Imarisassat tusarnaarlugit atuarlugitInuussutissarsiornermut Aatsitassanullu Naalakkersuisoqarfik
Aatsitassat
Aatsitassanut suliassaqarfiup iluani suliassat nalinginnaasut oqartussat nittartagaanni atuarneqarsinnaapput uani. https://govmin.gl/da/
Aqutsisoqarfiup inatsit tunngavigisaa tassaavoq, aatsitassanut tunngasunik suliaqarneq pillugu Inatsisartut inatsisaat nr. 26, 13. juni 2023-meersoq (Aatsitassarsiornermut inatsit). Aatsitassarsiornermut inatsit kiisalu allannguutit tamarmik uani takuneqarsinnaapput.
Oqartussaq Akuersissuteqartarnermut immikkoortortaqarfeqarpoq kiisalu Teknikkinut Nakkutilliinermullu Immikkoortortaqarfeqarluni.
Najukkami inuussutissarsiortutut kisermaassisussaatitaalluni najukkami aatsitassanut tunngasunik suliaqarnissamut akuersissummik qinnuteqarusukkuit, imaluunniit ingerlatseqatigiiffittut aatsitassanut misissueqqaarnissamut, misissuinissamut imaluunniit aatsitassanik piiaanissamut akuersissummik imaluunniit ilisimatuussutsikkut misissuinernik suliaqarnissamik akuersissutinik qinnuteqarusukkuit, Aatsitassanut oqartussamut qinnuteqaateqassaatit, uani qinnuteqaatinut nittartagaq aqqutigalugu https://portal.govmin.gl/dashboard
Aatsitassanut oqartussap tamatuma kingorna immikkoortortanut allanut, oqartussat suliarinninnerannik tapersiisussanut, suliassat ataqatigiissaassavai. Tunngaviusumi tassani sunniuteqarluartumik suliassanik suliarinninnissaq qulakkeerneqarpoq.
-
Suliassaqarfiit
Akuersissuteqartarnermut immikkoortortaqarfik
Akuersissuteqartarnermut immikkoortortaqarfik aatsitassanut misissueqqaarnissamut, misissuinissamut aatsitassanillu piiaanissamut qinnuteqaatinik ingerlaavartumik suliarinnittarpoq.Suleqatigisartakkanut tusarniaaffigineqartartunullu tamanut suliassanik suliarinninneq ataqatigiissartarparput. Aatsitassanut oqartussami Akuersissuteqartarnermut immikkoortortaqarfiup qinnuteqaatit tiguppagit, suliassanik suliarinninneq aallartittarpoq. Ingerlatassani tamaginni aatsitassarsiornermut inatsimmi piumasaqaatit naammassineqarsimanissaat, Akuersissuteqartarnermut immikkoortortaqarfimmi qulakkeerneqartussaavoq. Ingerlatassaq inatsisit malillugit Naalakkersuisunit akuersissuteqarfigineqartussaq pineqartillugu, Aatsitassanut oqartussaqarfik Inuussutissarsiornermut Aatsitassanullu Naalakkersuisoqarfimmut inassuteqaammik suliaqartarpoq.
Teknikkimut Nakkutilliinermullu Immikkoortortaqarfik
Oqartussap suliassai ingerlatseqatigiiffinnut aatsitassanut ikummatissanullu inatsisip ataani akuersissummik tunineqarsimasunut tunngassutillit Teknikkimut Nakkutilliinermullu Immikkoortortaqarfiup akisussaaffigai. Aatsitassarsiornissamut akuersissutit tunniunneqareersut ataanni ingerlatassanut atugassarititaasunik aalajangersaaneq, kiisalu tamatuma kingorna atugassarititaasut taakkua naammassineqarsimanissaannut nakkutilliineq, immikkoortortaqarfiup pingaartumik suliarisarpai. Kalaallit Nunaanni aatsitassanik piiaanerup isumannaatsumik atugaqartitsilluni ingerlanneqarnissaa qulakkeerniarlugu tamanna pisarpoq, minnerunngitsumik isumannaallisaanermut, peqqinnissamut avatangiisinullu tunngatillugu, taamaattumik suliaqarneq aamma Aatsitassanik Suliassaqarfinnut Avatangiisinut Aqutsisoqarfik qanimut suleqatigalugu ingerlanneqartarluni.
