Tasiilami aalisarneq pillugu isumasioqatigiinneq, april 2024. Asseq: Aalisarnermut Piniarnermullu Naalakkersuisoqarfik

Tunumi sinerissap qanittuani aalisarnermik inerisaaniarluni maanna sulisoqarpoq. Ineriartortitsinissamut pilersaarut 2024-2030-mut atuuttoq uani suliami ilaatinneqarpoq. Ineriartortitsinissamut pilersaarummi suliniutit arlallit aallartisarneqarput Aalisarnermut Piniarnermullu Naalakkersuisoqarfimmit malitseqartinnissaannut akisussaaffigineqarlutik. Suliniutit taakku ilagaat ilaatigut aalisarneq pillugu isumasioqatigiinneq, aqutsisoqatigiinnik pilersitsineq, suliamik ukiumut nalilersuineq kiisalu atortussanik pisariaqartunik suliaqarneq.

Tunumi aalisartunut immikkut malittarisassat immikkullu akuersissutit atuupput. Tamatumani pineqarput akuersissutinik tunniussisarnernut inuussutissarsiuteqarnissamut tapiissutinut periarfissat. Kalaallit Nunaanni (Tunumi) aalisarsinnaanermut piumasaqaatit qinnuteqarnissarlu pillugit paasissutissat allat sullissivik.gl-imi nanisinnaavatit.