Matumuuna nassiunneqarpoq uunga siunnersuut Inissianik attartorneq pillugu Inatsisartut inatsisaat ammasumik tusarniutigineqarpoq.

Siunnersuutip taarsissavaa Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq. Peqqussut 2005-imili arlaleriarluni allanngortinneqartarsimavoq inissiaqarnermut tunngasuni ineriartornermut malittarisassat tulluarsarniarlugit aamma erseqqissaanissamut aaqqiinissamullu pisariaqartitsinerit akueriniarlugit.

Siunnersuummi allannguutit ilaatigut ineqarnermut akiliutinik akiliinermut, sulisunut inissiat nalinginnaasumik inissiatut attartorneqartussatut tiguneqarnerinut, uumasuuteqarnermut kiisalu attartortup toqunerani attartorneqartup tiguneqarneranut tunngasuusimapput.

Allannguisaqattaartuarnerit kingunerisimavaat inatsisitigut tunngaviusup ilaannakuusutut isikkoqalersimanera, ataatsimullu allanneqarnissaanik malittarisassallu nutarterneqarnissaannik piviusumik pisariaqartitsisoqalersimalluni.
Inatsisissatut siunnersuummi matumani siunertaq tassaavoq inatsisartut peqqussutaata atuuttup ataatsimoortumik Inatsisartut inatsisaannik taarserneqarnissaa, manna tikillugu tunngaviusumik pingaarutilinnik ingerlatitsiinnartoq, kisiannili piviusunut atuuttunut, ullumikkut inissiat ilusaannut tulluarsarneqarsimasoq aamma pisortat attartortitsisarneranni aaqqissugaanikkut allannguuteqartoq.

Inatsisissatut siunnersuut attartortup attartortitsisullu akornanni pingaarnertigut pissutsinik allannguinngilaq, aalajangersakkalli katersorlugit erseqqissarlugillu, taamaalilluni inatsisit paasiuminarnerusumik ullutsinnullu naleqqunnerusutut inissisimalerlutik.

Siunnersuummi ataasiakkaanik nalimmassaasoqarpoq, ilaatigut inissiani namminersortuni pigineqartuni attartortut Ineqarneq pillugu maalaaruteqartarfimmut isumaqatigiinngissutit suliarineqarsinnaanngorlugit kiisalu pilersaarutaasumik piffissakkaartumik aserfallatsaaliineq (PPA) pisortat attartortittagaanni maleruagassat eqqunneqarnissaat.

Namminersorlutik attartortitsisartut ineqarnermut akiliummik aalajangersaasarnerat, aserfallatsaaliisarnerat, attartornermik taamaatitsineq atorunnaarsitsisarnerlu ingerlatiinnarneqarput.

Siunnersuut isigineqassaaq ineqarneq pillugu aaqqissuusseqinnermut suliaqarnermi tunngaviulluinnartutut, ullutsinni tulluarnerusumik ataqatigiinnerusumillu inatsisitigut toqqammavissatut nunatsinni.

Tusarniaanerup imarisa saqqummersinneqassapput www.Naalakkersuisut.gl

Oqaaseqaatinut killiliussaq: 03. april 2026, nal. 12.00

Oqaaseqaataasinnaasut nassiunneqarsinnaapput uunga: Ineqarnermut Attaveqasersuutinut Isorliunerusunullu Naalakkersuisoqarfimmut pisortatigoortumik mailadressianut box909@nanoq.gl , cc-erlugu stsa@nanoq.gl

Imaluunniit allakkatigut uunga nassiunneqassapput: Ineqarnermut Attaveqaasersuutinut Isorliunerusunullu Naalakkersuisoqarfik, Postboks 909, 3900 Nuuk.

Tusarniaanermi akissuteqaatit saqqummiunneqassapput Naalakkersuisut nittartagaanni