Immikkoortortaqarfiup suliassaanni pingaarutilinni taaneqarsinnaapput aatsitassarsiorluni misissuinernik suliaqarnissanut, aatsitassarsiorfinnut matusinissamullu pilersaarutinik kiisalu aatsitassanut tunngasunik immikkuullarissunik suliaqarnissanut akuersissuteqartarneq, kiisalu tamatuma kingorna aatsitassanut tunngasunik suliaqarnermik ingerlaavartumik nakkutilliineq. Tamatuma saniatigut ujaqqerivinnik sioqqanillu milluaalluni suliaqarnernut, Kalaallit Nunaanni illuliortiternermut attaveqaasersuutinillu suliassanut atortussanik pissarsinissamut sammitinneqartunut, suliassanik suliarinninneq akuersissuteqartarnerlu immikkoortortaqarfiup isumagisarai.Ujarassiornermut Immikkoortortaqarfik
Ujarassiornermut Immikkoortortaqarfik Namminersorlutik Oqartussanut, kommuninut tamanullu ammasumik geovidenskabimi mineralinit atortussiassat pillugit siunnersortit pingaarnersaraat.Kalaallit Nunaanni nunap sannaani pisuussutit, katitigaanera, ilusaa oqaluttuarisaaneralu paasiniarlugit, ataqatigiissaartumik periaaseqarluni misissuinermi Ujarassiornermut Immikkoortortaqarfik akisussaasuuvoq. Periaatsit, soorlu nunap assiliorneq, qillerineq aamma remote sensing atorlugit, geologiimut tunngasumik nunap assinginik ilusilianillu isumalluutinik nalilersuinermut, ilisimatuussutsikkut ilisimatusarnermut aammalu pinngortitami ajunaarnersuaqarnissaata aarlerinaateqarneranik nalilersuinermut atorneqartussanik, Ujarassiornermut Immikkoortortaqarfik suliaqartarpoq. Tamatuma saniatigut Kalaallit Nunaanni geologii kiisalu mineralinit atortussiassat pillugit tamanut, tusagassiorfinnut ilinniarfinnullu Ujarassiornermut Immikkoortortaqarfik paasissutissiisarpoq.
Ujarassiornermut Immikkoortortaqarfiup maannakkorpiaq Nuummi qillikkanut toqqorsivik nutaaq ineriartortileruttorpaa. Toqqorsivimmi tassani qillikkanut misissugassanut tunngasut Kalaallit Nunaata geologiianut takutitsisut asseqanngitsut katersaatitut paaqqutarineqarluarnissaat qulakkiissavaa. Taamaalillunilu toqqortaasivik qillikkanik misussugassanut tunngasunut kiisalu mineraleqarfinnik assigiinngitsunut tunngasunut toqqaannartumik misissuisinnaanermik periarfissaqalersitsivoq.Suleqatigiissitat immikkut ilisimasallit makkua immikkoortortaqarfimmiipput:
Qarasaasiatigut paasissutissanik passussineq
Immikkoortortaqarfiup suliassaasa pingaarnerit ilaat tassaavoq geovidenskabimut tunngasunik paasissutissanik nalunaarsuinissaq pitsanngorsaanissarlu. Najukkami paasisimasaqarneq piujuartussanillu paasissutissanik nalunaarsukkanik passussiveqarnerit tassani ineriartortinneqarput.
Ujarassiornermik immikkoortortaqarfiup Kalaallit Nunaanni geovidenskabimut tunngasunik paasissutissanik nalunaarsukkanik atuisut tamaasa pitsaanerusumik, ammasumik pissarsisinniarlugit, geologiimut, geokemiskemut aamma geofysiskemut tunngasunik paasissutissanik nalunaarsukkanik passussinissamik Kalaallit Nunaannit aallaavilimmit pisariitsumik, isumannaatsumik sunniuteqarluartussamillu Ujarassiornermut Immikkoortortaqarfik atuutsitsilerpoq.CO₂-nik tigooraaneq toqqorsisarnerlu (CCS)
Kalaallit Nunaat tamakkerlugu najukkani naleqquttunik nalilersuinissaq aammalu sumiiffinni geologii pillugu periarfissat paasinissaat ukkataralugit CO₂-nik unerartitsinissaq toqqorsivimmiititsinissarlu (CCS) Ujarassiornermut Immikkoortortaqarfiup misissorpaa. Maannakkorpiaq Qeqertarsuup eqqaani misileraalluni misissuineq ingerlanneqarpoq, tassani sukumiisunik misissuinerni siunertaalluni najukkami toqqorsivissaqarnissap aammalu isumannaatsumik, ungasissumut CO₂-nik toqqorsinissamut periarfissat naliliiffiginissaat.
