Inuussutissarsiornermut Aatsitassanullu Naalakkersuisoqarfik

Tunumi Nunap Qeqqani / Jameson Land-imi uuliamik ujarlernissamut atuisinnaanissamullu akuersissutit pingasut tunniunneqarsimapput. 2015-imi akuersissutit marluk aammalu 2018-imi akuersissut ataaseq tunniunneqarput. Uuliasiorluni ujarlernissamut akuersissutinik nutaanik tunniussisarniaratik Naalakkersuisut 2021-mi aalajangiinerat sioqqullugu akuersissutit tunniunneqarput.

Akuersissutit White Flame Energy A/S-imut tunniunneqarsimapput. White Flame Energy A/S-imut ingerlatseqatigiiffik qullersaqarfiusoq tassaavoq tuluit ingerlatseqatigiiffiat 80 Mile PLC. Ingerlatseqatigiiffik Greenland Energy kukkusumik tamanut paasissutissiisimavoq namminneq akuersissutit pigalugit. Taamaattoq ingerlatseqatigiiffik taanna akuersissutit malillugit piginnittussaatitaanngilaq. Greenland Energy suliassamut aningaasaliisuuginnarpoq ingerlatsisussaaginnarlunilu.

Akuersissutit akuersissummi ataatsimi ujarlernissamut atuinissamullu akuersissutitut tunniunneqarput. Akuersissutit immikkoortunut pingaarnernut pingasunut aggulunneqarput: ujarlerneq, atuinissamut ikaarsaarneq atuinerlu. Akuersissutit pingasut tamarmik immikkoortoq 1-imiipput. Tassa imaappoq akuersissutit pingasut tamarmik ujarlernermi immikkoortumiipput.

Akuersissutit 2028-p naanissaata tungaanut suli atuupput, sivitsoqqinneqarnissaat periarfissaalluni.

Ujarlernermi immikkoortoq piffissanut immikkoortunut aggulunneqarpoq. Piffissat immikkoortui tamarmik pisussaaffinnik imaqarput. Ingerlatseqatigiiffiup piffissat immikkoortuani pisussaaffiit naammassisimappagit, piffissat immikkoortuisa tullianut akuersissutip sivitsorneqarnissaanik ingerlatseqatigiiffik qinnuteqarsinnaavoq. Ingerlatseqatigiiffik qinnuteqarsimappat piffissat immikkoortuanut nutaamut nutaanik pisussaaffeqalissaaq.

Akuersissummi immikkoortut aamma piffissat immikkoortui imatut isikkoqarput:

Immikkoortoq 1: Ujarlerneq

• Piffissap immikkoortuini arlalinni aggulunneqarpoq
• Piffissap immikkoortui tamarmik sulinissamut aningaasaliinissamullu pisussaaffinnik immikkuullarissunik imaqarput
• Piffissap immikkoortuata tullianut ikaarsaarnissat pisussaaffiit akuersissuteqarnerillu naammassineqarsimanissaat pisariaqarpoq
• Piffissap immikkoortuinik sivitsuinissamut periarfissaqarpoq
  
  Ujarlernermi piffissat immikkoortui:
  
  • Piffissap immikkoortua 1
    
    • Aallarniutaasumik misissuinerit (paasissutissanik nalunaarsukkanik katersineq, piareersarneq)
    • Piumasaqaatigineqarput
      
      • ingerlatassanut VVM/VSB-imut nassuiaatit akuerineqarsimasut (VVM – avatangiisinut sunniutaasussanik nalilersuineq, VSB – inuiaqatigiinnut sunniutaasussanik nalilersuineq)
      • Tamanut ammasumik tusarniaanerit
      • Akuersissuteqareernerup kingorna aatsaat ingerlatassat aallartinneqarsinnaapput
        
  • Piffissap immikkoortua 2
    
    • Misissuinerit pisariunerusut (assersuutigalugu nunamik sajuppillatsitsisarneq, qillerinerit)
    • Piumasaqaatigineqarput
      
      • ingerlatassanut VVM/VSB-imut nassuiaatit akuerineqarsimasut
      • Tamanut ammasumik tusarniaanerit
      • Akuersissuteqareernerup kingorna aatsaat ingerlatassat aallartinneqarsinnaapput
        
