Naalakkersuisoq, Vivian Motzfeldtip Kalaallit Nunaata Nunanut Allanut, Sillimaniarnermut Illersornissamullu Politikissaanut Periusissiaq ukioq manna Arctic Circle Assembly-mi erseqqissarpaa

Sapaatip akunnera kingulleq Arctic Circle Assembly Reykjavikimi ingerlanneqarpoq. Naalagaaffinngornissamut Nunanullu Allanut Naalakkersuisoq, Vivian Motzfeldt, ukiumoortumik ataatsimeersuarnermut peqataavoq.

Naalagaaffinngornissamut Nunanullu Allanut Naalakkersuisoq, Ataatsimeersuarnerup ammaanersiornerani Nunanut Allanut, Sillimaniarnermut Illersornissamullu Politikkissaanut Periuusissiaq qulequtaqartoq ‘Nunarput nunarsuarmi - Pineqartilluta ilaassaagut’ pillugu oqalugiarpoq apeqqarissaarneqarlunilu, tamatumalu kingorna ataatsimeersuarnermut aaqqissuussisoq, Islandillu Præsidenterisimasaa Ólafur Grimsson peqatigalugu tusarnaartut apeqquteqaataat akillugit. Naalakkersuisoq periusissiami periusissat pingaarnersiukkat arlallit saqqummiuppai, ilaatigullu Issittumi Siunnersuisoqatigiinni Siulittaasuunissamut Siulittaasuuffiup issittumeersumit ingerlanneqarnissaata pingaaruteqassusaa, issittumi inuusut qitiutillugit sulinissaq, nunallu kujasissut avannaaniittunik suleqatigiinnikkut inissisimasarnerat pitsanngorsarniarlugu unammillerlugu.

Tamatuma saniatigut, Naalakkersuisoq ataatsimiinnermi qulequtalimmik: 'Government-Science: The Role of Greenland' oqalugiarpoq kingornalu Islandimi statsministeriusimasoq ataqqinartoq Katrín Jakobsdóttir, peqatigalugu eqqartueqatigiipput. Oqaloqatigiinnermi ilaatigut nunatsinni ilisimatusarnerup nunatsinni innuttaasunut iluaqutaanissaata pingaaruteqassusaa Naalakkersuisup naqissuserpaa, nunatsinnilu ilisimatusarnermut inatsisiliornissaq ilaatigut ileqqorissaarnissamut sinaakkutissat ilanngullugit suliarineqartut.

Ataatsimeersuarnerup nalaani Naalagaaffinngornissamut Nunanullu Allanut Naalakkersuisoq ataatsimiititsisuuvoq 'Greenland - A partner in the World: Greenland's Foreign, Security and Defense Policy - An Arctic Strategy' qulequtalimmik. Tassani Naalakkersuisoq ammaalluni oqalugiarpoq, tamatumalu kingorna panelimi oqallinneq ingerlanneqarluni, ilaasoralugit, Nunavummi Naalakkersuisut Siulittaasuat, ataqqinartoq P.J. Akeeagok, Islandimi nunanut allanut ministereqarfimmi pisortaq, Martin Eyjólfsson, Inatsisartut nunanut allanut sillimaniarnermullu ataatsimiititaliaanni siulittaasoq, Pipaluk Lynge. Nunatta nunat sanilerisai qaninnerit Island Canadalu periusissiaq ilassilluarpaat, nunallu akornanni suleqatigiinnerup pingaaruteqassusaa naqissuserlugu.

Ataatsimeersuarnerup ingerlanneqarneranittaaq Naalakkersuisup nunatta suleqatai pingaarutillit ilaatigut, Islandip præsidentitaava Halla Tómasdóttir Islandip Nunattalu akornanni qanimut suleqatigiinneq pillugu naapippaa, tassanngalu inuiaqatigiit akornanni sikkerartitat ilaatigut ikinngutigiinnissaq siunertaralugu peqatigiiffiup KALAK-p aaqqissuussaa Tasiilap nunaqarfiini aammalu Ittoqqortoormiini meeqqat Islandimut tikeraartarsinnaanerannik nalunnermik ilinniarlutillu meeqqat atuarfiannik misiliisinnaanerannik siunertaqartoq.

Arctic Circle Assembly-p nalaani Naalakkersuisoq aammattaaq suleqatigiissitanik pingaarutilinnik naapitsinissamut periarfissaqarsimavoq, ilaatigut USA-p Issittumi aallartitaata nutaap, Mike Sfragap, kiisalu senator Lisa Murkowski Alaskameersoq, tassani USA-p Kalaallit Nunaatalu qanimut suleqatigiinnerat oqallisigineqarmat, kiisalu issittumi Amerikap avannaani oqallittarfimmik pilersitsisinnaanermut periarfissat.

Tamatuma saniatigut Naalakkersuisoq Islandimi Savalimmiunilu nunanut allanut naalakkersuisut, Þórdís Kolbrún R. Gylfadóttirimik aamma Høgni Hoydalimik ataatsimeeqateqarpoq, tassani Nunat Avannarliit killiit akornanni suleqatigiinneq oqaluuserineqarpoq. Tassani Kalaallit Nunaata Islandillu 2022-miit siunissami suleqatigiinnissaat pillugu nalunaarutip atuutilersinneqarneratigut pitsaasumik ingerlasoqarsimanera immikkut erseqqissarneqarpoq.

Naggasiullugu Naalakkersuisoq Tuluit Nunaata Europami, Amerikami Avannarlermi nunanut allanut naalakkersuisunngortoq, Stephen Doughty, ataatsimeeqatigivaa. Ataatsimiinneq siullermeerluni Tuluit Nunaanni naalakkersuisut nutaat peqatigalugit pivoq. Taamaalilluni nunarput Tuluit Nunaatalu suleqatigiilluarnerat oqaluuserineqarpoq, nunallu akornanni niueqatigiinnissamut isumaqatigiissuteqarnissamik sulineq aamma eqqartorneqarluni.

2024-miit 2033-mut Nunatta Nunanut Allanut, Sillimaniarnermut Illersornissamullu Politikkissaanut Periuusissiaq uani aaneqarsinnaavoq:
https://naalakkersuisut.gl/Departementer/Dep_for_Udenrigsanliggender_Selvstaendighed/Publikationer?sc_lang=kl-GL

Annertunerusumik paasissutissanik pissarsiumagaanni Naalakkersuisumut allatsi Naasunnguaq B Kristensen +299 345682, imaluunniit e-mail: nabk@nanoq.gl atorlugit attavigineqarsinnaavoq.