Isumaqatigiissutip ilaa nutaaq Illersornissaqarfiup Issittumi Atlantikullu Avannaani suliassanik isumaginninnera nukittorsarpaa

Partiit illersornissamik isumaqatigiissuteqartut Naalakkersuisullu Issittoq Atlantikullu avannaa pillugit isumaqatigiissutip ilaa isumaqatigiissutigaat. Issittumi umiarsuit dronillu nutaat illersornissaqarfiup tamaani najuunneranik nukittorsaaqataassapput. Katillugit 14 mia. kr-t missaat suliniutissatut isumaqatigiissutigineqarput.

Umiarsuit issittumi atorneqartussat nutaat marluk, dronit ungasissumut angalasinnaasut assinik pissarsisinnaanermut nutaalianik naammassinnissinnaassusillit, qaammataasatigut naammssinnissinnaaneq maluginiutillu nunamiittut. Tamakkut tassaapput Issittumi Atlantikullu Avannaani isumaqatigiissutip ilaani suliniutit ilaat, naalakkersuisut partiillu illersornissamik isumaqatigiissuteqartut Savalimmiut landsstyreanik Kalaallillu Nunaanni Naalakkersuisunik qanimut akuutitsillutik isumaqatigiissutigisaat.

”Sillimaniarnikkut politikikkut ilungersunartumik unammilligassaqarnerput nassuerutigisariaqarparput. Taamaammat Illersornissaqarfiup sumiiffimmiinnera nukittorsassavarput. Isumaqatigiissut una toqqammavissiisoq atorlugu taamaaliorpugut, tamannalu ukioq manna suli nangittumik suliniuteqarfigissavarput,” Illersornissamut ministeri Troels Lund Poulsen oqarpoq.

Isumaqatigiissutip ilaatigut isumaqatigiissuteqartut Naalakkersuisullu piffinni alapernaarsuinerup oqartussaanermillu nakkutilliinerup pitsanngorsarnissaa kissaatigaat. Peqatigisaanik qanimut iligisat NATO-llu Issittumi Atlantikullu Avannaanni suliassaminik isumaginninnerisa ikorfartornissaat pingaaruteqarpoq, taamaalilluni illersornissaq isumannaatsuunerlu nukittunerulissallutik. Katillugit 14,6 mia. kr-t suliniutinut atugassanngortinneqarput.

Suliniutit ilaatigut tassaapput:

• Issuttumi umiarsuit nutaat
  Issittumi umiarsuit nutaat pingasut Kalaallit Nunaanni naammassisaqarfiulluarnerusumik eqaannerusumillu suliassanik naammassinnissinnaapput kiisalu atortunik, soorlu helikopterinik droninillu usisinnaassallutik.
• Dronit ungasissumut angalasinnaasut
  Dronit ungasissumut angalasinnaasut maluk assinik pissarsisinnaanermut atortorissaarutillit, piffinnik annertuunik ungasissumiittunik alapernaarsuisinnaallutillu assinik sukumiisorpassuarnik imalinnik pissarsisinnaasut.
• Pisunik paasiniaanikkullu paasisat pitsaanerusut
  Qaammataasatigut naammassinnissinnaassuseq nunamilu maluginiutit ilaatigut Issittumi Atlantikullu Avannaani ingerlatanik paasisaqarnikkut alapernaarsuinikullu pisunik paasiniaanikkullu paasisat nukittunerulersissavai.
• Issittumi tunngaviusumik ilinniarnermi ilinniartut amerlineri
  Issittumi tunngaviusumik ilinniarfimmi inissat amerlassusaat 22-nit 30-nut amerlineqassapput. Kalaallit Nunaanni inuusuttut amerlanerusut upalungaarsimanermik oqartussaaffimmillu ingerlatsinermi akisussaaffimmik tigusinissamut piginnaasaqalernissaat, isumaqatigiissutip pisinnaanngortippaa.

Isumaqatigiissutip ilaa Issittumi Atlantikullu Avannaani illersornissap isumannaallisaanerullu nukittorsarnerani alloriarneruvoq siulleq. Ukioq 2025-mi kingusinnerusukkut immikkoortumi qunulersitsinissap illersornissallu nukittorsarnissaanik samminnittumik isumaqatigiissutip ilaneqarnissaa siunertaavoq.

Isumaqatigiissutip ilaa aamma inuiaqatigiit isumannaatsuunerannik nukittorsaassaaq
Isumaqatigiissutip ilaa atortussanngortinneqartussanngorpat, aningaasaliissutit Savalimmiuni Kalaallillu Nunaanni piffinni suliffinnik piffinnilu suliffeqarfinnik ikorfartorneqarsinnaanerani pingaartinneqassapput.

Suliniutit sapinngisamik Savalimmiunut Kalaallillu Nunaannut iluaqutaanissaat pingaaruteqartoq, partiit Naalakkersuisullu isumaqatigiissutigaat, taamaalilluni inuiaqatigiit nukittunerusinnaaqqullugit. Tamatuma naammassinnissinnaassutsip isumaqatigiissummut ilaatinneqartup Illersornissaqarfiup politiinik, upalungaarsimasunik inuinnaallu oqartussaasut isumagisassanik isumaginninnerannut ilapittuisinnaassusiannik nukittorsaanissaa malitsigaa.

Tamatuma saniatigut paasiniaanerni ilisimatusarnernilu suleqatigiinnerup nukittorsarnissaa partiit Naalakkersuisullu isumaqatigiissutigaat, soorluttaaq Issittumi Sakkutooqarfiup Nuummi atortuutai nutarterneqassasut, taamaalilluni Illersornissaqarfik pissutsini isumannaatsuni ingerlatsisinnaaqqullugu, ilaatigullu alapernaarsuinermi, oqartussaassutsimik isumaginninnermi, iligisanik ikorfartuinerni kiisalu Issittumi Atlantikullu Avannaani ujaasinernut annaassiniarnernullu tunngasuni isumannaatsumik ingerlatsisinnaaqqullugu.

”Issittumi Atlantikullu Avannaani suliaqarnerup nukittunerulersitap Savalimmiut Kalaallillu Nunaat qanimut suleqatigalugit pinissaa pingaaruteqarluinnartuuvoq, taamaalilluni suliniutit piffinnit aallaaveqarlutillu inuinnarnut iluaqutaasinnaaqqullugit. Tamanna isumaqatigiissummi matumani qularnaarparput,” Troels Lund Poulsen oqarpoq.

”Kalaallit Nunaat piffissamut ulorianartorsiortitsisut allanngorneranut ikaarsaarpoq. Isumaqatigiissutip ilaatigut matumuuna Kalaallit Nunaanni Kalaallillu Nunaata eqqaani isumannaatsuunissap nukittorsarneranut alloriarnerup siulliup tigunera nuannaarutigaara. Naalakkersuisut danskit naalakkersuisuinik oqaloqatiginninnerup nanginnissaa qilanaaraat” Naalagaaffinngornissamut Nunanullu Allanut Naalakkersuisoq Vivian Motzfeldt oqarpoq.

Paasissutissat erseqqinnerusut pillugit attavigiuk:
Naalakkersuisup allattaa Naasunnguaq Beck Kristensen:
E-mail: nabk@nanoq.gl
Mobil: +299 533684

2024-2033-mi illersornissamut isumaqatigiissut