Tusarniaaneq pillugu ”Siunnersuut uunga: Sulisitsisup sulinermik inuussutissarsiuteqartumik atorfeqarnermi atugassarititaasut pillugit ilisimatitsisussaaneranut Inatsisartut inatsisaata (atorfeqarnermik uppernarsaasarnermut inatsisip) atuutilernissaa pillugu Namminersorlutik Oqartussat nalunaarutaat”
Tusarniaanermik allaatiginninneq:
Matumuuna Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfiup Sulisitsisup sulinermik inuussutissarsiuteqartumik atorfeqarnermi atugassarititaasut pillugit ilisimatitsisussaaneranut Inatsisartut inatsisaata (atorfeqarnermik uppernarsaasarnermut inatsisip) atuutilernissaa pillugu Namminersorlutik Oqartussat nalunaarutaatut missingiut nassiuppaa.
Tunuliaqutaasut
Sulisitsisup sulinermik inuussutissarsiuteqartumik atorfeqarnermi atugassarititaasut pillugit ilisimatitsisussaaneranut Inatsisartut inatsisaat (atorfeqarnermik uppernarsaasarnermut inatsit) nr. 16, 21. november 2022-meersoq Inatsisartut 2022-mi ukiakkut ataatsimiinneranni suliarineqarpoq akuersissutigineqarlunilu. Inatsimmi § 7, imm. 2 naapertorlugu taanna Naalakkersuisut nalunaarummik aalajangersaanerisigut atuutilertussaavoq. Inatsimmut oqaaseqaatini allaqqasoqarpoq:
”Sulisitsisut eqqarsaatigalugit Inatsisartut inatsisaata atuutilerfissaa qaammatinik arfinilinnik sioqqullugu nalunaarut tamanut ammasumik saqqummiuneqartariaqarpoq.”
Nalunaarut naatsorsuutigineqarpoq atuutilissasoq kingusinnerpaamik ulloq 31. december 2024, taamaalilluni Inatsisartut inatsisaat atuutilissasoq ulloq 1. juli 2025 aalajangersarneqarluni. Allatut oqaatigalugu inatsit ulloq 21. november 2022-mi akuersissutigineqarpoq aamma atuutilissalluni ulloq 1. juli 2025-mi, ukiut marluk affarlu qaangerlugit.
Naalakkersuisut isumaqarput, sulisitsisut, pisortat namminersortullu, taamaalillutik inatsisip piviusunngortinnissaanut atatillugu nalimmassaanissamut naammattumik pisariaqartumillu piffissaqartut.
Tusarniaaneq ataatsimut isigalugu
Oqaaseqaataasinnaasut inussiarnersumik qinnutigineqarpoq nassiunneqassasut uunga; Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfimmut isn@nanoq.gl aqqutigalugu Mehdi Shams mehs@nanoq.gl assilineranik ilanngullugu.
Tusarniaanermut akissutinut piffissaliussaq kingusinnerpaaq ulloq 04.12.2024