Matumuuna tamanut tusarniaassutigineqarluni nassiunneqarpoq uunga siunnersuut: Illunut sanaqataaffiusunut taarsigassarsiat pillugit Inatsisartut inatsisaat.

Siunnersuut 2026-mut aningaasanut inatsimmi illunut sanaqataaffiusunut taarsigassarsisitsisarnerup kommuninit Naalakkersuisunut angerlaanneqarnera pillugu aalajangiinermi aallaaveqarpoq. Illunut sanaqataaffiusunut taarsigassarsisitsisarneq nunaqarfinni illoqarfinnilu minnerusuni ineqarnikkut pilersuinermik tapersersuinermi pingaaruteqartumik sakkugineqarsimavoq, sumiiffinni taakkunani nalinginnaasumik niuernermi tunngaveqartumik ineqarnermut aningaasalersuinissamut periarfissat killeqarnerat imaluunniit anguniakkanut naapertuuttumik pissarsiarineqarsinnaannginnerat pissutigalugu.

Siunnersuummi siunertaavoq illunut sanaqataaffiusunut taarsigassarsisitsisarneq ataatsimoortumik Namminersorlutik Oqartussanit aqunneqartussanngorlugu aaqqissuussinissaq. Siunnersuummi aaqqissuussinerup maanna atuuttup siunertaa ilusialu pingaarnerusutigut ingerlateqqinneqarput, peqatigisaanillu nuna tamakkerlugu atuuttussamik ataasiiaartumik nutarterneqartumillu maleruagassiisoqarluni. Naalakkersuisut kommuninit taarsigassarsisitsisinnaanermut aamma oqartussatut suliassanik isumaginninnermut piginnaatitaaffiit tigussavaat, taamaalillunilu aaqqissuussineq allaffissornikkut Namminersorlutik Oqartussani ataatsimoortinneqassalluni.

Siunnersuummi ilaatigut maleruagassiivigineqarput taarsigassarsisitsinissamut piumasaqaatit, taarsigassarsinissamik neriorsuutit, illunik sanaqataaffiusunik sanaartorneq aamma pissarsineq, aningaasaqarnikkut atugassarititaasut, qinnuteqartumut piumasaqaatit, najugaqartussaatitaaneq, attartortitsineq, utertitsilluni tigusisarneq kiisalu aaqqissuussinermut nutaamut ikaarsaariarneq.

Siunnersuut ilaatigut kinguneqassaaq taarsigassarsiat suli erniaqaratillu akilersugassaanngitsutut ukiut 20-t ingerlaneranni nalikilliartortillugit tunniunneqartassasut, illunut sanaqataaffiusunut ilusiliunneqarsimasumik akuerineqarsimasunut aallaaviusumik taarsigassarsisitsisoqarsinnaassasoq, aammalu pisortanut akiitsut suli akilerneqartussaatillugit najugaqartussaatitaaneq attatiinnarneqassasoq. Siunnersuummi aamma periarfissiissutigineqarpoq, taarsigassarsinissamik neriorsuut atorunnaarpat, Naalakkersuisut illumik sanaqataaffiusumik suli naammassineqanngitsumik pissarsinissamut taarsigassarsisitsisinnaassasut.

Siunnersuummi aammattaaq qinnuteqartunut piumasaqaatit naleqqussarneqarput, ilanngullugit illoqarfimmut imaluunniit nunaqarfimmut illup sanaqataaffiusup sananeqarfigineqartussaanut imaluunniit pissarsiarineqartussaanut qinnuteqartup atassuteqarnissaa pillugu maleruagassat. Aammattaaq siunnersuutigineqarpoq inuit ilinniarnerminnik naammassinneqqammersut, aammalu ilinniarnertik pissutigalugu ukiuni akileraarusiiffiusuni tallimani kingullerni inuussutissarsiortuusimanngitsut, immikkut ittumik taarsigassarsitinneqarsinnaassasut.

Siunnersuummi aamma taarsigassarsianut atuuttunut, taarsigassarsinissamik neriorsuutaareersunut kiisalu suliat aallartinneqareersut ikaarsaariarnermi qanoq pineqarnissaat maleruagassiivigineqarpoq. Siunertaavoq kommuninit allaffissornikkut ingerlatsinerup maanna atuuttup Namminersorlutik Oqartussanit ataatsimoortumik aqunneqartussamut ikaarsaarnissaa erseqqissumik ingerlanneqassasoq, aammalu innuttaasut taarsigassarsianik imaluunniit taarsigassarsinissamik neriorsuutaareersunik peqartut angerlaassinerup malitsigisaanik nutaamik qinnuteqartariaqassanngitsut.

Siunnersuut ataatsimut isigalugu illunut sanaqataaffiusunut taarsigassarsisitsisarnerup ataasiiaartumik aqunneqarnissaa aammalu Namminersorlutik Oqartussat nunaqarfinni illoqarfinnilu minnerusuni ineqarnikkut pilersuinermik tapersersuinissamut periarfissaasa nukittorsarneqarnissaat siunertaralugu saqqummiunneqarpoq.

Tusarniaanermut akissuteqaatit sapinngisamik erseqqissuutinneqarnissaat aammalu pisariaqarpat oqaasertanut allannguutissatut siunnersuutinik imaqarnissaat kissaatigineqarpoq.

Tusarniaanerup imarivai: Siunnersuut, nassuiaatit kiisalu tusarniaanermi allagaq. Tusarniaanerup imarisa saqqummersinneqassapput www.Naalakkersuisut.gl

Tusarniaanermut akissuteqarnissamut killiliussaq: 28. augusti 2026, nal. 12.00

Oqaaseqaataasinnaasut nassiunneqarsinnaapput uunga: Ineqarnermut Attaveqaasersuutinut Isorliunerusunut Upalungaarsimanermullu Naalakkersuisoqarfimmut pisortatigoortumik mailadressianut box909@nanoq.gl, cc-erlugu stsa@nanoq.gl.

Imaluunniit allakkatigut uunga nassiunneqassapput: Ineqarnermut Attaveqaasersuutinut Isorliunerusunut Upalungaarsimanermullu Naalakkersuisoqarfik, Postboks 909, 3900 Nuuk.

Tusarniaanermi akissuteqaatit saqqummiunneqassapput Naalakkersuisut tusarniaanermi nittartagaanni.