Naalakkersuisut Siulittaasuata Naalakkersuisoqarfia

Air Greenland A/S
Namminersorlutik Oqartussat Kalaallit Nunaanni ataqatigiissumik angallannikkut aqqutit qularnaarneqarnissaat ersarissumik soqutigisaraat matumanilu Air Greenland silaannakkut aqqutit atorlugit angallassinermi aalajangiisuusumik inissisimavoq. Air Greenland ataatsimut isigalugu Nunatsinni, Nunatsinnut Nunatsinniillu ataqatigiissumik silaannakkut angallassisarnermut, coronap ajornartoortitsinerani ersersinneqartumik pingaaruteqarluinnartutut nassuiarneqarsinnaavoq.

Air Greenland niuerfittut sumiiffinnilu annaasaqarfiusartuni ingerlavoq.

Kiffartuussinissamut isumaqatigiissuteqarfiusuni ilaasunik angallassisarneq eqqaassanngikkaanni, Air Greenland ingerlatseqatigiiffittut niuerfittut taamaallaat ingerlavoq. Air Greenlandip ilaasunik qulimiguulinnik angallassisarnera aamma Qaanaamut suluusalinnik aqqut kiisalu peqqinnissaqarfimmi King Airimik ingerlatsisarneri tapiissuteqartarnikkut taamaallaat ingerlanneqarput. Taamaattumik aqqutini taamaallaat kiffartuussinissamut isumaqatigiissuteqarfigisani Naalakkersuisut ilaasunik angallassisarnerit akulikissusaannik toqqaannartumik nakkutilliisinnaapput.

Air Greeenlandip nunatsinni angallassisarnera najukkami kisermaassinertut taaneqarsinnaavoq, tassa imaappoq niuerfiup angissusaa nunamilu inissisimaffia eqqarsaatigalugit pisortanit tapiissuteqartoqartinnagu imminut akilersinnaanngilaq ingerlatsisumullu ataasiinnarmut tunngavissiisinnaalluni. Taamaattumik najukkami niuerfimmit aallaaviatigut ingerlatseqatigiiffimmik ataatsimit amerlanerusut tapersersorneqarsinnaannginnerat kisermaassinermut pissutaavoq.

Nunanut allanut aqqutit tunngaviusumik unammillerneqaqqapput, tamatumunngalu Icelandairip Nuummut, Ilulissanut, Kulusummut Narsarsuarmullu angallassisarnera ilaatigut assersuutigineqarsinnaavoq.

Air Greenland ingerlatseqatigiiffiutigisaqarpoq ingerlatseqatigiiffissuullu naleqarnerulersitsisarneranut pingaaruteqarluinnartuupput: Grønlands Rejsebureau, Hotel Arctic, World of Greenland aamma Arctic Excursions.

airgreenland.dk

Great Greenland A/S
Pingaarnertut isigalugu Kalaallit Nunaanni innuttaasut piniarnermik kulturiannik attassiinnarnissamik tapersersuinissamillu kissaateqarnermit Namminersorlutik Oqartussat piginnittuunerat tunngavilersorneqarsinnaavoq. Great Greenlandimik piginnittuunermi taamaalilluni piniarnermik inuussutissarsiornerup attannissaanut aningaasatigut tunngavimmik qulakkeerinikkut sulisoqarnikkut suliniuteqarnissaq tunngaviuvoq. Tamatuma saniatigut puisip amii nunanut allanut nioqqutigineqarput kalaallillu kulturikkut tunisassiaannik nittarsaassinerullutik tassuunakkullu Kalaallit Nunaannut ilisimasaqarnermik soqutigisaqarnermillu siuarsaaqataallutik.

greatgreenland.com

Illuut A/S
Kalaallit Nunaanni Namminersorlutik Oqartussat sanaartornermik suliniutinut aktiaateqarluni ingerlatseqatigiiffikkut qularnaveeqqusiissutitalimmik taarsigassarsisinnaaniassammata Illuut pilersinneqarpoq. Taamaattumik ingerlatseqatigiiffik inissianik sanaartornernut il.il. aningaasalersuinikkut tunngaviusumik sakkussiaavoq.

illuut.gl

INI A/S
INI-p Namminersorlutik Oqartussanut nunatsinnilu kommuninut amerlanerusunut inissianik attartortitsisarneq isumagisaraa. Taamaattumik inissiat INI-mit pigineqanngillat.