Asimi suliaqarnermi paasisimasallit
Ujarassiornermut Immikkoortortaqarfik Kalaallit Nunaanni sumiiffinni tamani asimi suliaqarnissamut suliniutinik pilersaarusiortarnermi ingerlatsisarnermilu annertuunik paasisimasaqarpoq. Ujarassiuut misilittagaqarput geologiimut tunngasunik nunamik assiliornermik, geofysikkimut tunngasinik misissuinernik kiisalu akilersinnaasumik geologiimut tunngasumik ujarlernerit. Taamaalilluni avatangiisini assigiinngitsuni unammillernarsinnaasunilu paasissutissanik nalunaarsukkanillu annertuunik sunniuteqarluartumik katersinissaq ajornarunnaarsippaa.
Annikitsumik aatsitassarsiornermik ingerlatsinerup iluani siunnersuineq ilinniartitaanerlu
Ujarassiornermut Immikkoortortaqarfik suliffeqarfinnut annikitsumik atortussianik piiaanermik suliaqartunut siunnersuisarpoq, aammalu pinnersaasiassanik ujarlernissamut sumiiffiit naleqquttut ujaasiffiusinnaasut pillugit ilitsersuisarluni. Tamatuma saniatigut Ujarassiornermut Immikkoortortaqarfik pingaarutilittut inissisimavoq najukkami atuarfeqarfiit suleqatigalugit kinguaariit tulliisa ukiukinnerini geovidenskabimut tunngasunik ilisimatuussutsikkut ilisimasanik ilinniartitsinermik, siuarsaanermik soqutiginnilersitsinissamik siunertaqartumik ingerlatsisarlutik, soorlu workshoppertitsinernik.Nittarsaassineq
Kalaallit Nunaanni piiaanermik ingerlatsinissap periarfissaqarnera pinngortitamilu pisuussutit pilerisaarutiginiarlugit nittarsaassinernik suliaqarnerit Ujarassiornermut Immikkoortortaqarfiup ingerlappai. Tassani ilaapput paasissutissanut najoqqutassanik suliaqarneq aammalu inuussutissarsiortunut aaqqissuussinerni anginerusuni, soorlu Toronto-mi PDAC-imi ataatsimeersuarnermi, nunani tamalaani eqqumaffiginnilersitsiniarluni aningaasaliiumalersitsiniarlunilu, Kalaallit Nunaat sinnerlugu peqataasarluni.
Qaqqat sisoortarnerannut suleqatigiit
Karrat Kangerluanni 2017-imi qaqqap sisoornerata tassaarsuaqarneranillu kinguneqarnerata, inuit sisamat ajunaarnerannik malitseqartup, Umiammakku Nunaanni Kangerluarsummilu nakkutiginninnermi periaatsit ingerlaavartut ingerlanneqarnerat, 2022-mi aamma 2023-mi pilersinneqartut Qaqqat sisoortarnerannut suleqatigiit ingerlappaat. Suleqatigiit ullut tamaasa nakkutiginninnermi paasissutissat nalunaarsukkat misissoqqissaartarpaat aammalu pisunik nalilersuineq qaammatikkaartumik tamanut saqqummiuttarlugu. Tamatuma saniatigut qaqqat sisoorsinnaanerannik ilimanaateqartut paasiniarlugit aammalu sumiiffiit sinerissami inoqarfiusuni qaqqami sisoortoqaratarsinnaaneranik navianartorsiortitsisinnaasut paasisimalerniarlugit nunap immikkoortuani misissuineq tamatumani aallartinneqarpoq. Qaqqat sisoortarnerannut suleqatigiit tamatuma saniatigut sumiiffinni kalluarneqartuni sunniuteqarluartumik aarlerinaataasunik iliuuseqarfiginissaannik ineriartortitsinissaq pillugu Namminersornerlullitik Oqartussani upalungaarsimanermut oqartussat suleqatigaat.