Vivian Motzfeldtip oqaluttuarisaanermi pingaarutilimmik Tuluit Nunaannut tikeraarnermini tuluit ministerii naapippai

Naalagaaffinngornissamut Nunanullu allanut Naalakkersuisoq Vivian Motzfeldt Londonimi ulluni januarip 13-anit 15-at ilanngullugu tuluit ministeriinik, inatsisartuini ilaasortanik naapitsiniarluni, taamatullu aamma Kalaallit Nunaanni ilisimatusarnermut Naalakkersuisutut British Antarctic Survey Cambridge Universitymullu pulaarniarluni angalavoq.

Tikeraarneq oqaluttuarisaanikkut pingaaruteqarpoq. Kalaallit Naalakkersuisuini ilaasortaq UK-mut ataasiarluni tikeraarnerani Tuluit Nunaanni politikerinik nuimasunik taamak amerlatigisunik aatsaat naapitsivoq. Kalaallit Nunaata UK-llu akornanni niuernermik isumaqatigiissutissamik isumaqatiginninniarnerit aallarteqqinnissaat, kiisalu ilisimatusarnermut illersornissamullu kiisalu sillimaniarnermut attuumasunik oqaloqatiginninnissat, tikeraarnermi pingaarnertut siunertaavoq.

Vivian Motzfeldti tikeraarnermini tuluit Europamut, Amerikap avannaanut Nunanut imarpiup akianiittunut Issittumullu ministeriat, Stephen Doughty naapippaa, naapinnermilu Kalaallit Nunaata UK-llu siunissami suleqatigiinnissamut niueqatigiinnissamullu isumaqatigiissutissaa pillugu isumaqatiginninniarnerit immikkut oqallisigivaat. Vivian Motzfeldtip aamma tuluit ilisimatuussutsimut, ilisimatusarnermut nutaaliornermullu ministeriat, Lord Patrick Vallance ilisimatusarnermut immikkoortumut apeqqutit attuumassuteqartut oqallisigissallugit ataatsimeeqatigalugulu, tuluit illersornissamut ministeriisa ilaat Lord Vernon Rodney Coaker illersornissamut sillimaniarnermullu politikimut attuumassuteqartunik oqaloqatigissallugu naapippaa.

Taakku saniatigut Vivian Motzfeldip UK-mi inatsisartuni issittumi immikkoortumi suleqatigiit - All Parliamentary Party Group for Polar regions - ataatsimeeqatigai.

Vivian Motzfeldtilu aamma Cambridgemut pulaarpoq. Tassani Cambridge Universitetimi British Antarctic Survey (BAS), Advanced Research and Invention Agency (ARIA) kiisalu Scott Polar Research Institute (SPRI) Tuluit Nunaata issittumi ilisimatusarnikkut suliniutai pillugit naapippai. Vivianittaaq Kalaallit Nunaanni ilisimatusarnermut inatsisip ineriartortinnissaani siunertat ilanngullugit paasissutissiissutigissavai.

Naalagaaffinngornissamut Nunanullu allanut Naalakkersuisoq Vivian Motzfeldt ima oqaaseqarpoq:

”Niuernermik isumaqatigiissutissamik isumaqatiginninniarnitta Labourip naalakkersuisuisa nutaat ivertinneqarnerisa kingorna aallarteqqinnissaat Naalakkersuisut kissaatigaat. Isumaqatiginninniarnerit aallarteqqinnissaat kimigiisissutigiartorlugu maaniippunga. Taamattaaq Tuluit Nunaata ilisimatusarnermik annertuumik ingerlatsisup, oqaloqatigittuarnissaa pingaaruteqarpoq. Naggasiullugulu NATO-mi iligisatsinnik illersornissamut tunngasuni attaveqateqarluarnissarput nuannaarutigaara.”

Vivian Motzfeldt UK-mut angalanermini aamma danskit UK-mut aallartitaannik René Dinesenimik ataatsimeeqateqassaaq.

Paasissutissat erseqqinnerusut pillugit attavigiuk:
Naalakkersuisup allattaa Naasunnguaq Beck Kristensen:
E-mail: nabk@nanoq.gl
Mobil: +299 533684