Tunngaviusumik inatsisiliornissamut immikkoortortaqarfik nammineq aalajangiisinnaaneq aamma Tunngaviusumik inatsisit aamma nunatta oqartussaanera pineqartillugit Namminersorlutik Oqartussat immikkoortortarisarpaat. Tamatuma saniatigut Immikkoortortaqarfik suliassaqarfimmini misissueqqissaarinissanik suliarineqartunik akisussaasuullunilu Nunani Avannarlerni oqallittarfiuvoq attaveqaataallunilu, tamatumani sammisat tassaallutik nammineq aalajangiisinnaaneq nunattalu oqartussaanera.

Tunngaviusumik inatsisiliornissamik isumalioqatigiissitami suliassat 2021-p naanerani allanngortinneqarneranni Immikkoortortaqarfimmi maannakkut siunissami suliassat tassaalerput Tunngaviusumik inatsisiliornissamik isumalioqatigiissitap Tunngaviusumik inatsisiliornissamik missingiut tamanut saqqummiuppagu innuttaasut peqataatinneqarnissaat isumagineqassaaq.

Tunngaviusumik inatsisissatut missingiummut tunngatillugu innuttaasunik peqataatitsinissaq marloqiusaavoq: ilaatigut innuttaasut tunngaviusumik inatsisissatut missingiummik ilisimatissallugit ilaatigullu tunngaviusumik inatsisissatut missingiut pillugu oqallisissallugit, taamaalillutik innuttaasut missingiummik piginnittutut misigitilerlugit, tamatuma innuttaasunut taasissutigitinneqannginnerani.

Tunngaviusumik inatsisiliornissamut immikkoortortaqarfiup Naalakkersuisut Naalakkersuisoqarfiillu naalagaaffimmit akisussaaffeqarfissanik nutaanik naleqquttunik tigusinissamut aporfiusinnaasunik periarfissanillu qulaajaaqataaffigisarpai, taamaalilluni taamak ittunik tigusinerit tulleriiaarinermik piareersarluakkamillu tunngaveqarluni piniassammata.

Immikkoortortaqarfik aamma Facebookikkut qupperneqarpoq imatut taagorneqartumik ’Siuarsaaqatigiitta sammen former vi fremtiden’, tamatumani innuttaasorpassuit ataatsimoortinneqarnissaat, oqallinneq pillugu qaammarsaanerit siuarsaanerillu kiisalu tunngaviusumik inatsisip ataatsimut isigalugu paasineqarnissaa siunertarineqarpoq.