Imarisassat tusarnaarlugit atuarlugitInuussutissarsiornermut Aatsitassanullu Naalakkersuisoqarfik
Inuussutissarsiorneq aamma niuerneq
Inuussutissarsiornermut niuernermullu immikkoortortaqarfik
Inuussutissarsiornermut Niuernermullu immikkoortortaqarfiup Kalaallit Nunaanni inuussutissarsiornerup nukittorsarnissaa sulissutigaa – najukkani nunanilu tamalaani. Immikkoortortaqarfiup siuariartortitsinissaq, aallarnisaasarnerit aammalu niuerfinniissinnaanermik politikkikkut ineriartortitsineq, suleqateqarnerit ataasiakkaatigullu suliniuteqarnerit aqqutigalugit tunngavissippai.
Immikkoortortaqarfiup inuussutissarsiornermut niuernermullu suliassaqarfiup iluani ingerlatsinermi Naalakkersuisoqarfimmilu suliassat isumagisarai. Tassani ilaatigut ilaapput inuussutissarsiornermut inatsisinik maleruagassanillu suliaqarneq, inuussutissarsiornermi suliassaqarfinni, soorlu takornariartitsinermi, sermimik imermillu avammut nioqquteqarnermut kiisalu niuernermut, qitiusuni atugassarititaasunut killissaliussanik misissueqqissaarnerit, aammalu suliniutissanut, inuussutissarsiornermik ineriartortitsinermik nukittorsaasussanut, siunnersuuteqarnerit.
Immikkoortortaqarfik politikkikkut aalajangiisartut qanillugit sulivoq, aammalu suliaqarnerup annertunerpaartaani aalajangiinissamut tunngavissanik piareersaaneq aammalu Naalakkersuisut anguniagaannik Inatsisartullu aalajangiinerinik malitseqartitsineq suliarisarlugit.
Inuussutissarsiutinik siuarsaanermi suliniutissat aamma Immikkoortortaqarfiup aamma akisussaaffigai, ilanngullugu aallarnisaasunut tapersiisarneq, aammalu periusissatigut suliniutit, suliffissuaqarnermi suliniutit suliassanilu angisuuni suliniutit, oqartussanut allanut ingerlatsisunullu ataqatigiissaarlugit, passuttarlugit.
Inuussutissarsiornermut Niuernermullu immikkoortortaqarfik tamatuma saniatigut Kalaallit Nunaata nunani tamalaani niuernermi atassuteqarneranik siuarsaalluni eqeersimaartumik sulivoq. Tassani ilaapput niuernermi isumaqatigiissutinik ineriartortitsineq aqutsinerlu kiisalu nunani tamalaani suleqatigiinnerni, kalaallit suliffeqarfiisa nunarsuarmi niuerfinniilersinnaanerannik tunngavissiisuni, peqataasarneq. Immikkoortortaqarfik niuernikkut isumaqatigiissutit pillugit politikkikkut aalajangiinissanut piareersaaqataasarpoq aammalu Kalaallit Nunaata soqutigisaasa isumagineqarnissai qulakkeertarlugit. Nunani tamalaani suleqatigisartakkat periusissatigut oqaloqatiginerisigut ataqatigiissaarinikkullu immikkoortortaqarfik piujuartussamik niuernermut avammullu nioqquteqarnermut sinaakkutisseeqataasarpoq.
Immikkoortortaqarfik allaffinni marlunni, tamarmik immikkut suliassaqarfinni ukkatarinnittuni, aaqqissuussaavoq:
- Inuussutissarsiornerup ineriartortinneqarneranut Aallarnisaasarnernullu allaffik
- Nunani Tamalaat Suleqatigiinnerannut Inatsisilerinermilu allaffik
-
Suliassaqarfiit
Inuussutissarsiornerup ineriartortinneqarneranut Aallarnisaasarnermullu allaffik
Allaffimmi tassani Kalaallit Nunaat tamakkerlugu siuariartortitsinermut nutaaliornermullu sinaakkutissanik pitsaasunik pilersitsinissaq ukkatarineqarpoq – aallarnisaasarnerit, takornariartitsineq suliassaqarfiillu nutaat immikkut ukkatarineqarlutik.
Allaffimmi ilaatigut suliarineqartarput:
Inuussutissarsiornermut politikki aamma suliassaqarfinnut pilersaarutit ilaatigut takornariartitsinermut, aallarnisaasarnernut aamma sermimik imermillu avammut nioqquteqarnermut periusissianik ineriartortitsivugut.Kiffartuussinissamut isumaqatigiissutit
Ilaatigut Visit Greenland-imut, Nalik Ventures-imut aamma Great Greenland-imut kiffartuussinissamut isumaqatigiissutit aqutsivigaagutAallarnisaasarnerit aamma nutaaliorneq
Aallarnisaasunut avatangiisit nukittorsarpagut aammalu suliniutissat nunarput tamakkerlugu nutaaliornermik siuarsaasussat tapersersorlugit.
Takornariartitsinermi ineriartortitsineq
Takornariartitsinermut suliassaqarfimmut pilersaarut 2025–2035, inuussutissarsiortut soqutigisaqaqatigiinnullu attuumassutillit qanimut suleqatigalugit atuutsilerparput.Oqaloqatigiinneq atassuteqarfinnullu attaveqarneq
Najukkani nunallu immikkoortuini attaveqarfinni eqeersimaartumik peqataavugut aammalu kommunit inuussutissarsiornermullu siunnersuisoqatigiit qanimut suleqatigalugit.
Uumassusillit sananeqaataannit isumalluutit aamma avammut nioqquteqarnissamut akuersissutit
Kalaallit Nunaanni pinngortitami pisuussutit isumalluutit ilisimatusarfigineqarnissaat niuerutigineqarsinnaalernissaallu pillugit suliassat suliarisarpagut aammalu avammut nioqquteqarnissamut akuersissutinik tunniussisarluta.
Nunani Tamalaani Suleqatigiinnernut Inatsisilerinermillu allaffik
Allaffimmi tassani inatsisilerinerup, nunani tamalaani suleqatigiinnerup, niuernerup, aningaasaliinerit periusissatigullu inuussutissarsiornermik ineriartortitsinerup naapiffiini sulivugut.
Allaffimmi ilaatigut suliarineqartarput:
Inatsisit aamma inatsisilerinikkut siunnersuineq
Inatsisissanut siunnersuutinik nalunaarutinillu suliaqartarpugut aammalu inuussutissarsiornermut suliassaqarfimmi inatsisilerinikkut apeqqutit pillugit politikerinik atorfilittanillu siunnersuisarluta.Niuerneq aningaasaliisarnerillu
Kalaallit Nunaanni suliffeqarfinnut niuernermut isumaqatigiissutit, niuerfinniilernissaq, aningaasaliinerit avammullu nioqquteqarnissamut periarfissat suliarisarpagut.Nunani tamalaani atassuteqarfiit
Nunani allani oqartussanik kattuffinnillu suleqateqarnerit isumagisarpagut – ilaatigut Joint Committee aqqutigalugu USA-mut, Nunani Avannarlerni Ministerit siunnersuisooqatigiit aamma EU-mi pilersaarutit soorlu Interreg NPA.
Angalaqatigiittartut aamma inuussutissarsiornermi tuniniagassanik pilerisaarisarneq
Inuussutissarsiortut angalaqatigiittussat pisortatigoortumillu tikeraarnerit, Kalaallit Nunaannik nunani tamalaani ersarinnerulersitsisussat aammalu nunani tamalaani niuernikkut atassuteqarnermik nukittorsaasussat, pilersaarusiortarpagut ataqatigiissaartarlugillu.