Piginnittuunermi pingaarnertut anguniarneqartoq tassaavoq, Kalaallit Nunaanni inissianik attartortittakkanik niuerfimmi pissarsisinnaanerup qulakkeernissaa, matumani Namminersorlutik Oqartussat inissiaatinik pigisaasa ineriartorneranni inissianik piumasaqarnermi ineriartornermut malinnaatinneqassasoq ilanngullugu, tassa imaappoq, Namminersorlutik Oqartussat inissiaatat ingerlaavartumik illoqarfinnut anginerusunut nuuttarnermut qaffakkaluttuinnartumut kiisalu pingaarnertut immikkoortumi pilersaarutit suliassaqarfimmut ilaasut naleqqussarneqartariaqarput.

INI-p Namminersorlutik Oqartussat sinnerlugit aqutsinermik isumagisaqarnera oqartussat suliassaattut taaneqarpoq.

ini.gl

Kalaallit Airports Holding A/S
Kalaallit Airportsimik ingerlatseqatigiiffissuaq nunatsinni pisortat mittarfeqarfiinik qulimiguulinnullu mittarfinnik tamanik, ingerlatseqatigiiffiutigisat Mittarfeqarfiit A/S, Kalaallit Airports International A/S aamma Kalaallit Airports Domestic A/S aqqutigalugit ingerlatsisuuvoq.

Mittarfeqarfiit inuiaqatigiinni suliat attanneqarsinnaanissaannut pingaaruteqarluinnarput, tassami inuiaqatigiit attaveqaasersuutinik pingaaruteqarluinnartunik peqanngippata innuttaasunut nioqqutissanik sullissinernillu pilersuinerit pisariaqartilluinnagaat tunniunneqarsinnaanngimmata. Kalaallit Nunatta nunataa nunassittarnerillu eqqarsaatigalugit umiarsuarneq eqqaassanngikkaanni timmisartumik angalanissaq kisiat periarfissaavoq. Tamatuma kingunerisaanik mittarfinnik qulimiguulinnullu mittarfinnik ingerlatsinerit attaveqaatitut pingaaruteqarluinnartuupput naalakkersuinikkullu isiginiarneqarluinnarlutik.

Ingerlatseqatigiiffik maannakkut Nuummi, Ilulissani Qaqortumilu mittarfinnik nutaanik sanaartorpoq, taakkulu atulerunik oqaluttuarisaanermi Kalaallit Nunaannut, Kalaallit Nunaannit Kalaallillu Nunaanni assartuinermi aqqutit allanngussapput. Mittarfinnik sanaartornermi angallannikkut aaqqissugaaneq unammilleqatigiiffiusinnaanerusoq, angallassinermi tamakkiisumik aningaasartuutit ikinnerulersinnissaat aammalu innuttaasunut, inuussusissarsiornermut aamma takornariaqarnikkut ineriartortitsinermut, ullutsinni angallannikkut aningaasartuutit qaffasinnerujussuisigut killilersugaasunut nunatsinnilu angallannernut piffissamik annertuumik atuiffiusunut ajornakusoortunullu iluaqutaasussamik billetit akiinik appaanissaq anguniagaapput.

kair.gl

KNI A/S
KNI-mi piginnittuunermi Kalaallit Nunaat tamakkerlugu nioqqutissanik orsussamillu pilersuinerup qulakkeerneqarnissaa siunertaavoq. Namminersorlutik Oqartussat KNI-imi piginnittuunermikkut Kalaallit Nunaanni nunaseriaatsinut naapertuuttumik pilersuinissamut qulakkeerinissamik periarfissaqarput.

Ingerlatseqatigiiffissuaq KNI niuernermi pingasunik immikkoortortaqarpoq, Kalaallit Nunaanni suliassanik pingaarutilinnik isumagisaqartoq.

Nioqqutissalerisoqarfik pingaarnertut pingasunik ingerlataqartoq, taakkunannga ataaseq kiffartuussinissamik isumaqatigiissuteqarfiusoq, nunami killeqartumi nioqqutissanik pilersuinissamik ingerlatseqatigiiffimmut pisussaaffiliisoq kiisalu nioqqutissanut aalajangersimasunut akitigut ineriartortitsinissaq nakkutigineqarluni. Kiffartuussinissamut isumaqatigiissummit aningaasat nunaqarfinni pisiniarfinnut atugassanngorlugit immikkoortitaapput. Kiffartuussinissamut isumaqatigiissummi illoqarfiit akiliuteqartarnermut ilaanngillat, kiffartuussinissamilli isumaqatigiissummi ilaasunik piumasaqaatinik allanik pisussaaffeqarlutik. Nioqqutissalerisoqarfimmi ingerlatat allat marluk tassaapput illoqarfinni sisamani niuertarfiit kiisalu KNI Engros. Taakku niuernikkut ingerlanneqarput killilersugaanngitsumik akinik aalajangiiffigineqartarlutik.

