissanullu inatsisip allanngortinneqarnissaanut siunnersuut, pissutsit aatsitassanut ikummatissanullu inatsimmi maleruagassiivigineqartut ilaasa, siunissami aatsitassanut tunngasunik suliaqarnermut inatsimmi siunissami maleruagassiivigineqalertussaanerisa, taamaallaat sunniutigaa, aammalu siunnersuummi taamaallaat aalajangersakkat attuumassuteqartut taamaallaat atorunnaarsinneqarput.

Pingaarnertigut isigalugu inatsisitigut inissisimanerup annertunerusumik allanngortinneqarnissaa siunertarineqanngilaq, aammalu siunnersuutit suleriaatsimut atuuttumut annertunerpaatigut takussutissaapput. Siunnersuutini siunertaavoq inatsisitigut inissisimanerup ersarinnerulersinnissaa aammalu aningaasaliivigiuminarnerulersitsinissaq. Taamaattumik siunnersuutit nunani tamalaani malitassanik naammassinninnissaat aammalu nunat aatsitassarsiorfiusut allat inatsisaannut sanilliullugu unammillersinnaassuseqarnissaat, pingaartinneqarpoq. Assersuutigalugu inatsisit nunani allamiunut pisinnaatitsissummik pigisaqartunut aningaasaliisartunullu pissarsiariuminartunngortinnissaat siunertaralugu, atugassarititaasut suut akuersissutinut ataasiakkaanut piumasaqaataanersut, nassuiarneqarpoq. Akuersissutinik qinnuteqartunut tunngatillugu inatsisitigut isumannaatsuunerup annertunerulernissaa siunertaralugu erseqqissarneqarpoq, qinnuteqaatinik suliarinninnermut atatillugu tunngavissarititaasut suut Naalakkersuisut pingaartissinnaaneraat.

Allannguutit annertuut

Aatsitassanut ikummatissanullu inatsisip atuuttup inatsisini immikkuullarissuni arlalinni aggulunneqarnerata saniatigut, aatsitassanut ikummatissanullu inatsimmut atuuttumut sanilliullugu siunnersuutini allannguutit annertunerpaat makkuupput:

• Sinerissap avataani ingerlatassat pillugit aalajangersakkat aatsitassanut tunngasunik suliaqarnermut inatsimmi aatsitassarsiorluni ingerlatassanut naleqqussarneqarput. Aatsitassanut ikummatissanullu inatsimmi sinerissap avataani ingerlatassat pillugit aalajangersakkat pingaartumik ikummatissiassanut tunngasunik ingerlataqarnissamut tunngassuteqarput.
• Siunnersuutit upalungaarsimanermut komite pillugu aalajangersakkanik imaqanngillat, tassami taanna atorunnaarsinneqassasoq kissaatigineqarmat.
• Akileraarutinut nalunaarusiortarneq pillugu aalajangersakkat allanngortinneqarput, taamaalillutik pisinnaatitsissummik pigisaqartut isumaqatigiissuteqarnerminni peqatigisaminnit akileraarutitigut paasissutissanik piniarnissamut pisussaaffeqarunnaarsinneqarlutik. Tamatumunnga taarsiullugu Naalakkersuisut pisinnaatitsissummik pigisaqartut isumaqatigiissuteqarnerminni peqatigisaannit, aatsitassarsiornissamut akuersissutip ataani ingerlatassanik suliaqartunit, toqqaannartumik akileraarutitigut paasissutissanik piumasaqarsinnaalissapput.
• Naalakkersuisut allaffissornikkut akiliisussanngortitsisarnissaannut inatsimmi tunngavissaliisoqarpoq.
• Sumiiffiit immikkut nunap sannamigut soqutiginaatillit eqqissisimatitassanngortinnissaannut Naalakkersuisunut inatsimmi tunngavissaliisoqarpoq.
• Annikitsumik aatsitassarsiornissamut akuersissut tunngavigalugu piiaanissamut akuersissummik tunineqarnissamut pisinnaatitaaffeqalersitsisoqarpoq.
• Aatsitassarsiorluni misissuinissamut akuersissutinik tunniussinissaq sioqqullugu tamanut ammasumik tusarniaaneq aallartinneqartassaaq.
• Piiaanissamut akuersissutip suliniummut suliakkiussanut najoqqutassiap, pisariaqarpat VVM-imut (Avatangiisinut sunniutaasussanik nalilersuinerit) aamma VSB-imut (Inuiaqatigiinni piujuartussamik iluaqutaasumik sunniutaasussanik nalilersuineq) suliakkiussanut najoqqutassiamut ataqatigiissillugu, tusarniaassutigineqarnera tunngavigalugu tunniunneqartarnissaanut inatsimmi tunngavissaliisoqarpoq.
• Suliniutissanik pitsaaliuisussanik nalilersuinermik (VFT), ingerlatassanut tunngatillugu avatangiisinut tunngasut pillugit tamanut ammasumik tusarniaanissaq kissaatigineqarluni, ingerlatassat allaffissornikkut akuerineqartussamik, piumasaqarnissamut inatsimmi tunngavissaliisoqarpoq.
• Innuttaasunik akuutitsinissamut aningaasaateqarfimmik pilersitsinissaq pillugu aatsitassanut ikummatissanullu inatsimmi aalajangersagaq atorunnaarsinneqarpoq aammalu siunertamut tassunga aningaasaliissutinik pilersitsinissaq pillugu aatsitassanik tunngasunik suliaqarnermut inatsimmi aalajangersakkamik taarserneqarluni.

Piffissamut killigititaq

Tusarniaanermut akissuteqaatit nassiuteqquneqarput uunga asn@nanoq.gl aamma EAMRA@nanoq.gl assilinera uunga bosd@nanoq.gl aamma netl@nanoq.gl kingusinnerpaamik 22. december 2022.

Inussiarnersumik inuulluaqqusilluta

Aatsitassanik Suliassaqarfinnut Avatangiisinut Aqutsisoqarfik aamma Aatsitassanut Inatsisillu Atuutsinneqarnerannut Naalakkersuisoqarfik