Uunga tunngatillugu siunnersuut pillugu tusarniaaneq: Utoqqarnut tapersersuinissaq pillugu Inatsisartut inatsisaat

Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfiup utoqqarnut tapersersuinissaq pillugu Inatsisartut inatsisissaattut siunnersuut matumuuna tamanut tusarniutigaa.

Tunuliaqutaasoq

Utoqqaat inuiaqatigiinnit pisariaqartitaminnik ikiorneqarnissaannut tapersersorneqarnissaannullu tunngatillugu qulakkeerinninnissaq Inatsisartut inatsisissaattut siunnersuummi siunertarineqarpoq. Taamatuttaaq utoqqaat immikkut pisinnaatitaaffiisa qulakkeerneqarnissaat aamma utoqqarnut taakkulu qanigisaannut tamakkiisumik takunnissinnaanissaq anguniarlugu pisinnaatitaaffiit taakku ataatsimut katersornissaat kiisalu kommunit pitsaanerusumik sullissinissaannut tunngavissiuunnissaat siunnersuummi siunertarineqarput.

Utoqqaat pisinnaatitaaffiisa nukittorsarnissaat aamma utoqqaat tamarmik nunatsinni pitsaasumik toqqissisimanartumillu atugaqarnissaannik, tassani utoqqaat nukiminnik pitsaanerpaamik atorluaasinnaanissaannik qulakkeerinninnissaq pillugu politikkikkut ataatsimut kissaateqarneq siunnersuummi tunuliaqutarineqarpoq. Siunnersuut isumaginninnikkut qulakkeerinninnissap nukittorsarnissaanut aamma pisortat ingerlatsinerannut tatiginninnerulernissamut iluaqutaassaaq. Siunnersuutip tapersersuinissamut periarfissat periarfissaalersissavai tamatumalu peqatigisaanik kommunit tapersersuinissamut neqeroorutinik namminneq aaqqissuussinissaminnut kiffaanngissuseqarnerulissapput.

Naalakkersuisut utoqqaat pillugit periusissiaanni suliniutit assigiinngitsut siunnersuutikkut malitseqartinneqarput, tassani utoqqarnik sullissinermut tunngatillugu aaqqissuussinerup nukittorsarneqarnissaanut pisariaqartitsisoqarnera tikkuarneqarsimavoq. Aamma inuit katitigaanerisa ineriartornerannut qisuariarneruvoq, tamatumami kingunerisaanik utoqqarnut suliassaqarfimmut kommunimullu, utoqqarnut tunngatillugu aqutsinermut isumalluutitigut piginnaasatigullu tatisinissaa naatsorsuutigineqarmat. Erseqqissumik malittarisassiornikkut anguniagaqarnikkullu utoqqaat pillugit periusissiami suliniutit siunnersuummi matumani akueriniarneqarput. Tamatuma saniatigut kommuninit aamma utoqqarnut tunngasuni soqutigisaqaqatigiinnit kissaatit assigiinngitsut Naalakkersuisut tigusimasaat siunnersuummi ilanngunneqarput. Tamatuma saniatigut 2024-mi ataatsimoortumik utoqqarnut nutaamik inatsisissatut siunnersuummik saqqummiussinissamut Naalakkersuisut Inatsisartunit peqquneqarsimanerat siunnersuuteqarnermi tunngavigineqarpoq.

Tusarniaaneq pillugu nalinginnaasut
Oqaaseqaataasinnaasut Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfiup mailianut isn@nanoq.gl-imut kingusinnerpaamik ulloq 19. august 2024 nassiunneqassapput.

Naalakkersuisoqarfiup tusarniaanerup taama sivikitsiginera ajuusaarutigaa.

Inussiarnersumik inuulluaqqusillunga
Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik

Ilanngussaq:
1. Uunga siunnersuut: Utoqqaat tapersersorneqarnissaannut Inatsisartut inatsisaat
2. Utoqqaat tapersersorneqarnissaannut inatsisissatut siunnersuummut nassuiaatit