PolarOil marlunnik pingaarnerusunik ingerlataqartoq, aappaa kiffartuussinissamik isumaqatigiissuteqarfiusoq pisussaatitsivorlu ingerlatseqatigiiffik Kalaallit Nunaanni najukkanut tamanut ikummatissanik pilersuissasoq akillu assigiissasut, matumani mittarfiit, sakkutooqarfiit assigisaallu minillugit. Nukissiornermik immikkoortuni pingaarnertut ingerlatap aappaa tassaavoq killilersorneqanngitsumik akinik aalajangiiffiusumi niuerneq tassaniillutillu aalisariutinut, mittarfeqarfinnut assigisaanullu orsussanik pilersuineq.

Neqi kiffartuussinissamik isumaqatigiissut tunngavigalugu ingerlanneqarpoq, Kujataani nunalerinermik inuussutissarsiutip tunitsivissatigut periarfissaanik qulakkeerinissamut nunalerinermilu tunisassianik suliareqqiinermik qulakkeerinissamik siunertaqartoq. Ingerlatseqatigiiffik Kujataani savaateqarnermik inuussutissarsiornerup attannissaanut sakkussatut atorpoq.

kni.gl

Nalik Ventures A/S
Nalik Venturesip Kalaallit Nunaanni inuussutissarsiornerit siuarsarnissaannut soqutigisat tapersersussavai ingerlatallu annaasaqarfiusinnaasut ataatsimoorussat assigisaalu aqqutigalugit inuussutissarsiutinut siuarsaasutut atuutissalluni.

Nalik Ventures A/S-ip ingerlatai ilaatigut tassaapput suliffeqarfinni pilersaarutinilu ineriartornissamut periarfissarissaartuni, aningaasaatinillu pilersorneqarnissamik pisariaqartitsisuni siunnersuineq aningaasaliisarnerlu. Ingerlatseqatigiiffiup suliffeqarfiit periarfissanik taakkuninnga iluaquteqarsinnaanerannut piviusunngortitsisinnaanerannullu tunngavissiivoq. Aammattaaq aaqqissuussinerit pineqartut siunertaannut naapertuuttumik maannakkut siunissamilu suliatigut suleqatigiiffinnit ingerlatseqatigiiffik ingerlatitseqqittarluni.

Taakku saniatigut Nalik Ventures A/S aallarnisaasartunut il.il. tapiissuteqartarnikkut inuussutissarsiutinik inerisaanerup iluani ingerlataqarpoq. Ingerlatseqatigiiffiup suliassaraa nalinginnaasumik inuussutissarsiutitigut siunnersuinissaq aamma aallarnisaasuniit aningaasatigut tapiiffigineqarnissamik ilitsersuunneqarnissamillu pisariaqartitsisuniit qinnuteqaatinik suliarinnittarluni.

nalik.gl

NunaGreen A/S
NunaGreen Nuummi erngup nukinganik nukissiorfiit allilernissaannut tamakkiisumik ilaannakortumilluunniit aningaasalersuinissamut aamma Aasianni Qasigiannguanilu pilersuinissamut erngup nukinganik nukissiorfimmik pilersitsinissamut akisussaasussatut toqqarneqarsimavoq. Suliniutit Nukissiorfiit namminersortitatut pilersuinermik suliffeqarfiusoq qanimut suleqatigalugu ingerlanneqarput.

NunaGreenip tamatuma saniatigut siunertaraa Namminersorlutik Oqartussat nukissiuutinut nutarterneqarsinnaasunut tunngatillugu aningaasaqarnikkut soqutigisaannik aamma Kalaallit Nunaannut iluaqutaasumik nukissiuutinut nutarterneqarsinnaasunut tunngatillugu immikkut ilisimatusarnissamik aamma 100%-ingajammik imminut pilersorsinnaalernissap avammullu niuernissamik isumaginninnissaq.

Tassunga NunaGreenip Namminersorlutik Oqartussat nukissiuutinik nutarterneqarsinnaasunik piiaanermut aamma Kalaallit Nunaanni avataanilu ineriartortitsinermik sulianut, tassunga ilanngullugit nukissiuutinik nutarterneqarsinnaasunik avammut tamakkiisumik ilaannakortumilluunniit niuernermut tassungalu atasunik sulianut peqataaneranik isumaginnittuussaaq.

nunagreen.gl

Royal Arctic Line A/S
Royal Arctic Line Namminersorlutik Oqartussanit pisinnaatitsissut aqqutigalugu nioqqutissanik Kalaallit Nunaannut, Kalaallit Nunaannit Kalaallillu Nunaanni assartuinissamut kisermaassisuuvoq, tamannalu pissutigalugu ingerlatseqatigiiffiit inuiaqatigiit kalaallit inuunerannut pingaarluinnarpoq. Tamanna tunuliaqutaralugu Royal Arctic Linemik piginnittuunermi Namminersorlutik Oqartussat siunertaat tassaavoq Kalaallit Nunaannut pilersuinermi aqqutit pingaaruteqartut atorneqarsinnaanerisa qulakkeerneqarnissaat.

