Parisimi isumaqatigiissummi nunap immikkoortuanut nangaassuteqarnermik atorunnaarsitsinissaq pillugu tusarniaaneq
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup matumuuna Inatsisartut 2023-mi upernaakkut ataatsimiinnissaannut Parisimi isumaqatigiissummi nunap immikkoortuanut nangaassuteqarnermik atorunnaarsitsinissaq pillugu aalajangiiffigisassatut tusarniaassutigalugit nassiuppai.
Nassuiaat
Siunnersuuteqarnerup kingunerisaanik Naalakkersuisut Parisimi isumaqatigiissummi Kalaallit Nunaannut nunap immikkoortuanut nangaassuteqarnermik atorunnaarsitsinissaq pillugu danskit naalakkersuisuinut nalunaaruteqarnissamut aamma Naalagaaffiit Peqatigiit Silap Pissusianut Isumaqatigiissuteqarfiusumut nalunaaruteqarnissamut pisussaaffilerneqassapput.
Naalakkersuisoqatigiinnermut isumaqatigiissut tunngavigalugu 2022-mi apriilimiit 2023-mi januaarimut kingunerisassanik misissueqqissaartoqarpoq.
Kingunerisassanik misissueqqissaarneq nalunaarusiamut pingaarnermut aamma tunuliaqutassatut nalunaarusiamut avinneqarpoq, taakkulu Parisimi isumaqatigiissut tunngavigalugu Kalaallit Nunaat nunap immikkoortuanut nangaassuteqarnermik atorunnaarsitsisoqassappat sunik pisussaaffilerneqassanersoq, kiisalu inuiaqatigiit kalaallit qanoq iliorlutik silap pissusianut sunniutiminnik annikillisitsisinnaanersoq pillugu misissueqqissaarnermut nassuiaatinik imaqarput.
Misissueqqissaarneq Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup aamma Ea Energianalyse-p Naalakkersuisoqarfinniit, Poul Schmith/Kammeradvokaten-imiit aamma Mind Your Buisiness-imiit kapitalit isumassarsiorfigalugit nalunaarusiamut ataatsimoortumut katersuinissamut aaqqissuussinissamullu akisussaasuusimavoq, kingulliullugulu taaneqartoq inuussutissarsiortuniit ilanngussanik katersuisuusimalluni.
Poul Schmidt/Kammeradvokaten misissueqqissaarnermut atugassatut inatsisinut tunngassuteqartut pillugit allakkiorpoq, tassanilu nangaassuteqarnermik atorunnaarsitsinissamut atatillugu inatsisitigut pisussaaffissat naliliiffigineqarput.
Kammeradvokaten naliliivoq, nunap immikkoortuanut nangaassuteqarnermik atorunnaarsitsinissami, Kalaallit Nunaat isumaqatigiissummi siunertaasut angunissaat siunertaralugu nunami namminermi annikillisitsissutissanik ('Nationally determined contributions' imaluunniit 'NDC') pimoorussiffiusumik suliaqarnissaq, nalunaaruteqarnissaq atuutsitsinissarlu inatsisitigut pisussaaffigissagaa.
Kammeradvokaten naliliivoq, Kalaallit Nunaata danskit naalakkersuisui suleqatigalugit Kalaallit Nunaanni silap pissusianut suliniutissat immikkoortut pillugit Silap Pissusianut Isumaqatigiissummut allattoqarfimmut nalunaaruteqarsinnaanissamut periarfissanik ujartuinissaq NDC-mut najoqqutassiarineqarsinnaasoq. Taamaalilluni Kalaallit Nunaanniit NDC NDCmut, Danmarkip EU aqqutigalugu nalunaarutigisariigaanut tapiliunneqarsinnaavoq. Tamanna pissutigalugu Danmarkimi nunami namminermi annikillisitsissutissatut aalajangersarneqartut apeqqutaatinnagit,
Kalaallit Nunaat Kalaallit Nunaannut NDC-mik immikkoortumik suliaqartassaaq. Aamma Kammeradvokaten naliliivoq, Kalaallit Nunaanni nunami namminermi annikillissutissatut aalajangerneqartunut immikkoortut aalajangersimasut, soorlu aatsitassarsiorneq umiarsuillu angallannerat ilaatinngitsoorneqarsinnaasut.
Tusarniaanermut killigititaq
Tusarniaanermi akissuteqaatit kingusinnerpaamik 06.03.2023-mi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmut nassiuteqquneqarput. Tusarniaanermi akissuteqaatit Naalakkersuisoqarfiup pisortatigoortumik e-mailadressianut nassiuteqquneqarput, uunga: pan@nanoq.gl