  • Piffissap immikkoortua 3
    
    • Naggasiutaasumik ujarlerneq aamma atuinissamut aalajangiinissamut tunngavissat
      

Immikkoortoq 2: Atuinissamut ikaarsaarneq

• Ingerlatseqatigiiffik atuinissamut ikaarsaarnissamut qinnuteqarsinnaavoq
• Piumasaqaatigineqarput
  
  • Suliassamut tamarmut VVM-imut aamma VSB-imut nassuiaatit akuerineqarsimasut
  • Tamanut ammasumik tusarniaanerit
  • Akuersissuteqareernerup kingorna aatsaat suliassaq aallartinneqarsinnaavoq
    

Immikkoortoq 3: Atuineq

• Tunisassiorneq
• Piiaanermut qaavatigut akiliutit (royalty) nalunaarusiornissamullu pisussaaffiit ingerlaavartut
• Tamaattumik piffissami sivisunerusuni ingerlasinnaavoq (inatsisit naapertorlugit ukiut qulikkaat arlallit angullugit)

Ingerlatseqatigiiffik immikkoortoq 1-imi, piffissap immikkoortua 1-imi inissisimavoq. Piffissap immikkoortua maannakkut atuuttoq 2028-mi decembarimi naasussaavoq.

Akuersissutit Naalakkersuisoqarfiup nittartagaani takuneqarsinnaapput

Akuersissutit aatsitassanut ikummatissanullu inatsit malillugu tunniunneqarput. Ingerlatassanut piumasaqaatit atugassarititaasullu inatsimmi aalajangersagaapput.

Suliassaq suli immikkoortoq siullermiippoq, taannalu taaneqartarpoq aatsitassanik ujarlerneq. Immikkoortumi tassani uuliaqarnersoq imaluunniit gasseqarnersoq paasiniarlugu ingerlatseqatigiiffik nunap iluani misissuisussaavoq. Nalinginnaasumik ilaatigut nunamik sajuppillatsitsisarluni uuttortaanikkut, nunap qaleriiaarnerini qillerinertigut allatigullu geofysikkimut tunngasunik suliaqarnertigut geologiimut paasissutissanik katersisoqartarpoq. Taamattumik ujarlerluni qillerinernut ataasiakkaanut, aammalu atuinermi ingerlatassarpiamut, VVM-imi nalilersuinissamut suliaqarnissamut tunngaviusussanik misissugassanik katersisoqartarnera nalinginnaasuuvoq.

Sumiiffimmi akuersissuteqarfiusumi atortut annikinnerusumik annertussusillit nunamukaannissaannut ingerlatseqatigiiffik 2025-mi akuerineqarpoq. Sila pissutaalluni ingerlatseqatigiiffiup atortut anngutsinnissaat angumerinngilaa. Taamaattumik atortut Tasiilami inissinneqarput. Akuersissuteqarneq 2025-mi decembarimi atorunnaarpoq, taamaattumillu atuukkunnaarluni.

Sumiiffimmi akuersissuteqarfiusumi annikinnerusunik avatangiisini misissuinernik suliaqarnissamut ingerlatseqatigiiffik aamma 2025-mi akuerineqarpoq. Misissuinerit taakkua VVM-imi nalilersuinernut pisussanut tunngavissaliisussaavoq. Taakkua 2025-mi ingerlanneqarput.
Ingerlatseqatigiiffiup immikkoortumi 1-imi piffissap immikkoortua 1-imi piumasaqaatit pisussaaffiillu amerlanersai naammassisimavai. Taamaattoq avatangiisinut inuiaqatigiinnullu sunniutaasussanik (VVM aamma VSB) suliaqarnissaq, pisariaqartoq, suli amigaataavoq.
Ingerlatseqatigiiffik paasissutissiivoq sajuppillatsitsisarluni misissuinerit pillugit pilersaarutigeqqaakkami allanngortinnissaa kissaatigalugu. Tamatumunnga taarsiullugu ujarlerluni qillerinernik misissuinertaqartunik ingerlatsinissaq ingerlatseqatigiiffiup kissaatigaa. Ujarlerluni qillerinerit geologii pillugu ilisimasaqalersitsisussaavoq, taamaalillunilu uuliaqarnersoq tikkuussisuusussaalluni.

