Aalisarneq pillugu Siunnersuisoqatigiit Kalaallit Nunaanni aalisakkanik killilersuinermut suliniutit nutaat pillugit Naalakkersuisunut oqaaseqaateqarfigisarpaat. Aalisarneq pillugu Siunnersuisoqatigiit aalisarnermik inuussutissarsiuteqartut sinniisuutitaannit katitigaavoq.

Aalisarneq pillugu Siunnersuisoqatigiit nammineq kajumissutsiminik Kalaallit Nunaanni aalisarnermi tunngasuni peqqussutit nutaat tamaasa Naalakkersuisunut oqaaseqaateqarfigisarpaat. Siunnersuisoqatigiittaaq apeqqutit aalisarnermi pissutsinut tunngasut, Naalakkersuisuni annertunerusumik oqallisigeqqaartariaqanngitsut, sammisinnaavaat. Siunnersuisoqatigiit siulittaasuat siunnersuisoqatigiit sinnerlugit apeqqutinut aalisarnikkut politikimut sammisunik tamanut ammasumik oqaaseqarsinnaavoq.

Siunnersuisoqatigiit ilaasortat marluk amerlanerusulluunnit akornanni isumaqatigiinngissutit suliarineq ajorpaat. Naalakkersuisut aalisarneq pillugu siunnersuisoqatigiit Inatsisartut aalisarneq pillugu inatsisaat nr. 29, 23. maaji 2024-imeersumi §54-imi allassimasut pillugit siunnersuisoqatigiit tusarniartarpaat.

Ilaasortat
Aalisarneq pillugu Siunnersuisoqatigiit imatut katitigaavoq: Sulisitsisut Peqatigiiffiat (GE - Grønlands Arbejdsgiverforening) pingasunik sinniisuutitalik, KNAPK (Kalaallit Nunaanni Aalisartut Piniartullu Kattuffiat) pingasunik sinniisuutitaqartoq, aammalu QAK (Qalerualinniat Aalisagarniallu Kattuffiat) pingasunik sinniisuutitaqartoq.

Taaseqataasinnaanatik peqataasartut ukuupput: Aalisarnermut Piniarnermullu Naalakkersuisoqarfik, Kalaallit Nunaanni Aalisarnermut Piniarnermullu Nakkutilliisoqarfik, Pinngortitaleriffik, Aningaasaqarnermut Akileraartarnemullu Naalakkersuisoqarfik, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik, Inuussutissarsiornermut, Niuernermut Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik, Piujuaannartitsilluni Kalaallit Nunaanni Aalisarneq (Sustainable Fisheries Greenland - SFG), SIK, NUSUKA (Nunaqavissut Suliffiutillit Kattuffiat), Arctic Prime Fisheries ApS, Royal Greenland A/S, Ocean North Kalaallit Nunaat, Kommuunit aamma SQAPK (Sinerissap Qanittuani Aalisartut Piniartullu Kattuffiat).

Siulittaasoq GE-mit, KNAPK-mit QAK-miillu nikittaallutik toqqarneqartarpoq, siulittaasullu tullia pingajualu siulittaasut paarlakaannerat malillugit toqqarneqartarluni. Siunnersuisoqatigiinni allatseqarfik Aalisarnermut Piniarnermullu Naalakkersuisoqarfimmiit isumagineqarpoq.

Siunnersuisartoqatigiinnut suleriaaseq