AtuartigukAalisarnermut Piniarnermullu Naalakkersuisoqarfik
Aalisarneq
Aalisarneq nunatsinni inuussutissarsiutit annersaralugulu pingaarnersaraat. Nunatta imartaani aalisakkanik pisuussutit inuiaqatigiinnit pigineqarput. Aalisakkanik pisuussutit aalisarnermut inatsimmik nalunaarutinillu assigiinngitsunik tunngaveqartumik aqunneqarput. Aalisarnermut Piniarnermullu Naalakkersuisoqarfiup immikkoortuata Aalisarnermut immikkoortortaqarfiup Kalaallit Nunaata imartaani aalisarfiit aquppai ingerlallugillu. Kalaallit Nunaanni Aalisarsinnaanermut Akuersissutinik Nakkutilliisoqarfiup (KANUAANA) aalisarnerit nakkutigai misissuiffigisarlugillu.
Asseq: Royal Greenland
Kalaallit Nunaanni aalisarneq
Kalaallit Nunaata sineriaanit aalisarfiusartoq 200 sømilit tungaanut isorartussuseqarpoq. Kalaallit Nunaata aalisarnikkut oqartussaaffigisaa Kitaata Tunullu imartaannut Kujataaniit avammut titarnermik aalisarfimmut aamma Tunumiit avammut aalisarfimmut aggorneqarpoq. Kalaallit Nunaanni inuussutissarsiutigalugu aalisarneq avataasiorluni aalisarnermut sinerissap qanittuanilu aalisarnermut immikkoortitaavoq.
Sinerissap qanittuani aalisarneq: Sinerissap qanittuani aalisarnermi titarneq killigititamiit avammut 3 sømilit tikillugit aalisartoqartarpoq. Sinerissap qanittuani aalisarneq annerusumik kitaani ingerlanneqartarpoq, aammali Tunumi saarullinnut qaleralinnullu aqutsiveqarfeqarpoq.
Sinerissap qanittuani aningaasarsiutigalugu aalisartut amerlanerit qalerallit, raajat, saarulliit, saattuat, nipisaat uillullu aalisartarpaat. Aamma kapisilinnik eqalunnillu aalisartoqarsinnaavoq, taakkuli aningaasarsiutigalugit aalisarneqarneq ajorput.
Sinerissap qanittuani aalisarnermi qassutit aamma ningittakkat annerusumik atorneqartarput aalisarnernilu ataasiakkaani qalorsuit aamma atorneqartarlutik. Sinerissap qanittuani umiatsiaararsorluni aammalu angallatit 75 BRT / 120 BT-iit inorlugit angissusilinnit aalisarneq ingerlanneqarpoq, sumiiffiilli ilaanni ukiuunerani sikumit aalisarnerni qimussit qamuteralaallu atorneqartarlutik. Sinerissap qanittuani saattuarniutit aamma avataasiorlutik aalisarsinnaatitaapput. Avataani aamma sinerissap qanittuani angallatit angissusii apeqqutaatinnagit uiluinniartoqarsinnaavoq.
Avataasiorluni aalisariutit: Avataasiorluni aalisarnermi sinerissamit 3 sømilinit 200 sømilit tikillugit aalisartoqartarpoq. Avataasiorluni aalisarneq kitaani Tunumilu ingerlanneqartarpoq. Nunat illugiillutik aalisarnermut isumaqatigiissutaat naapertorlugit aalisagaqatigiit ataatsimoorunneqartut imartani nunat allat oqartussaaffigisaanni, kiisalu nunat tamalaat imartaanni aamma aalisarneqartarput.
Avataasiorluni aalisarnermi raajat, qalerallit, saarulliit, suluppaakkat kiisalu ikerinnarsiortunik soorlu ammassanik, ammassassuarnik avaleraasartuunillu aalisartoqarnerusarpoq.
Avataasiorluni aalisarnermi qalorsuit atorneqartarput ataasiakkaanilli ningittakkat atorneqartarlutik. Avataasiorluni aalisarnermi aalisariutit 75 BRT/120 BT-nit annerit atorneqartarput.
