Greenland Anorthosite Mining-ip anorthosit-inut suliassaanut VSB-imut aamma VVM-imut nassuiaatit tusarniaassutigineqarnerat

Suliassap killiffia

Tusarniaanermut najoqqutassat:
Greenland Anorthosite Mining A/S aatsitassarsiorluni misissuinissamut akuersissummut 2019-162-imut Kalaallit Nunaata kitaani Qeqertarsuatsiaat avannamut kangiani inissisimasumut pisinnaatitsissummik pigisaqartuuvoq. Ingerlatseqatigiiffik sumiiffimmi piiaanissamut akuersissummik qinnuteqarpoq.

Naalakkersuisut.gl-imi tusarniaanermut najoqqutassat tamanut saqqummiunneqarnerat isumaqanngilaq Naalakkersuisut najoqqutassat inaarutaasumik akuerisimagaat.

Tusarniaanermut najoqqutassat tassaapput allakkiat matuma kinguliani allattorneqartut:

1. Inuiaqatigiinni Piujuartitsiviusumik ingerlatsinissamut nalilersuinermut nassuiaammut missingiut (VSB) GL
2. Avatangiisinut Sunniutaasussanik Nalilersuinermut nassuiaammut missingiut (VVM) GL
3. Inuiaqatigiinni Piujuartitsiviusumik ingerlatsinissamut nalilersuinermut nassuiaammut missingiut (VSB) DK
4. Avatangiisinut Sunniutaasussanik Nalilersuinermut nassuiaammut missingiut (VVM) DK
5. Inuiaqatigiinni Piujuartitsiviusumik ingerlatsinissamut nalilersuinermut nassuiaammut missingiut (VSB) ENG
6. Avatangiisinut Sunniutaasussanik Nalilersuinermut nassuiaammut missingiut (VVM) ENG

Nassuiaatit tamarmik immikkut tekniskiunngitsumik eqikkaanermik aallarnerneqarput.

Aammattaaq ingerlatseqatigiiffiup VVM- imut nassuiaatinut nalunaarusiat tunngavigineqartut nammineq nittartakkamini tamanut saqqummiuppai. Inussiarnersumik takuuk linki.

Inuiaqatigiinni Piujuartitsiviusumik ingerlatsinissamut nalilersuinermut (VSB) ilaatigut siunertaavoq, oqartussat akuersissummut aamma suliassap siunnersuutigineqartup akuerineqarnissaanut piumasaqaatinik aalajangersaanissamut paasissutissanik pisariaqartunik tamaginnik pissarsitinnissaat siunertaralugu, suliassap inuiaqatigiinnut tunngasunut atuutereersunut sunniinissaannik nalilersuinissaq. VSB-imut siunertaasoq alla tassaavoq, taassuma Namminersorlutik Oqartussat, Kommuneqarfik Sermersuup aamma ingerlatseqatigiiffiup akornanni Impact Benefit Agreement (IBA) isumaqatinninniutigineqarnissaanut tunngavissaliinissaa.

Avatangiisinut sunniutaasussanik nalilersuinermut (VVM) ilaatigut siunertaavoq, suliassap avatangiisinut, pinngortitamut aamma silap pissusaanut sunniutissaattut naatsorsuutigineqartut (avatangiisinut sunniinissaq) kiisalu pitsaaliuilluni suliniutissat suut (iliuusissat) ingerlatseqatigiiffiup avatangiisinut sunniisinnaanerup killilernissaanut atussallugit pilersaarutiginerai, nassuiarneqarnissaat. Akuersissummut aamma suliassap siunnersuutigineqartup akuerineqarnissaanut piumasaqaatit aalajangersarnissaannut, nassuiaat oqartussanut paasissutissanik pisariaqartunik tamaginnik paasissutissiissaaq.

Tusarniaalluni ataatsimiititsinerit:
Piffissap tusarniaaffiusup ingerlanerani illoqarfinni nunaqarfinnilu immikkut kalluarneqartussani tusarniaalluni ataatsimiititsinernik aaqqissuussisoqassaaq. Taamaattumik illoqarfinni nunaqarfinnilu matuma kinguliani allassimasuni tusarniaalluni ataatsimiititsinernik aaqqissuussisoqassaaq, taakkunani innuttaasut nalinginnaasumik suliassamut, pingaartumillu tusarniaanermut najoqqutassanut, apeqquteqarnissamut periarfissinneqassallutik.

Ataatsimiinnermi ingerlatseqatigiiffimmit aallartitat aammalu makkua peqataassapput:

• Kommuneqarfik Sermersuup borgmesteria, Avaaraq S. Olsen
• Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen
• Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund

Tusarniaanermut piffissamut killigititaq: Ulloq 19. februar 2025.

Tusarniaanermut akissuteqaatit Aatsitassanut Ikummatissanullu Aqutsisoqarfimmut nassiunneqassapput uunga, mlsa@nanoq.gl.