Uunga siunnersuut: Aatsitassat aatsitassarsiorluni misissuinissamut akuersissutini ilaatinneqartut pillugit Namminersorlutik Oqartussat nalunaarutaat nr. xx, xx. xxx 2024-meersoq
Matumuuna ”Uunga siunnersuut: Aatsitassat aatsitassarsiorluni misissuinissamut akuersissutini ilaatinneqartut pillugit Namminersorlutik Oqartussat nalunaarutaat nr. xx, xx. xxx 2024-meersoq” tusarniaassutigalugu nassiunneqarpoq.
Tunngaviusoq siunertaalu
Sumiiffinni aatsitassanut tunngasunik suliaqarneq pillugu Inatsisartut inatsisaat malillugu aatsitassarsiorluni misissuinissamut akuersissutini pineqartunut ilaasuni aalajangersimasumik najugaqartut aatsitassanik aalajangersimasunik katersinissamut piiaanissamullu periarfissaqarnerat, nalunaarummi siunnersuutigineqartumi qulakkeerneqassaaq.
Najukkani aatsitassanut tunngasunik suliaqarnerit pillugit Inatsisartut inatsisaanni aalajangersimasumik najugaqartut tamatumunnga akuersissummik peqaratik aatsitassanik piiaanissamut periarfissaannik annertusititsisimaneq, nalunaarummut siunnersuutigineqartumut tunngavigineqarpoq. Inatsimmi tassani suliniutissat ilagaat, sumiiffinni aatsitassanut tunngasunik suliaqarneq pillugu Inatsisartut inatsisaat malillugu aatsitassarsiorluni misissuinissamut akuersissummi pineqartunut ilaasuni, aalajangersimasumik najugaqartut aatsitassanut tunngasunik suliaqarnissamut periarfissaqalernerat. Taamaalilluni najukkani aatsitassanut tunngasunik suliaqarnerit pillugit Inatsisartut inatsisaat malillugu, sumiiffinni aatsitassanut tunngasunik suliaqarneq pillugu Inatsisartut inatsisaat malillugu aatsitassarsiorluni misissuinissamut akuersissummi pineqartunut ilaasuni, aatsitassat akuersissummi pineqartunut ilaasimanngippata, aalajangersimasumik najugaqartut aatsitassanik piiaasinnaalerput.
Ikummatissiassat aamma aatsitassat qinngornernik ulorianartunik akullit eqqaassanngikkaanni, aatsitassat tamarmik, aatsitassanut tunngasunik suliaqarneq pillugu Inatsisartut inatsisaat malillugu aatsitassarsiorluni misissuinissamut akuersissummi, maannamut pineqartunut ilaatinneqarsimapput. Aalajangersimasumik najugaqartut aatsitassanut attuumassutilimmik inuussutissarsiornissaannik tapersiinissaq siunertaralugu, aalajangersimasumik najugaqartut, sumiiffinni aatsitassarsiorluni misissuinissamut akuersissutini pineqartunut ilaasuni, aatsitassanik aalajangersimasunik inuussutissarsiutini taakkunani immikkut pingaaruteqartunik, piiaanissamut periarfissinneqarnissaat, Naalakkersuisut kissaatigaat.
Aatsitassat aatsitassarsiorluni misissuinissamut akuersissutini pineqartunut ilaasut pillugit nalunaarummut siunnersuummi matumani, ujaqqat pinnersaasiassat aammalu aatsitassat katersorneqartartut, aatsitassani aatsitassarsiorluni misissuinissamut akuersissutini pineqartunut ilaasuni, ilaatinneqanngillat. Tamanna isumaqarpoq, siunissami aalajangersimasumik najugaqartut sumiiffinni, aatsitassanut tunngasunik suliaqarneq pillugu Inatsisartut inatsisaat malillugu aatsitassarsiorluni misissuinissamut akuersissutini pineqartunut ilaasuni, taamaallaat aatsitassanik taakkuninnga piiaanissamut periarfissaqalersut.
Aatsitassat nalunaarummi pineqartunut ilaasut, aatsitassarsiorluni misissuinissamut akuersissutip ataani misissugassatut tiguneqarsinnaanerannut, nalunaarut akornusiissanngilaq. Taamatullu aatsitassarsiorluni misissuinissamut akuersissutip ataani aatsitassat pineqartunut ilaatinneqartut pillugit misissueqqissaartoqarsinnaalluni. Taamaattoq aatsitassanik pineqartunut ilaasunik ataatsimik arlalinnilluunniit peqarfiit piiaavigineqarsinnaasut paasinarsisinneqarnerat tunngavigalugu, piiaanissamut akuersissummik tunniussisoqarsinnaassanngilaq.
Aatsitassat pineqartunut ilaatinneqartut ilaatigut tassaapput ujaqqat pinnersaasiassat, aalajangersimasumik najugaqartunut pingaarutillit, ilaatigut aatsitassat katersorneqartartut, annertuumik niuerutigisassatut piiaarneqarsinnaasussaanngitsut.
Malugiuk aligoqqiit ujaqqanut pinnersaasiassanut allattukkani ilanngunneqanngimmata. Tamatumunnga pissutaavoq, aalajangersimasumik najugaqartut ingerlatassaat 1 meterimik itissusilimmi ingerlanneqartussatut killilerneqarmat, aammalu aligoqqiit nunap qaavanut taama qanitsigisumi takussaasannginnerat. Aamma malugiuk, kuultit aamma allattukkani ilanngunneqanngimmata, tassami taakkua suliffissuaqarnermut atatillugu aatsitassatut atorneqartuupput, annertunerusumillu niuerutigisassatut piiarneqarsinnaallutik. Sumiiffinni aatsitassarsiornissamut akuersissutini pineqartunut ilaatinneqanngitsuni imaluunniit najukkani aatsitassanut tunngasunik suliaqarnerit pillugit Inatsisartut inatsisaat malillugu allatigut killilersuiffigineqartuni, taakkua allattuiffimmi ilaatinneqanngikkaluartut, aalajangersimasumik najugaqartut aatsitassat taakkua piiarsinnaavaat.
Kiisalu erseqqissarneqarpoq, nalunaarut taamaallaat akuersissutinut, nalunaarutip atuutilereernerata kingorna tunniunneqartunut, taamaallaat atuutissammat. Aammalu aatsitassat allat, nalunaarummi allattorneqarsimasuniinngitsut, aatsitassanut tunngasunik suliaqarneq pillugu Inatsisartut inatsisaat malillugu aatsitassarsiorluni misissuinissamut akuersissutini pineqartunut ilaanngissinnaapput. Ikummatissiassat aamma aatsitassat uranimik il. il., misissueqqaarnermut, ujaasinermut piiaanermullu inerteqquteqarneq pillugu Inatsisartut inatsisaanni pineqartunut ilaasut, aamma aatsitassarsiorluni misissuinissamut akuersissutini nutaani pineqartunut ilaatinneqassanngillat.
Killigititaq
Tusarniaanermut akissuteqaat nassiuteqquneqarpoq uunga asn@nanoq.gl assilinera uunga bosd@nanoq.gl kingusinnerpaamik 18. oktober 2024.