Imarisassat tusarnaarlugit atuarlugitInuussutissarsiornermut Aatsitassanullu Naalakkersuisoqarfik
Naalakkersuisoqarfik pillugu
Inuussutissarsiornermut Aatsitassanullu Naalakkersuisoqarfik sisamanik immikkoortortaqarpoq, marlunnillu allaffeqarluni. Tamatuma saniatigut Atuisoqarnermut Unammilleqatigiinnermullu Aqutsisoqarfik Naalakkersuisoqarfiup ataani immikkoortortaavoq.
Inuussutissarsiornermut Niuernermullu immikkoortortaqarfiup akisussaaffigai pingaarnertut politikkimik ineriartortitsineq, periusissanik pilersaarusiorneq, ataqatigiissaarineq kiisalu inuussutissarsiornermut niuernermullu suliassaqarfiup iluani attaveqarneq politikkikkullu siunnersuineq.
Aatsitassanut Immikkoortortaqarfiup akisussaaffigai aatsitassanut suliassaqarfimmi pingaarnertut politikki, periusissat, pilersaarusiorneq ataqatigiissaarinerlu. Akuersissuteqartarnermut Immikkoortortaqarfik aamma Teknikkimut Nakkutilliinermullu Immikkoortortaqarfik tamatuma saniatigut Kalaallit Nunaanni aatsitassarsiorluni ingerlatanik allaffissornermi maleruagassiisarnermillu qitiusumik oqartussaapput.
Naalakkersuisoqarfimmi akisussaaffinnut suliassaqarfinni pingaarnertut pilersaarusiorneq naalakkersuisoqarfiup isumagisaraa, ilanngullugu ingerlatassat immikkoortortaqarfinniittut pillugit politikkikkut oqallinnissamut tunngavissanik suliaqarnermi Naalakkersuisoqarfik peqataasarluni.
Tamatuma saniatigut Naalakkersuisoqarfik inatsisitigut akisussaasuuvoq.
-
Suliassaqarfiit
Inuussutissarsiornermut Niuernermullu immikkoortortaqarfiup suliassaqarfiini qitiusuni ilaapput:
- Inuussutissarsiutinik siuarsaaneq aamma aallarnisaasarnerit, ilanngullugit nutaaliornermik siuariartortitsinermillu nukittorsaasussamik suliniuteqarnerit
- Takornariartitsinermi suliniutinik ineriartortitsineq ataqatigiissaarinerlu
- Sermeq imermillu pillugit suliassaqarfimmi politikkikkut ineriartortitsineq periusissanillu suliaqarneq
- Ilaatigut Nalik Ventures-imut, Visit Greenland-imut aamma Great Greenland-imut kiffartuussinissamik isumaqatigiissutinik suleqateqarnernillu isumaginninneq
- Najukkani inuussutissarsiornermi siunnersuisooqatigiinnik suleqateqarneq
- Uumassusillit sananeqaataat pillugit isumalluutinik atuinissaq pillugu ingerlatsineq, politikkikkullu ineriartortitsineq
- Inuussutissarsiornermut nunallu immikkoortuini Nunani avannarlerni EU-mullu sammisumik politikkikkut suleqatigiinnerni peqataaneq
- Niuernermut isumaqatigiissutit nunanilu tamalaani niuernikkut suleqateqarnerit, ilanngullugit suleqatigiit marluk aammalu arlallit akornanni atassuteqarnerit
- Joint Committee-mi suleqatigiinnerni peqataaneq
- Nunami namminermi nunanilu tamalaani periusissatigut nittarsaassineq inuussutissarsiornikkut tuniniagassanik pilerisaarinerit
Aatsitassanut immikkoortortaqarfimmiipput Ujarassiornermut Immikkoortortaqarfik, Akuersissuteqartarnermut Immikkoortortaqarfik aamma Teknikkimut Nakkutilliinermullu Immikkoortortaqarfik.
Akuersissuteqartarnermut Immikkoortortaqarfiup aamma Teknikkimut Nakkutilliinermullu Immikkoortortaqarfiup suliassaqarfii pingaarnerpaat qulequttani matuma kingulianiittumi ataatsimoortinneqarsinnaapput:
• Kalaallit Nunaanni mineralinik atuinermik misissueqqaarnermut, misissuinermut piiaanermullu atatillugu suliassanik suliarinninnermik isumaginninneq nakkutiginninnerlu
• inatsisit atuuttut naapertorlugit akuersissutinik akuersissuteqarnissamillu qinnuteqaatinik passussineq
• isumannaallisaanerup, inuiaqatigiinni piujuartitsisumik ingerlatsinissap paasiuminartitsinissallu ukkatarineqarneri aammalu Aatsitassanik Suliassaqarfinnut Avatangiisinut Aqutsisoqarfik qanimut suleqatigalugu.
• oqartussat suliamik suliaqarnerannik ataqatigiissaarineq aamma pisinnaatitsissummik piginnittut pisortani aaqqissuussaanerup ataatsimoortumik periaasiinut saaffissaqarnissaq.
Kalaallit Nunaanni Aatsitassanut oqartussamiipput:
Akuersissuteqartarnermut Immikkoortortaqarfik
Teknikkinut Nakkutilliinermullu Immikkoortortaqarfik
Ujarassiornermut Immikkoortortaqarfik
Aatsitassanik Suliassaqarfinnut Avatangiisinut Aqutsisoqarfik (Pinngortitamut Avatangiisinullu Naalakkersuisoqarfiup ataani) -
Naalakkersuisoqarfiup aaqqissuussaaneranik takussutissiaq
Naalakkersuisoqarfimmi pisortaq
Jørgen T. Hammeken-Holm