Kalaallit Nunaata Islandillu ikinngutiginnerat naqissuserneqarpoq

Atorfilittat qaffasissumik inissisimasut Kalaallit Nunaaneersut Islandimeersullu pingasunngornermi 15. januar 2025 Reykjavíkimi ataatsimeeqatigiipput. Senior officials gruppemik taallugu nunat marluk aallartitaasa akunnerminni akuttunngitsumik ataatsimeeqatigiittarnerisa ilagaat. Naalagaaffinngornissamut Nunanullu Allanut Naalakkersuisoqarfimmi atorfilittat Vivian Motzfeldtip ataani atorfillit Kalaallit Nunaanni Senior officials gruppen-imik aqutsisuupput, Islandimiillu nunanut allanut tunngasunut ministeri Þorgerður Katrín Gunnarsdóttir-ip ataanni atorfilittat ingerlatsisuullutik.

Reykjavikimi ataatsimiinnermi nunat suleqatigiinnerat pilersaarutip atuutsinneqarnerani aalajangersarneqarsimasuni (Programme of Implementation) sammineqarlutik, aalajangersarneqarsimasut suliniutit siuariartorneri misissorneqarlutillu. Matumuuna iliuuseqaqqissinnaanerit kiisalu atorfilittat akornanni attaveqaatinik pilersitsinissat eqqartorneqarlutik.

Suleqateqalernissap atuutsilernissaanut pilersaarut suleqatigiinnerup annertusarneqarnissaanik isumaqatigiissummik Naalakkersuisut siulittaasuanit Múte B. Egedemit aamma Islandimi statsministeriusimasumit Katrín Jakobsdóttirimit Reykjavikimi 13. oktober 2022-mi atsiorneqarsimasumik aallaaveqarpoq.

Immikkoortut arfineq marluk nalunaarummi sammineqarput: niuerneq, aalisarneq, aningaasaqarnikkut suleqatigiinneq, silaannaap allanngoriartornera uummassusillillu assigiinngissitaarneri, suiaassutsit apeqqutaatinnagit naligiissitaaneq, ilinniartitaaneq ilisimatusarnerlu kiisalu kulturikkut suleqatigiinneq.

Kalaallit Nunaata Islandillu suleqatigiinnerat ukiuni kingullerni nunani marluusuni iluaqutaasumik annertusiartorsimavoq. Nunat marluusut arlalitsigut assigiimmik soqutigisaqarlutillu periarfissaqarput silaannaallu allanngoriartornera avatangiisillu eqqarsaatigalugit assigiinnik unammilligassaqarlutik.

Apeqqutit ullutsinni pisut pingaarutillit ilanngullugit oqallisigineqarput tassanilu Kalaallit Nunaata Islandillu ikinngutigiinnerat uppernarsarneqaqqilluni.

Suleqateqalernissap atuutsilernissaanut pilersaarut linki aqqutigalugu aanneqarsinnaavoq (kalaallisut, danskisut tuluttullu)

Paasissutissat erseqqinnerusut pillugit attavigiuk: Naalagaaffinngornissamut Nunanullu allanut Naalakkersuisoqarfik, (+299) 34 50 00, nap@nanoq.gl

Assit: Jónas Haraldsson