Ujarlerluni qillerinerit aallartinnissaannut suli akuersissuteqartoqanngilaq. Taamaattoq ingerlatseqatigiiffik paasissutissiivoq ujarlerluni qillerinernik marluk angullugit ingerlatsinissaq kissaatigalugu. Taakkua 2026–2027 ukiuuneranut pilersaarutigineqarput.

Qillerinernik suliaqarnerit taamaattut aallartinneqannginneranni oqartussat arlalinnik akuersissuteqartussaapput. Tassani pineqarput teknikkikkut akuersissuteqarnerit aamma avatangiisinut inuiaqatigiinnullu sunniutaasussanut nassuiaatinut (VVM aamma VSB) akuersissuteqarnerit.

Naalakkersuisut 2026-mi aggustip 12-iani ingerlatseqatigiiffik ilisimatippaat, pilersaarutaasumik qillerinissat 2026/2027-p ukiuunerani ingerlanneqarsinnaanngitsut nalilerlugu. Pisariaqartumik oqartussat suliaqarnerat naammassineqarsinnaannginneranik, tamannalu pillugu qillerinissap pilersaarutaasumik aallartinnginnerani akuersissutit pisariaqartut pigineqalersinnaannginnerinik tamanna patsiseqarpoq.

Qillerinissamik pilersaarummi piareersaataasumik ingerlatassat naliliinermi aamma ilaatinneqarput. Ilaatigut aaqqissuussineq, qillerinissamilu atortussanik nunnigussineq kiisalu sumiiffimmi akuersissuteqarfiusumi ineqarfissamik pilersitsineq pineqarput.

Ingerlatassat taakku qillerinissamut atasutut isigineqassapput, tamannalu pillugu VVM-imik aamma VSB-mik suliat naammassineqartinnagit, oqartussaniillu akuersissutit pisariaqartut pigineqartinnagit aallartinneqarsinnaanatik.

Tusagassiorfinnut nalunaarut uani atuaruk.

2026-mi pisut
Sumiiffimmut akuersissuteqarfiusumut atortussat ikitsut nunnigunnissaannik ingerlatseqatigiiffik 2026-mi qinnuteqarpoq. Atortut Dundas-imeersut, ingerlatseqatigiiffiup 2025-mi nunnigunngisaat pineqarput. Atortut maanna Nerlerit Inaanniipput.
Akuersissummi 2015-13-imi aamma 2015-14-imi avatangiisinik misissuinissamik ingerlatseqatigiiffik aamma qinnuteqarpoq. Avatangiisinut tunngatillugu ilisimasat misissuinermi katersorneqassapput, suliniutillu avatangiisinut sunniutigisinnaasaannik naliliinissamut (VVM) atatillugu atorneqassallutik.

Atortunik nunnigussinissaq akuerineqanngilaq
Atortunik nunnigussinissamik qinnutigineqartoq Aatsitassanut Oqartussanit akuerineqanngilaq. Sumiiffik akuersissuteqarfiusoq annertooq Masarsoqarfiit iluaniippoq. Pinngortitaq, uumasullu immikkut innimigineqassallutik masarsoqarfiit nunat assigiinngitsut akornanni illersugaapput. Tamanna pillugu piffissani immikkut mianerisariaqartuni ingerlatsinissamut periarfissat killeqarput. Tamanna pillugu nunnigussineq akuerineqanngilaq, atortullu Nerlerit Inaanniiginnassallutik.

Avatangiisinik misissuinissat akuerineqarput
Qinnutigalugu avatangiisinik misissuinissat ingerlanneqarnissaannut Aatsitassanut Oqartussat ingerlatseqatigiiffik akuersissummik tunivaat. Ingerlatat qanoq ingerlanneqarnissaannut akuersissutit immikkut piumasaqaatitaqarput.

Akuersissutit atuakkit
Ingerlatat akuerineqartut, piumasaqaatillu atasut uani atuarneqarsinnaapput.

