Naalakkersuisut nalilerpaat, Nunap Qeqqani / Jameson Landimi pilersaarutaasumik qillerinissat 2026-2027-p ukiuunerani ingerlanneqarsinnaanngitsut

Naalakkersuisut nalilerpaat, Nunap Qeqqani / Jameson Landimi qillerinissamik White Flame Energy A/S-ip siunnersuuteqarnera 2026/2027-p ukiuunerani ingerlanneqarsinnaanngitsoq. Pisariaqartumik oqartussat suliaqarnerat naammassineqarsinnaanngilaq, tamannalu pillugu qillerinissap pilersaarutaasumik aallartinnginnerani akuersissutit pisariaqartut pigineqalersinnaanatik.

Inuussutissarsiornermut Aatsitassanullu Naalakkersuisoqarfiup White Flame Energy A/S, Nunap Qeqqani / Jameson Landimi uuliamut akuersissutinut piginnittussaatitaasoq juulimi ataatsimeeqatigaa. 2026/2027-p ukiuunerani ujarlerluni qillerisinnaanissamut piffissaliussaagallartoq ingerlatseqatigiiffiup ataatsimiinnermi saqqummiuppaa. 

Piffissaliussamut sukangangaatsiartumut Naalakkersuisoqarfiup ernumalluni ataatsimiinnermi oqaatigaa, qillerinissallu akuerineqartinnagit oqartussat suliassaat saqqummiullugit. Naalakkersuisoqarfiup ataatsimiinnermi aalajangersimasumik oqaatigaa, ingerlatseqatigiiffik pilersaarummut assigiinngitsunik periarfissaqaraluartoq allanngortinneqarsinnaanngitsumik imaluunniit naleqqussarneqarsinnaanngitsumik aalajangersimasumik, inatsisitigullu aalajangersarsimasumik suleriaaseqartoq. 

Oqartussat suliaqarnerini ilaatigut Inuiaqatigiinnut Sunniutaasinnaasunik Nalilersuineq (VSB) aamma Avatangiisinut Sunniutaasinnaasunik Nalilersuineq (VVM) kiisalu pisariaqartumik tamanut tusarniaanissat suliassaapput.

Oqartussat suliassaat, tusarniaanissallu atuuttut tunuliaqutaralugit Naalakkersuisoqarfik VSB-mik aamma VVM-imik suliaqarnissamut najoqqutassatut piffissaliussamik suliaqarpoq. Najoqqutassatut piffissaliussaq “uani: Suliap ingerlanera”  takuneqarsinnaavoq. 

Periarfissamik neriulluarnartumik piffissaliussaq ersersitsivoq. Tassani piginnittussaatitaasumit uppernarsaatit tamarmik tamakkiisuusariaqarput, naammattumillu pitsaassuseqartariaqarlutik. Oqartussat attuumassuteqartut annerusumik uppernarsaatissanik pisariaqartitsinatik paasissutissat misissorsinnaassavaat, nalilersorsinnaassavaat, akuerisinnaassallugillu. Taakkua tunngaviugaluartut nalilerneqarpoq, pisariaqartumik akuersissutit 2026/2027-p ukiuunera tikitsinnagu pigineqartussanngorlugit suliaq piffissaagallartillugu naammassineqarsinnaanngitsoq.

Ilassutitut paasissutissat, allannguinissaq imaluunniit atortussat nutaanerusut pisariaqartinneqarpata suliaq sivisunerusinnaavoq.

Piareersaataasumik ingerlatsinerit aamma aallartinneqarsinnaanngillat

Qillerinissamik pilersaarummi piareersaataasumik ingerlatassat naliliinermi aamma ilaatinneqarput. Ilaatigut aaqqissuussineq, qillerinissamullu atortussanik nunnigussineq kiisalu sumiiffimmi akuersissuteqarfiusumi ineqarfissamik pilersitsineq pineqarput. 

Ingerlatassat taakku qillerinissamut atasutut isigineqassapput, tamannalu pillugu VVM-imik aamma VSB-mik suliat naammassineqartinnagit, oqartussaniillu akuersissutit pisariaqartut pigineqartinnagit aallartinneqarsinnaanatik.

Suliniummi suliassat arlaqartut oqartussanit suliarineqarput

2026-mi misissuiffimmi ingerlatsinissamik qinnuteqaat Aatsitassanut Oqartussat massakkut suliaraat. Sumiiffimmi akuersissuteqarfiusumi uumassusilinnut tunngatillugu tunulequtaasumik misissuinissaq kiisalu atortussanik Tasiilamit sumiiffimmut akuersissuteqarfiusumut assartuinissaq qinnuteqaatini qinnutigineqarput. Atortussat pineqartut Nerlerit Inaannut apuunneqareerput.

White Flame Energy A/S-ip qillerinissamik qinnuteqaataa Aatsitassanut Oqartussat ilutigisaanik suliaraat.

Taakkua saniatigut VSB-mut suliarisassat allassimaffiat piginnittussaatitaasup nutartigaa Aatsitassanut Oqartussat utaqqivaat. Qillerinissamik pilersaarummut atatillugu ingerlatassatut qinnuteqaatinik allanik massakkut tigusisoqarnikuunngilaq.

Tamanna pillugu Naalakkersuisut naatsorsuutigaat, White Flame Energy A/S-ip pilersaarusiornini naleqqussassagaa, suliniummullu piffissaliussaq nutartigaq, piviusorsiorpalaartorlu suliarissagaa.

Suliap ingerlanissaa pillugu Naalakkersuisut White Flame Energy A/S-imik suli oqaloqateqarput.

Uuliasiorluni suliniut pillugu quppernermik paasissutissiisumik Naalakkersuisut pilersitsipput, taannalu uani takuneqarsinnaalluni.

Attavissaq
Tusagassiorfinnit saaffiginnissutit: Jørgen T. Hammeken-Holm, tlf. 346800 imaluunniit asn@nanoq.gl
Saaffiginnissutit allat: Akuersissutinut immikkoortortaqarfik, tlf. 346800 imaluunniit mlsa@nanoq.gl kiisalu Aatsitassanut Suliassaqarfimmi Avatangiisinut Aqutsisoqarfimmi eamra@nanoq.gl.