Uunga siunnersuutip tusarniutigineqarnera: Takornariartitsinermik ingerlataqarneq aamma inuussutissarsiutigalugu ingerlatsinermi zonenut immikkoortiterineq il.il. pillugit Inatsisartut inatsisaata allanngortinneqarnera pillugu Inatsisartut inatsisaat (Immikkut akuersissummik pissarsisinnaanerup, nalunaarsuisussaatitaanerup aamma uppernarsaasussaatitaanerup il.il. annertusineqarnerat)

Takornariartitsinermik ingerlataqarneq aamma inuussutissarsiutigalugu ingerlatsinermi zonenut immikkoortiterineq il.il. pillugit Inatsisartut inatsisaata normu 62, 25. november 2025-meersup allanngortinneqarnera pillugu Inatsisartut inatsisissaattut siunnersuut ilanngussatut ilanngunneqartoq Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfiup matumuuna tusarniutigaa.

Inatsit takornariartitsinermik ingerlataqarnermut siunertaanngitsumik akornusiinnginnerussammat imaluunniit assersuutigalugu akuersissutinik tunniussinermi eqquinerlunnginnerussammat, inatsisip atorneqarnera pitsannguuteqarfigissallugu Naalakkersuisut kissaateqarnerat siunnersuuteqarnermi pingaarnertut tunuliaqutaavoq.

Siunnersuummi immikkoortut pingaarnerit

• Piffissap immikkut akuersissuteqarfiusup sivitsorneqarnera. Inatsit atuuttoq malillugu, sivitsuinissamik periarfissalerlugu ukiunut marlunnut immikkut akuersissummik tunniussisoqarsinnaavoq. Inuussutissarsiutillit ikaarsaarnissamut sivisunerusumik piffissaqarnissaminnik pisariaqartitsinerat iliuuseqarfigiumallugu, pingaartumik najukkami tunngavissiinissami imaluunniit nunami piginnittuunernik ineriartortitsinissami aaqqiineq taanna sulisaasermi naammanngitsoq paasinarsivoq.
• Angerlarsimaffik qimallugu allamiinnermi akuersissummik piumasaqaammut ilaatinneqannginneq. Pisut ilaanni immikkut akuersissummik pissarsisinnaaneq inatsimmi atuuttumi periarfissaavoq, ersarissaasoqarnissaali pisariaqartoq paasinarsisimalluni. Pingaartumik pisortani sulinermi, ilinniarnermi, sivisuumik napparsimanermi kiisalu aapparisap imaluunniit inooqatigisap angerlarsimaffik qimallugu allamiinnerani periarfissat nangaassutigineqarsimapput. Isumaliutiginninnerit takutippaat, ersarinnerumik malittarisassiuussineq eqqugaasunut siumut nalunanngereernerusumik, inatsisitigullu isumannaallisaaffigineqarnerunerinik pilersitsissasoq.
• Isumannaallisaanermut, upalungaarsimanermullu suliniutit. Ingerlatat nalunaarsorneqarnissaannut piumasaqaasiornissamut, sillimmasiissuteqarnermillu uppernarsaasoqarnissaanik piumasaqaasiornissamut inatsit atuuttoq malillugu killilimmik periarfissaqarpoq. Takornariartitsinermik ingerlatat ineriartornerisigut, matumani aamma aqqutini navianartuni angallattoqarnerulerneratigut, ullutsinnut naleqqunnerusumik upalungaarsimanissamik pisariaqartitsinerup isumaliutigineqarnissaanik pissutissaqalersimavoq. Aaqqiissutissatut siunnersuutigineqartup kingunerisaanik, zonenut immikkoortiterinermi asimi pisuttuarnissat nalunaarsorneqarnissaannik, asimi pisuttuarnissamut uppernarsaammik pissarsinissamut kiisalu aqqutini ersarinnerusumik toqqakkani angalanermut sillimmasiissummik imaluunniit annaanneqarnissamut sillimmasiissummik atuuttumik uppernarsaasinnaassasut piumasaqaasiortoqarsinnaassaaq.
• Sumiiffinni takornarialerisoqarpallaanngitsuni immikkut ittumik akuersissuteqarnissamut periarfissaq. Sumiiffinni takornarialerisoqarpallaanngitsuni immikkut akuersissummik pissarsinissamut inatsit atuuttoq immikkut periarfissaqartitsinngilaq. Najukkami ineriartortitsineq tapersersorumallugu, takornarialerinissamullu tunngavissaq killeqaraluarpalluunniit takornariartitsinermik ingerlatsisoqarsinnaanissaa qulakkeerumallugu, taamatut periarfissaqarnissaq pisariaqarsinnaavoq. Aaqqiissutissatut siunnersuutigineqartoq sumiiffinni taamak ittumik immikkut akuersissuteqarnissamut periarfissiivoq, kisiannili eqqarsaatigisariaqakkat pillugit Naalakkersuisut ataatsimut eqqarsaatiginnilluarsinnaanerat atatiinnarneqarluni.

Oqaaseqaataasinnaasut kingusinnerpaamik 2026-mi januaarip 25-ani Naalakkersuisoqarfiup tigoreersimassavai, naalakkersuisoqarfiullu pisortatigoortumik e-mailianut isiin@nanoq.gl-imut, assilineranillu ilisimatitsissutitut lael@nanoq.gl-imut nassiuteqquneqarlutik. Imaluunniit uunga:

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfik Postboks 1601