2015-13

2015-14

Qillerinernik suliaqarnissat akuerineqarsinnaanissaat sioqqullugu makkua pisussaapput:

1. Ingerlatseqatigiiffik suliniummut nassuiaammik suliaqassaaq
2. Suliniummut nassuiaat tamanut ammasumik piareersaataasumik tusarniaassutigineqarnissamut Naalakkersuisunit akuersissuteqarfigineqassaaq
3. Suliniummut nassuiaat ulluni 35-ni tamanut ammasumik piareersaataasumik tusarniaassutigineqassaaq
4. Ingerlatseqatigiiffiup tusarniaanermut oqaaseqaatit tusarniaanermit nalunaarusiami ataatsimoortissavai oqaaseqarfigissallugillu aammalu tusarniaanermut oqaaseqaatit tunngavigalugit suliniummut nassuiaat iluarsissallugu.
5. Tusarniaanermit nalunaarusiaq aamma suliniummut nassuiaat iluarsisaq Naalakkersuisut akuersissuteqarfigissavaat
6. Ingerlatseqatigiiffiup suliniummut nassuiaat akuerisaq tunngavigalugu avatangiisinut (VVM) aamma inuiaqatigiinnut (VSB) sunniutaasussanik nalilersuineq suliarissavai
7. VVM (avatangiisunut sunniutaasinnaasunik nalilersuineq) aamma VSB (inuiaqatigiinnut sunniutaasinnaasunik nalilersuineq) tamanut ammasumik tusarniaassutigineqartussanngorlugit Naalakkersuisunit akuersissuteqarfigineqassapput
8. VVM aamma VSB sapaatit akunnerini 8-ni tamanut ammasumik tusarniaassutigineqassapput. Piffissami tassani amma sumiiffinni kalluarneqartuni tamanut ammasumik innuttaasunik ataatsimiititsinerit ingerlanneqassapput
9. Ingerlatseqatigiiffiup tusarniaanermut oqaaseqaatit tamaasa tusarniaanermit nalunaarusiami ataatsimoortissavai oqaaseqarfigissallugillu aammalu tusarniaanermut oqaaseqaatit tunngavigalugit VVM aamma VSB iluarsissallugit.
10. Naalakkersuisut VVM-imut aamma VSB-imut nassuiaatit inaarutaasut akuersissuteqarfigissavaat
11. Naalakkersuisut, kommunip ingerlatseqatigiiffiullu akornanni IBA-p (sunniutissat iluaqutissallu pillugit isumaqatigiissut) isumaqatiginninniutigineqarnera ingerlanneqassaaq
    
    

Ingerlatseqatigiiffiup maannakkut suliassamut nassuiat (alloriarneq 1) suliaraa aammalu oqartussat oqaloqatigalugit. Suliassamut nassuiaat pillugu tusarniaaneq suli aallartinneqarsinnaanngilaq, tassami ingerlatseqatigiiffiup najoqqutassat piareersarlugit ingerlammagit. Taamaalilluni ujarlerluni qillerinissanut akuersissummik tunniussinissaq pillugu aalajangiisoqarsimanngilaq.

Najoqqutassat tamanut ammasumik tusarniaassutigalugit nassiunneqartussat tamarmik kalaallisut danskisullu suliarineqarsimasussaapput.

VVM-imut ilitsersuut uani takuneqarsinnaavoq

VSB-imut ilitsersuut uani takuneqarsinnaavoq

VSB-mut aamma VVM-imut Naalakkersuisoqarfiup najoqqutassatut piffissaliussaa uani takuneqarsinnaavoq

Suliassaq pillugu tamanut ammasumik tusarniaanerit maluusussaapput:

• Ulluni 35-ni suliassamut nassuiat pillugu piareersaataasumik tusarniaaneq
• Sapaatit akunnerini 8-ni VVM-imi aamma VSB-imi nalilersuinerit pillugit tusarniaaneq kiisalu sumiiffinni kalluarneqartuni tamanut ammasumik tusarniaalluni ataatsimiititsinerit.

