Kujataani nunap ilaanut tunuliaqutassatut misissuineq pillugu tusarniaaneq

Aatsitassaqarnermut Avatangiisinut Aqutsisoqarfiup matumuuna nalunaarusiaq ”South Greenland – Regional environmental baseline assessment for mining activities” ilaliunneqartoq tamanut ammasumik tusarniaassutigaa.

Nassuiaat
Kalaallit Nunaata kujataani nunap immikkoortuani tunuliaqutassanik misissuinermi nunap immikkoortuani aatsitassarsiornermi sulianik piujuartitsiffiusumik ingerlatsinissamut ilisimasatigut tunngavissat
nukittorsarneqarnissaat siunertarineqarpoq. 

Nalunaarusiami nunap immikkoortuani nunap sananeqaataani, uumassusilini avatangiisinilu kemiini pissutsinut paasissutissat tunngaviusut ilisaritinneqarput, aammalu sumiiffimmi inuit atuinerannut
kulturikkullu kingornussanut takuneqarsinnaasunut paasissutissat takussutissiorneqarlutik. Paasissutissat assigiinngitsut pingaarnersiorlugit saqqummiunneqarput, aammalu nunap assinginik takussutissiorfiusunik arlalinnik tapertaqartinneqarlutik. Paasissutissat ataatsimoortut tamarmiusut https://rba.eamra.gl/ alakkarlugu takuneqarsinnaapput.

Nalunaarusiami sumiiffiit arlallit, siunissami aatsitassarsiornermi avatangiisillu eqqarsaatigineqarnerini, aammalu kulturikkut kingornussanik soqutigisaqarnermi aporaaffiulersinnaasut sumiiffissineqarput.
Aatsitassaqarnermi Avatangiisinut Aqutsisoqarfiup sapinngisamik nalunaarusiami paasissutissat inerniliissutaasullu siunissami Kalaallit Nunaata kujataani maleruagassiorniarluni suliaminut akuutissavai.
Tamanut ammasumik tusarniaanermi innuttaasunit, oqartussaasunit, inuussutissarsiortunit soqutigisaqartunillu allaniit misilittakkanik suliatigullu ilisimasanik katersuinissaq siunertarineqarpoq.

Piffissaq tusarniaanermi killigititaq

Tusarniaanermi akissuteqaatit kingusinnerpaamik 23.04.2023-mi Aatsitassaqarnermi Avatangiisinut Aqutsisoqarfimmut nassiuteqquneqarput.

Tusarniaanermi akissuteqaatit aqutsisoqarfiup e-mailadressianut pisortatigoortumut nassiuteqquneqarput, uunga: eamra@nanoq.gl