Royal Arctic Linep kiffartuussinissamut isumaqatigiissut malillugu sineriak atuarlugu angallassineq isumagisaraa Namminersorlutillu Oqartussat inuiaqatigiinnut suliassat, ingerlatseqatigiiffiup suliarisai, tassunga ilanngullugit nunatsinni nunaqarfinnut isorliunerusunullu nassiussanik angallassinerit akilertarlugit.

Royal Arctic Linep tamatuma saniatigut ingerlatseqatigiiffik Arctic Umiaq Line A/S, ilaasunik angallassisartoq kiffartuussinissamullu isumaqatigiissut aqqutigalugu aningaasalersorneqartoq pigisaraa.

ral.dk

Royal Greenland A/S
Piginnittuunermi siunertaq tassaaneruvoq niuernikkut ingerlatsineq, tassa Royal Greenland Kalaallit Nunaanni ingerlatseqatigiiffiit akornanni niunermik ingerlatsisuni anginersaammat.

Piginnittuunermi pingaarnertut niuernermik siunertaqarnerup saniatigut Kalaallit Nunaanni aalisarnermik suliffissuaqarnermut aamma ataatsimut isigalugu Kalaallit Nunaanni inuiaqatigiinnut tapersiiffiginissaat aamma siunertaavoq. Royal Greenland Kalaallit Nunaanni sulisitsisut anginerpaatut inissisimanermigut Kalaallit Nunaanni suliffissaqarnerup tapersersornissaanut tunngatillugu pingaarutilittut inissisimavoq, nunattali isorartunera pissutigalugu unammilligassaqarluni. Piginnittuunermi siunertaavoq isorliunerusuni nunaqarfinnilu suliffissaqartitsinermik qulakkeerinninnissaq, taakkunani tunitsiviit tunisassiorfiillu amerlasuut inissisimapput.

Royal Greenlandip avataani suliaasa nunami tunisassiorfiit imminnut akilersinnaasut imminnullu akilersinnaanngitsut attassinnaatippaat. Ingerlatseqatigiiffik avataani suliatigut aalaakkaasunik isertitaqarpoq, illuatungaanili nunami suliani angusat annertuumik nikerarlutik. Nunami tunisassiorfiit arlallit ataavartumik amigartooruteqarfiusarput.

Ingerlatseqatigiiffiup nunami tunisassiorfinni tamani suliat piffissap pitsaanerani ajorneranilu nammineerluni inuiaqatigiit eqqarsaatigalugit attanniartarpai. Tamanna assersuutigalugu Covid-19-imik nunarsuaq tamakkerlugu tuniluuttoqarmat pivoq, nunami tunitsivinnut tamanut tunisisarnerit ingerlaannarnerisa kingunerisaanik annertuumik annaasaqartoqarpoq suliffissalli qulakkeerneqarlutik.

royalgreenland.gl

Sikuki Nuuk Harbour A/S
Sikukimik piginnittuunermut Nuummi umiarsualivimmik nutaamik 2017-imi atorneqalertumik sanaartornissap qulakkeernissaa siunertaasimavoq. Umiarsualivik siunissami ukiorpassuarni Kalaallit Nunaata ineriartorneranut annertuumik sunneeqataassaaq pilersuinerullu pitsaanerusumik aaqqissugaanissaanut tunngavissiissalluni.

Sikuki Nuuk Harbor Nuummi umiarsualivinnut amerlanernut tassungalu atasunut nunaminertanut akisussaavoq ingerlatseqatigiiffiullu isertitai tassaallutik nunaminertanik, illunik kraninillu attartortitsinermiit isertitat kiisalu umiarsualivimmi akigititatigut, nioqqutissanut akigititatigut atuisut akiliutaat kiisalu umiarsualivik tunngavigalugu sullissinernik tunisinerit.