Innuttaasut tamarmik tusarniaanermut akissuteqaammik tunniussisinnaapput. Tusarniaalluni ataatsimiititsinernut innuttaasut apeqquteqarsinnaapput suliassamullu ilanngussassanik saqqummiisinnaallutik.

Ingerlatseqatigiiffiup tusarniaanermit nalunaarusiami tusarniaanermut akissuteqaatit tamaasa isummerfigisussaavai aammalu suliassamut nassuiaat aamma tusarniaanermut akissuteqaatit tunngavigalugit VVM-imi aamma VSB-imi nalilersuinerit iluarsaattussaallugit.

Naalakkersuisut tusarniaanermit nalunaarusiaq aamma suliassamut nassuiaat aammalu VVM-imut aamma VSB-imut nassuiaatit inaarutaasut akuersissuteqarfigisussaavaat.

Uuliasiorluni gassisiorlunilu ujarlernermi nunamik sajuppillatsitsisarluni misissuinerit aamma qillerinerit nalinginnaasumik atorneqartarput. Periaatsit marluk taakkua imminnut tapertariipput aammalu nunap ilua pillugu ilisimasaqalernissamut pisariaqarlutik.

Sajuppillatsitsinerup ingerlanerani nunap iluani nipit maligaasat aallakaatinneqartarput. Maligaasat geologiimi qaleriiaani assigiinngitsuni qisuariartitsisarput, taakkualu maligaasat nunap qaavanut uternerat uuttortarneqartarlutik. Paasissutissat taakkua atorneqartarput portussusilimmik, takissusilimmik silissusilimmillu assilianngortitsinermut, uuliaqarfeqarsinnaanersoq gasseqarfeqarsinnaanersorlu tikkuussisinnaasunik. Sajuppillatsitsisarluni misissuinerit pingaartumik nunap iluata ilusaannik takutitsisarput aammalu atortussiassat pillugit toqqaannanngitsunik taamaallaat paasissutissiisarlutik. Taamaattumik paasisat nassuiarneqarneri tamatigut nalorninartortaqartarput.

Taamaattumik sajuppillatsitsisarnermit paasisanit nunap assiliorneq eqqortuunersoq uppernarsinissaanut qillerinissaq pisariaqartarpoq. Qillerinermi ujaqqat toqqaannartumik misissorneqarsinnaapput, misissugassanik tigusisoqarsinnaavoq taakkualu ujaqqat qanoq ittuussusiat misissorneqartarlutik. Tamatumani uuliaqarnersoq gasseqarnersorluunniit aalajangiunneqarsinnaalertarpoq. Taamatut peqarfimmik misissuineq, aamma aningaasaqarnikkut naleqqunnersoq pillugu paasissutissiisarpoq.

Ujarlerluni qillerineq tunisassiornissamut uuliamik puilasuliamik pilersitsinissamik siunertaqartariaqanngilaq. Ujarlerluni qillerinerni pingaartumik siunertaavoq paasissutissanik katersinissaq nalorninartunillu annikillisitsinissaq. Niuerutigineqarsinnaasunik isumalluutinik nassaartoqanngikkaluarpalluunniit, qillerinerit siunissami atorneqartussanik nunap ilua pillugu pingaarutilinnik ilisimasaqalersitsisarput.

Qillerineq maanna aallartissinnaava?
Naamik. VVM-imi aamma VSB-imi nalilersuinerit akuerineqartussaapput. Taakkua tamanut ammasumik tusarniaassutigineqartussaapput, tamatumalu kingorna Naalakkersuisunit akuerineqartussaallutik. Aatsaat tamatuma kingorna qillerinernik suliaqarnissap akuerineqarsinnaalissapput.

Uuliamik qalluinissamut akuersissummik tunniussisoqarsimava?
Naamik. Ujarlernermut tunngasunik aammalu kingusinnerusukkut atuinissaq periarfissaqartillugu akuersissutinik tunniussisoqarsimavoq. Suliassaq suli ujarlernermut immikkoortumiippoq. Qalluinissamut nutaanik akuersissuteqarnissaq pisariaqarpoq.

