Imarisassat tusarnaarlugit atuarlugitAalisarnermut, Piniarnermut, Nunalerinermut Imminullu Pilersornermut Naalakkersuisoqarfik
Imminut pilersorneq
Kalaallit Nunaanni imminut pilersorsinnaanerup ineriartortinnera immikkoortortaqarfimmit ingerlanneqarlunilu ineriartortinneqarpoq. Kalaallit Nunaanni inuussutissanik tamakkiisumik imminut pilersorsinnaalernissaq anguniagaanngilaq inuussutissalli nunatta avataaneersunik eqqussuivallaarunnaarnissaq siunertaavoq, inuussutissanillu tunisassiorsinnaanitta inerisarnissaa.
Kalaallit Nunaanni imminut Pilersornissamut Periusissiaq 2025-2030
Kalaallit Nunaanni imminut pilersornissamut periusissiami inuussutissanik imminut pilersorsinnaanerup annertusarnissaa pitsanngorsagassaasoq allassimavoq. Imminut pilersorsinnaanerup imminut akilersinnaallunilu attanneqarsinnaanissaa pingaartinneqarpoq, taamaaliornikkut najukkani ataasiakkaani aallaavilinnik inuussutissanik pitsaanerusumik qularnaatsumillu pilersuisoqalersinnaassammat. Nunarsuarmi pissutsit inuussutissanik pilersorneqarnitsinnut eqquisumik isumannarsiartortillugit silap pissusiatalu allanngoriartornerani pissutsinik ilungersunartorsiortoqartillugu inuussutissanik isumannaatsumik pilersorneqalernermik, avataaniillu sunnertissinnaanitsinnut illuatungiliisinnaasunik najukkani tunisassiorsinnaanerup pitsanngorsarnissaanut aaqqiissutissarsiornissaq nukinginnarsiartorpoq.
Nerisassanut tunngatillugu kulturitta, kinaassusitta isumannaatsumillu inuussutissaqarsinnaanitta attatiinnarnissaa siunertaavortaaq, ilutigalugu inuussutissanik pissarsisinnaanissamut periarfissat pitsanngoriartinnerisigut isumannaannerusumik inuussutissaqarsinnaanissaq qulakkeerlugu.
Imminut pilersornissamut periusissiaq 2025-20230 imminut pilersornerulernissamut Naalakkersuisut suliaasa ilaannaraat. Matumani periusissiami nerisassanik imminut pilersorneq ukkatarineqarpoq, pitsanngorsagassat periarfissallu allat kingorna ukkataralugit malitseqartitsilluni saqqummertoqarumaarpoq, soorlu sanaartornermi atortussanik nukissiornermillu imminut pilersorneq.
-
Imminut pilersornerulernissamut tapiissutinut aningaasaliissutit
”Kalaallit Nunaanni imminut pilersornerup inerisarneqarnera”-nut tapiissuteqartarnermi inuussutissarsiutitut suliniutinut Kalaallit Nunaanni imminut pilersornerulernissamut aqqutissiuisinnaasunut tapiissuteqartarnissaq siunertaavoq.
Imminut pilersornissamut sulialittut inuussutissarsiuteqaruit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut tapiissutinik qinnuteqarsinnaavutit. Tunisassiorfiit pilersinneqarsimasut aamma suliffeqarfiit pilersinneqaqqammersut qinnuteqarsinnaapputtaaq.
Imminut pilersornerup iluani nioqqutissiortut, tamaasa nioqqutissiortuupput kalaallit nuaanni nioqqutissanik tunisassianik sunniuteqaqataanermut annertusaaqataappata, tunisassiortfiit nunami immamilu suliaqarfinniit tunisassiassanik pisisartut tunisisartullu aamma/imaluunniit najukkaniit tunisassiat atorlugit tunisassiortut ilanngullugit.
Tunisassiorfivit ineriartortinnissaanut kiisalu Kalaallit Nunaanni imminut pilersornerulernermut tapertaasinnaasumik ingerlatsinissamut tapiiffigineqarnissamut qinnuteqarsinnaavutit.