Taamaalilluni aktiaateqarluni ingerlatseqatigiiffimmi piginnittuunermi tunngavik Sikuki Nuuk Harborimut tunngatillugu immikkuullarilluinnarput. Kalaallit Nunaanni umiarsualiviit allat tamarmik Ineqarnermut Attaveqaqatigiinnermullu Naalakkersuisoqarfimmi qitiusumik umiarsualivinnut oqartussaasoqarfimmit pigineqarlutillu aserfallatsaaliorneqartarput. Sikukilli ingerlatsinera niuernermik tunngaveqarpoq.

sikuki.dk

Tusass A/S
Tusass akitaateqarluni ingerlatseqatigiiffittut, Kalaallit Nunaanni pisortat nalunaarasuartaatitigut attaveqarfiinik aqqutissiuinissaq ingerlatsinissarlu aamma pisinnaatitsissut naapertorlugu pisortat nalunaarasuartaatitigut sullissinerannik isumaginninnissaq siunertaralugit pilersinneqarpoq. Pisinnaatitsissutip iluaniittut avataatigut nalunaarasuartaaserinermik ingerlatseqatigiiffiup neqeroorutigisassavai nalunaarasuartaatitigut attaveqarnermut tunngasutigut suliassat atortorisanut, ingerlatsinermut sullissinermullu tunngasut aaqqittarnissaat Kalaallit Nunaanni nunanilu allani.

Piginnittuunermi pingaarnertut siunertaq tassaavoq Kalaallit Nunaanni nalunaarasuartaatikkut attaveqaatinik aaqqissuussinerup atorneqarsinnaaneri aamma Kalaallit Nunaanni tamarmi atorneqarsinnaaneri qulakkiissallugit. Tusass nalunaarasuartaatikkut attaveqarnerup iluani, tv il.il. anginersaavoq illoqarfiillu unammilleqatigiiffiusut avataanni aamma kisiartaalluni neqerooruteqartuuvoq. Illoqarfinni unammillerfiusuni soorlu Nuummi Sisimiunilu internetimut, tv-mut oqarasuaatinullu angallattakkanut niuerfik namminersortunngorsagaavoq, taamaalilluni Tusass nunap immikkoortuini taakkunani unammillerneqarpoq.

Allakkerinermik suliassaqarfik ingerlatseqatigiiffimmut amigartoorfiusumik ingerlavoq, tamatumunngalu annertusiartortumik digitalinngorsaaneq pissutaalluni. Suliassarli inuiaqatigiit eqqarsaatigalugit pingaaruteqarpoq allakkerinermillu attassinissamut tunngavik niuernermik tunngaveqartumik ingerlataqarnikkut iluarsiiffiginissaa ajornarpasippoq.

tusass.gl

Visit Greenland A/S
Namminersorlutik Oqartussat piginnittuuneranni pingaarnertut siunertaasoq tunngavilersorneqarsimavoq Kalaallit Nunaata takornariartarfittut inerisarneqarnissaanik kissaateqarnermit. Namminersorlutik Oqartussat ingerlatseqatigiiffik aqqutigalugu takoqqusaarinermi attaveqarnermilu atortulersuummik patajaatsumik peqarpoq, taassumalu nunanit tamalaanit suleqatigisani suleqatigalugit Kalaallit Nunaata takornariartarfittut ineriartortinneqarnera peqataaffigaa.

Taamaalilluni ingerlatseqatigiiffimmut aalajangiisuusumik tunngavissaatitaasoq tassaavoq Namminersorlutik Oqartussanit pigineqarneq. Tassunga pissutaavoq, Visit Greenland A/S-ip suliarisartagai pisortat ingerlatsineranni tunngavissat iluanni allamit suliarineqartussaassagaluarmata.

Visit Greenland A/S-imik anguniagaq tassaavoq digitalikkut tusagassiorfiit siammarterillunilu nittarsaassinikkut Kalaallit Nunaata saqquminerunissaa ilisimaneqarnerulernissaalu.

Ingerlassaq alla tassaavoq nunani tamalaani takornariaqarneq pillugu takoqqusaarivinni Kalaallit Nunaannut sinniisutut inissisimaneq kiisalu Kalaallit NUnaanni takornariarnernik neqerooruteqartartut tamakkerlutik taakkulu sullissarilerumaagaasa akornanni attaveqartarnissamik ataqatigiissaarineq. Tamanna tunuliaqutaralugu ingerlatseqatigiiffik Kalaallit Nunaanni takornariartitsinermik suliffissuaqarnermi attuumassuteqartunik tamanik nuna tamakkerlugu tapersersorneqarluni attaveqaatitut atuuffeqarpoq. Ingerlatseqatigiiffiup suliai nuna tamakkerlugu takornariaqarnermut periusissamut, inuussutissarsiornermut Naalakkersuisumit akisussaasumit aalajangersarneqartumut qaqugukkulluunniit naapertuutissapput.

visitgreenland.com