Ujarlernerup immikkoortua qanoq isumaqarpa?
Tamanna isumaqarpoq, ingerlatseqatigiiffik nunap iluanik misissuissasoq. Uuliamik niuerutigineqarsinnaasutut annertussusilinnik suli nassaartoqanngilaq aammalu tunisassiornissaq pillugu aalajangiisoqarsimanani.

Kalaallit Nunaanni uuliasiorluni suliassanut nutaanut ammaassisoqarpa?
Kalaallit Nunaanni uuliamik ujarlernissamut akuersissutinik nutaanik tunniussiniaratik Naalakkersuisut aalajangersimapput. Nunap Qeqqani / Jameson Land-imi suliassaq akuersissutinik pisoqqanik tunngaveqarpoq.

Sooq akuersissutit suli atuuppat?
Akuersissutit 2021 sioqqullugu tunniunneqarsimapput aammalu ukiuni arlalinni atuuttussaallutik. Piffissap immikkoortuini tamani piumasaqaatit naammassineqarsimappata, taakkua sivitsorneqarsinnaapput.

Oqartussat suliassaq unitsissinnaavaat?
Oqartussat piumasaqaateqarsinnaapput aammalu ingerlatassanut qinnuteqaatit itigartissinnaallugit. Kisianni akuersissutit inatsisitigut atuupput, aammalu atorunnaarsitsineq pinngitsaaliissummik taarsiissutitalimmik pigisanik piginnikkunnaarsitsinermik kinguneqarsinnaalluni.

Kikkut suliassamut tunuliaqutsiippat?
Akuersissutit White Flame Energy A/S-imut tunniunneqarsimapput. White Flame Energy A/S-imut ingerlatseqatigiiffik qullersaqarfiusoq tassaavoq tuluit ingerlatseqatigiiffiat 80 Mile PLC. Ingerlatseqatigiiffik Greenland Energy kukkusumik tamanut paasissutissiisimavoq namminneq akuersissutit pigalugit. Taamaattoq ingerlatseqatigiiffik taanna akuersissutit malillugit piginnittussaatitaanngilaq. Greenland Energy suliassamut aningaasaliisuuginnarpoq ingerlatsisussaaginnarlunilu.

Innuttaasut suliap ingerlanerani akuutinneqassappat?
Tamanut ammasumik tusarniaanerit aamma innuttaasunik ataatsimiititsinerit ingerlanneqartussaapput, tassani innuttaasut immersoqataasinnaallutik. Kikkut tamarmik tusarniaanermut akissuteqaateqarnissamut periarfissaqassapput. Innuttaasut tusarniaanermut akissuteqaatai oqartussat suliassamik nalilersuineranni aamma Naalakkersuisut aalajangiineranni ilaatinneqassapput.

Naalakkersuisut suliassamut aningaasaliisimappat?
Naalakkersuisut piginneqataanngillat aammalu suliassamut aningaasalersuinatik.

Kia suliassaq akilerpaa?
Piginnittussaatitaasoq taamaaliorpoq.

Kalaallit Nunaat suliassamit aningaasanik pissarsissava?
Oqaatigissallugu siusippallaarpoq. Tamatumunnga uuliaqarnersoq aammalu tunisassiornissaq akuerineqassanersoq apeqqutaasussaapput. Akuersissutini piiaanermut qaavatigut akiliutit (royalty) aalajangersakkami aalajangersarneqareerput.

Uuliamik nassaartoqarpa?
Suli nassaartoqanngilaq. Niuerutigineqarsinnaasutut annertussusilinnik uuliaqarnersoq suli ilisimaneqanngilaq. ”Niuerutigineqarsinnaasutut annertussusillit” oqaluuserineqarput, tassami nunap iluani uuliaqarsinnaallunilu gasseqarsinnaammat, kisianni annertussusai naammanngissinnaapput imaluunniit allanik peqqutilimmik qalluinissaq akisuallaarsinnaavoq pisariuallaarsinnaallunilu. Niuerutigineqarsinnaasutut annertussusillit tassaavoq uulia aamma gassi atuinermi tunisassiornermilu sinneqartooruteqarfiusoq.