Kalaallit imartani allani aalisarnerat
Kalaallit avataasiorluni aalisariutaat Savalimmiut, Islandip Norgellu imartaanni aalisagaqatigiinnik aalajangersimasunik aalisarsinnaapput. Nunat allat imartaanni aalisarsinnaaneq pisassiissutillu pillugit ukiut tamaasa Kalaallit Nunaata nunallu pineqartup akornanni isumaqatigiissusiornikkut isumaqatiginninniutigineqartarput.
Nunat allat imartaanni aalisarsinnaanerup saniatigut Kalaallit Nunaat nunat tamalaat imartaanni Kalaallit Nunaata kujataata kitaaniittumi (NAFO-p imartaani) kiisalu Kalaallit Nunaata kujataata tungaaniittumi (NEAFC-p imartaani) aalisarsinnaatitaavoq.
Pisassiissutit aalisarsinnaanermullu akuersissutit.
Nunatsinni aalisarneq pisassiissutit akuersissutillu atorlugit aqunneqarpoq. Avataasiorluni sinerissallu qanittuani aalisarnernut tamanut akuerineqarsinnaasumik pisarisinnaasat annertunerpaaffissaannik (TAC-mik) Naalakkersuisut ukiut tamaasa aalajangersaasarput. Naalakkersuisut TAC aalajangersareerpassuk, Naalakkersuisut.gl-imi tamanut saqqummiunneqartarput. Tamatuma kingorna akuersissutit tunniunneqartarput.
Aalisakkanut ataasiakkaanut akuersissutit assigiinngitsut aammalu angallatit assigiinngitsut
Kalaallit Nunaanni aalisarsinnaanermut akuersissutit piffissamut killiligaasinnaapput killeqaratilluunniit. Piffissamut killilikkat ukiumut ataatsimut atuuttarput pisassiissutillu killeqarlutik. Aalisarsinnaanermut akuersissutit piffissamut killeqanngitsut ukiut tamaasa ukiumoortumik pisassanik ilassuteqarfigineqartarput.
Aalisarsinnaanermut akuersissutit piffissamut killilikkat killilimmik pisassartallit taamaallaat avataasiorluni aalisarnermik ingerlatsisunut tunniunneqartarput. Aalisarsinnaanermut akuersissutit piffissamut killilikkat killeqanngitsumik pisassartallit taamaallaat sinerissap qanittuani aalisarnermik ingerlatsisunut tunniunneqartarput.
Aalisarsinnaanermut akuersissutit piffissamut killiligaanngitsut killilimmik pisassartallit taamaallaat angallammik raajarniarnermik qaleralinniarnermillu ingerlatsisunut tunniunneqartarput.
| Piffissami killigikkami akuersissutit | Piffissami killigaanngitsumi akuersissutit | |||
| Pisassiissutit akuerineqarsinnaasut annerpaaffissaat |
Pisassiissutit akuerineqarsinnaasut annerpaaffissalernagit |
Pisassiissutit akuerineqarsinnaasut annerpaaffissaat |
Pisassiissutit akuerineqarsinnaasut annerpaaffissalernagit |
|
| Angallatit 75 BRT / 120 BT anginerillu |
Aalisagaqatigiit tamaasa raajat minillugit |
Aalisagaqatigiit ataatsimut pisassiissutillit |
Raajat | Aalisagaqatigiit ataatsimut pisassiissutillit |
| Angallatit 75 BRT / 120 BT minnerit 6 meeterillu sinnerlugit takissusillit |
Saattuat | Raajat qalerallillut | ||
| Angallatit 75 BRT / 120 BT minnerit 6 meeterillu sinnerlugit takissusillit |
Alisagaqatigiit tamaasa |
Kalaallit Nunaanni aalisarsinnaanermut piumasaqaatit qinnuteqarnissarlu pillugit paasissutissat allat sullissivik.gl-imi nanisinnaavatit.