Imarisassat tusarnaarlugit atuarlugitTuttunik umimmannillu 2025-mi pisanik nalunaaruteqarneq
Nassiussisuuvoq: Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik
Tuttut aamma umimmaat piniagaanerat illersugaanerallu pillugit Namminersorlutik Oqartussat nalunaarutaat nutaat 2025-mi atuutilersinneqartut atatillugit pisanik nalunaaruteqarnissaq piumasaqaataalerpoq. Taamaammat qinnuteqartunut ukiup siuliani pisanik nalunaaruteqarsimasunut taamaallaat akuersissutinik 2026-mi tunniussisoqarsinnaalerpoq. Tassunga ilanngullugit qinnuteqartut nutaat piumasaqaatinik naammassinnittut.
Tassunga atatillugu Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup misissoreerpaa aasaaneraniit aamma ukiaaneraniit 2025-miit pisanik nalunaarutit qassit tiguneqarsimanersut. Akuersissutinik pigisaqartut pisanik nalunaaruteqarnissamut kommunimut utertitsinikkut imaluunniit www.sullissivik.gl aqqutigalugu pisanik nalunaaruteqarnissaq periarfissarivaat.
| Uumasoq | 2025 akuersissutit tunniussat | 2025 Pisat nalunaarutit | %-nngorlugit | Pisat nalunaarutigineqanngitsut | %-nngorlugit |
| Tuttu | 6.332 | 3.167 | 50% | 3.165 | 50% |
| Umimmak | 1.786 | 1.097 | 61% | 689 | 39% |
Kalaallit Nunaanni tamarmi tuttunniarnermut akuersissutit 6.332-t 2025-mi tunniunneqarsimapput, taakkunanngalu pisanik nalunaarutilimmik taamaallaat 3.165-t utertinneqarsimallutik. Tamanna akuersissutit tunniunneqartut 50%-iinnaraat. Taamaammat tuttunniarnermut akuersissutit 2025-meersut 3.165-t suli utertinneqanngillat.
Umimmanniarnermut tunngatillugu Kalaallit Nunaanni tamarmi akuersissutit 1.786-t 2025-mi tunniunneqarsimapput, taakkunanngalu pisanik nalunaarutilimmik taamaallaat 1.097-t utertinneqarsimapput. Tamanna akuersissutit tunniunneqartut 61%-iinnaraat. Taamaammat umimmanniarnermut akuersissutit 2025-meersut 689-t suli utertinneqanngillat.
Ukioq manna pisassiissutit piniarnissamullu piffissaliussat aalajangerneqartut Naalakkersuisoqarfiup nalunaarutigeqqammerpai. Siorna 2025-mut naleqqiullugu pingaarutilinnik allannguuteqanngillat. Tuttunut umimmannullu 2025-mut tunngasumik pisanik nalunaaruteqarnissaq 31. juuli 2026 ilanngullugu periarfissaassaaq, tamannalu akuersissutinik kommunimut utertitsinikkut imaluunniit www.sullissivik.gl aqqutigalugu pisanik nalunaaruteqarnikkut pisinnaavoq.
Pisat suli nalunaarutigineqarsimanngitsut kommuniniit TUTUM@NANOQ.GL-imut nassiunneqassapput.
Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut uunga saaffiginnittoqarsinnaavoq: apn@nanoq.gl