Kalaallit Nunaata Nunallu Allanut Naalakkersuisoqarfiani, Bruxellesimi Washington D.C.-mi, Reykjavikimilu Sinniisoqarfianni suliffimmik misiliisinnaanermut paasissutissat.
Qaffasinnerusumik ilinniartut periarfissaqarput ilinniagaqarnermut atatillugu naleqquttumik Nuummi Nunanut Allanut Naalakkersuisoqarfimmi imaluunniit Bruxelles-imi Washington D.C.-mi Reykjavik-imiluunniit sinniisoqarfinni suliffimmik misiliinissaminnut. 

Misiliinissaq ima piareersarneqassaaq anguneqareersut nuussinnaanngorlugit, matumani suliffimmik misiliisup ilinniarfianit akuerineqarsinnaappat. Suliffimmi misiliinerup pingaarnertut siunertaraa suliffimmi misiliisup ilinniarneranut misiliineq iluaqutaassasoq aamma sinniisoqarfimmi nunanut allanut sinniisoqarfimmi allatsinik siunnersorteqarluni suliffeqarfiup suliassaannik suleriaasiinillu ilisimasaqalernissaq. Ilinniartumut neqeroorutigaarput ilinniarnermini ilisimasat ulluinnarni sulinermi atorneqarsinnaanissaat. Suliffimmik misiliisup suliniutinut assigiinngitsunut aammalu suliassanut suleqataanissaa.

Periarfissamik neqerooruteqarpugut, ilinniagaqartut ilinniakkatigut ilisimasanik nalinginnaasumik pissutsini atuisinnaanngortillugit. Ilinniartoq suliniutinik suliassanillu arlalinnik pissanganartunik suliaqarnissaminut periarfissaqassaaq, suliniutit suliassallu piareersarneqarsimasut pineqarsinnaapput, aammalu suliassat tassanngaannartumik takkussinnaasarput.

Qinnuteqartup suliffimmi misiliinerup nalaani ilinniarfimmi qaffasinnerusumi ilinniagaqartutut nalunaarsorsimaannarnissaa piumasaqaataavoq. Naalakkersuisoqarfimmi aammalu Sinniisoqarfinni pineqartumi suliffimmi misiliiffinni ataasiakkaani imaritinneqartussat atugassarititaasullu aalajangerneqassapput, qinnuteqaallu Nunanut Allanut Naalakkersuisoqarfimmut, NAINN@nanoq.gl tunniunneqassaaq.
Suliffimmik misiliinermi akissarsiaqartitsisoqanngilaq, kisianni sinniisoqarfinni suliffimmik misiliinermi qaammammut 2500-4000 kr.-inik inuuniarnermi aningaasartuutit ilaat akilerneqarnissaannut matussutissiisoqarsinnaavoq. Suliffimmik misiliiffimmi inuuniarnermut aningaasartuutit apeqqutaallutik tapiissutit allanngorartuupput.
Suliffimmik misiliinermi piffissaliussat sumiiffik apeqqutaalluni assigiinngillat. Nunanut Allanut Naalakkersuisoqarfimmi, Sinniisoqarfinnilu Washinton, D.C.-mi Reykjavikimilu sulinermik misiliineq 1. august aallartittarpoq, Kalaallit Nunaata Bruxellesimi Sinniisoqarfiani suliffimmik misiliineq 1. september aallartittarpoq.

Suliffimmik misiliinissamut paasissutissat ataatsimoortut uani atuakkit.