Uunga siunnersuut pillugu tusarniaaneq: Inuussutissarsiutiginagu kapisilinniarneq aamma inuussutissarsiutigalugu kapisilinniarnermi nalunaaruteqartarneq pillugit Namminersorlutik Oqartussat nalunaarutaat

Aalisarsinnaanermut akuersissutit aamma aalisarnermut pisassiissutit pillugit Namminersorlutik Oqartussat nalunaarutaata akuerineqarneratigut kapisilinniarneq pillugu siusinnerusukkut nalunaarut atorunnaarsinneqarpoq.

Amigaat taanna kapisilinniarnerup malittarisassiorneqarneranut naleqqutinngitsumik kinguneqaannanngilaq, aammali Kalaallit Nunaata NASCO-mi ilaasortatut nunat tamat akornanni pisussaaffimminik eqqortitsinissaanut akornutaavoq.

Taamaammat nalunaarummi nutaami siunertaq tassaavoq kapisilinniarnermut piginnaatitsinermut maannamut tunngaviup nalunaarutini atuuttuni aalisarneq pillugu inatsimmi aalajangersakkanik atuutilersitsiviusuni ingerlateqqinneqarnikuunngitsup atuutilerseqqinneqarnissaa.

Taamaammat malittarisassat nutaat atuutilersinneqarnerat pineqanngilaq, kisiannili malittarisassanik siorna kapisilinniarnermi atuuttunik ingerlateqqinneqarsimassagaluartunillu ingerlatitseqqiineq atuutilersitseqqinnerlu pineqarlutik.