Qanoq sukkatigisumik uuliamik tunisassiortoqalersinnaava?
Nassaartoqaraluarpalluunniit tunisassiornerup aallartissinnaalernissaanut ukiorpassuit ingerlasinnaapput.

Pinngortitaq avatangiisillu qanoq illersorneqassappat?
Ingerlatassanut akuersissutinik tunniussisoqarsinnaalinnginnerani avatangiisinut sunniinissat VVM-imi suliap ingerlaneratigut misissorneqartussaapput. VVM (avatangiisinut sunniutaasinnaasunik nalilersuineq) taanna akuersissuteqarsinnaalinnginnermi tamanut ammasumik piareersaataasumik tusarniaassutigineqartussaavoq, tamatumalu kingorna tamanut ammasumik tusarniaassutigineqartussaalluni. Aamma oqartussat tungaanniit nakkutilliisoqartussaavoq.

VVM aamma VSB suuppat?
VVM-imi avatangiisinut pinngortitamullu sunniinissat nalilersorneqartarput.
VSB-imi inuiaqatigiinnut aningaasaqarnermullu sunniinissat nalilersorneqartarput.

Sumiiffik immikkut illersorneqarpa?
Sumiiffimmiipput RAMSAR-eqarfiit, tassaasut masarsoqarfiit nunani tamalaani illersugaasut.

Sumiiffinni illersugaasuni sulisoqarsinnaava?
Aatsaat maleruagassanut taakkua naapertuuppata. Akuersissutit sumiiffinni illersugaasuni ingerlaannartumik ingerlatassanut pisinnaatitaaffiliinngillat.

Najukkameersut suliffeqalersinnaappat?
Suliassaq, nalilersuinerit pisussat ingerlatassallu ataasiakkaat apeqqutaasussaapput. Ingerlatseqatigiiffiup ingerlatassaasa ilaattut sullivissat suut pilersinneqassanersut, ingerlatseqatigiiffiup VSB-iani ilaatigut nassuiarneqassapput. VSB-ip (inuiaqatigiinnut sunniutaasussanik nalilersuineq) tamanut ammasumik tusarniaassutigineqarnerani innuttaasut tusarniaanermut akissuteqaateqarnissamut periarfissaqassapput.

Innuttaasut najukkameersut suliffissanut salliusussaatitaalissappat?
VSB-imi aammalu kingusinnerusukkut isumaqatigiissutini (IBA) tamanna paasinarsisinneqassaaq.

IBA-mi (sunniutissat iluaqutissallu pillugit isumaqatigiissut, IBA) isumaqatigiissut sunaava?
Inuiaqatigiinni piujuartussamik iluaqutaasumik sunniuteqartitsinissaq pillugu isumaqatigiissut, Naalakkersuisut, kommunip pineqartup aamma ingerlatseqatigiiffiup akornanni isumaqatigiissutigineqartoq. Isumaqatigiissutip ilaatigut imarisinnaavai najukkameersunik atorfinitsitsinissamut, ilinniartitaanermut, piginnaanngorsaanermut najukkameersunillu pilersuisoqarnissamut siunnerfiit.

IBA qaqugukkut isumaqatigiissuteqarfigineqartarpa?
VSB-imi nalilersuinerit tamanut ammasumik tusarniaassutigineqareerpata aammalu VSB-imut nassuiaat akuerineqareerpat, aatsaat IBA pisussanngortussaavoq.

Ingerlatseqatigiiffik najukkami ingerlatassanut tapersiisinnaava?
Aap, kisianni maleruagassiivigineqarpoq aammalu oqartussanit akuersissuteqarnissaq pisariaqarsinnaalluni.

Suliassamut qanoq nakkutilliisoqassava?
Oqartussat ingerlaavartumik nakkutilliipput aammalu qinnuteqaatinik ingerlatassanillu nalilersuillutik.

Piumasaqaatit malinneqanngippata susoqassava?
Oqartussat qinnuteqaatit itigartissinnaavaat, peqqussutiliorsinnaapput aamma /imaluunniit ingerlatassat unitsissinnaallugit. Naggataatigut akuersissutip utertinneqarnera pineqartussanngorsinnaavoq.