AtuartigukNaalakkersuisut Siulittaasuata Naalakkersuisoqarfia
Akissarsiaqartitsisarneq pillugu politikki
Namminersorlutik Oqartussat ingerlatseqatigiiffiutaanni siulersuisut akissarsiaqartinneqarnerat pillugu politikki Naalakkersuisut Namminersorlutik Oqartussat aktiaateqarluni ingerlatseqatigiiffiutaanni akissarsiaqartitsisarnermut politikkiat pillugu kaajallaasitami aalajangersagaavoq.
Kaajallaasitaq Namminersorlutik Oqartussat inatsisinik nalunaarutaanni nalunaarutit.gl-imi atuaruk.
Namminersorlutik Oqartussat ingerlatseqatigiiffiutaannik piginnittutut suliaqarnermi, Namminersorlutik Oqartussat piginnittutut soqutigisaannik pitsaasumik ingerlatsinissamik pitsanngorsaasinnaasunik aqutsisoqarnissaasa qulakkeernissaat pingaaruteqarluinnarpoq. Mianerisassat taakku assut pingaartinneqartut ilagaat, siulersuisut sulinerminnut naammaginartumik taarsiissutinik pissarsisarnissaat taamaaliornikkut ilaasortat piginnaasaqarluartut pikkorissullu pigiinnarneqarsinnaallutillu ilaasortat nutaat pigiinnarneqarsinnaassammata.
Akissarsiaqartarneq pillugu politikkeqarnermi tunngaviit pingaarnerit tassaapput:
- Siulersuisut inuussutissarsiutip suunerata aamma sulinerup annertussusiata kiisalu ingerlatseqatigiiffiup inissisimanerata malitsigisaanik nalinginnaasutut isigineqarsinnaasunit akissarsiaqarnerussanngillat.
- Akissarsiat qaffasissusiat siulersuisut akisussaaffiini, piginnaasaanni aamma piffissamik atuineranni takussuserneqassasut, taamaaliornikkut akissarsiat qaffasissusiat naammaginartoq unammillersinnaasorlu pigiinnarneqarsinnaammat. Akissarsialli qaffasinnerpaassanngillat.
- Siulersuisunut akissarsiat aalajangersarnerannut atatillugu ingerlatseqatigiiffinni allani assersuunneqarsinnaasuni akissarsiat qaffasissusaat paasiniarneqassapput.
Namminersorlutik Oqartussat ingerlatseqatigiiffiutaanni akissarsiaqartitsisarnermut takussutissaq:
| Ingerlatseqatigiiffik | Siulersuisoq | Siulersuisup tullia / kukkunersiuinermut ataatsimiititaliami siulersuisoq | Ilaasortaq |
| Kalaallit Airports | 719.000 | 333.000 | 222.000 |
| Royal Greenland | 553.000 | 333.000 | 222.000 |
| KNI | 387.000 | 193.000 | 138.000 |
| Air Greenland | 365.000 | 193.000 | 138.000 |
| Royal Arctic Line | 365.000 | 193.000 | 138.000 |
| Tusass | 365.000 | 193.000 | 138.000 |
| INI | 365.000 | 193.000 | 138.000 |
| Nalik Ventures | 365.000 | 193.000 | 138.000 |
| NunaGreen | 518.000 | 193.000 | 138.000 |
| Sikuki Harbour | 166.000 | 83.000 | 55.000 |
| Visit Greenland | 166.000 | 83.000 | 55.000 |
| Great Greenland | 166.000 | 83.000 | 55.000 |
| Illuut | 166.000 | 83.000 | 55.000 |