Uunga siunnersuummut tusarniaaneq: Piginneqatigiilluni inissiat pillugit Inatsisartut inatsisaata allanngortinnissaa pillugu Inatsisartut inatsisaat (inissiat attartortittakkat allanngortinnerat, kaaviiaartitsinissamut inerteqqut il.il.)

Uunga siunnersuut: Piginneqatigiilluni inissiat pillugit Inatsisartut inatsisaata allanngortinnissaa pillugu Inatsisartut inatsisaat (inissiat attartortittakkat allanngortinnerat, kaaviiaartitaqarnissamut inerteqquteqartitsineq il.il.) tamanut tusarniutigineqarnera. 

Siunnersuutip immikkoortui pingaarnerit

• Inissiat attartortittakkat piginneqatigiilluni inissianut allanngortinnerat. Aalajangersakkamik ilanngussisoqarpoq, taannalu atorlugu Naalakkersuisut kommunalbestyrelsillu inissiat attartortittakkat pioreersut piginneqatigiilluni inissiatut allanngortinnissaannut piginnaatinneqarput, matumani attartortunit pioreersunit isumaqataasoqarnissaa piumasarinngikkaluarlugu.    Siunnersuummi inissiat attartortittakkat pisortanit pigineqartut amerlassusiisa ikilisaaffiginissaat, innuttaasullu amerlanerit inissiamik namminneerlutik pilersulernissaannut anguniagaqarnissaq siunertarineqarpoq.    
  
  Allanngortitsisoqarnerani Naalakkersuisut kommunalbestyrelsilu piginneqatigiilluni inissiat attartoreersunut iliuuseqarlutik tunisisarnissaannut, inoqanngitsoqartillugulu piginneqatigiilluni inissiaatillit peqatigiiffiat aqqutigalugu tunisisarnissamut, pisussaaffeqarput. Attartortooreersut piginneqatigiilluni inissiami allanngortinneqartumi najugaqaannarnissamut pisinnaatitaaffeqarput.  
  
  Naalakkersuisut kommunalbestyrelsillu piginneqatigiilluni inissiat pillugit Inatsisartut inatsisaanni killiliunneqartut atuuttut iluanni inissiat attartortittakkat pisiarinissaannut piginneqatigiilluni inissiaatillit peqatigiiffiannut taarsigassarsisitsisinnaanissaat siunnersuutigineqarpoq.    Pisinermi inerniliunneqartoq tamatuma saniatigut nammineerluni aningaasaliinikkut aningaaserivimmiluunniit imaluunniit taarsigassarsisitsisarfimmi taarsigassarsinikkut aningaasalersorneqartariaqarpoq.   
  
  Piginneqatigiilluni inissianik inoqanngitsunik tuniniaanerup akuttoqatigiissillugu pisarnissaa anguniarneqartariaqarpoq, matumani inissianut nammineq pigisanut neqeroornerit piumanerillu akornanni sapinngisamik pigiinnarnissaat anguniarlugu. Taamaammat Naalakkersuisut aamma kommunalbestyrelse piginneqatigiilluni inissiat inoqanngitsut neqeroorutiginissaasa pinngitsoortinnissaanut, paarlattuanillu piginneqatigiilluni inissiat inoqanngitsut allamut attartortinnissaannut aammalu inissiat nammineq pigisat pillugit niuerfiup piginneqatigiilluni inissiat inoqanngitsut pisiaqarnissaa tikillugu aalajangiisinnaapput. Allamut attartortitsisarneq piumasaqaatit piffissamik killilikkat atorlugit sivitsuinissamut periarfissaqartitsilluni pisassaaq. 
  
  
• Pisortani qularnaveeqqusiinermut allakkat - kaaviiaartitanut qularnaveeqqusiinermut allakkat pinnagit. Aalajangersakkamik qularnaveeqqusiinermut allagartat akiitsunullu allagartat Illuliortiternernut aningaasalersuisarneq pillugu Inatsisartut inatsisaat massakkut atuuttoq imaluunniit siusinnerusukkut illuliortiternernut aningaasalersuisarneq pillugit inatsisaasimasut naapertorlugit pisortanit taarsigassarsiarineqartunut ilaasumik pisortanut tunniunneqartut kaaviiaartitanut, qularnaveeqqusiinernut imaluunniit akiligassanik malersuinissanut atuisoqartannginnissaanut eqqussisoqarpoq.    
  
  
• Inissiap angissusianik naatsorsuineq. Inissiaq illup iluani tummeraqarsimassappat piginneqatigiilluni inissiap annertussutsimigut qanoq naatsorsuiffigineqarsinnaanera erseqqissarneqarpoq. Tassunga atatillugu sanaartorneqartup ilusaata pisariaqartissimappassuk inissiap angissusaata tapiiffigineqarsinnaasup naatsorsuiffiginissaa pillugu malittarisassanik Naalakkersuisut immikkut akuersissuteqarsinnaanerat siunnersuutigineqarpoq.
  
  Sanaartukkanut naatsorsuutit uppernarsakkat. Kiap sanaartukkanut uppernarsaasarnissaanut erseqqissaanermik ilanngussisoqassaaq.  Taamaalilluni sanaartukkanut naatsorsuutit siunissami taamaallaat kukkunersiuisartumit nalunaarsorneqartumit imaluunniit naalagaaffimmit akuerisaasumit imaluunniit Kalaallit Nunaanni aningaaserivimmit uppernarsarneqartartussaassapput.  
  
  
• Najugaqarfissatut atuisarneq: Piginneqatigiilluni inissiap najugaqarfigineqarsinnaanerata saniatigut inissiaq siunertanut allanut atorneqaqqusaanngilaq.  
  
  Piginneqatigiilluni inissiaatillit peqatigiiffianni ilaasortap piginneqatigiilluni inissiamut atuinissamut pisinnaatitaaffillip taassumalu inoqutigiivisa inissiamiit piginneqatigiiffiusumiit inuussutissarsiummik namminersorfiusumik mikinerusumik ingerlatsisinnaanerat ataatsimeersuartitsisunit akuersissutigineqarsinnaavoq.  Inuussutissarsiortut namminersortut mikinerusut pisisartut pulaartarnerannik kinguneqartitsissanngillat.   

Siunnersuummut, tassani siunertamut imarisanullu tunuliaqutaasut sukumiinerusumik paaserusunneqarpata siunnersuummut nassuiaatit ilanngullugit nassiunneqartut kiisalu inissianut aningaasalersuisarnerit pillugit aaqqissuussinerit, immikkoortoq 2-miittut Naalakkersuisut nittartagaanni nassaarineqarsinnaasut innersuussutigineqarput: https://naalakkersuisut.gl/Departementer/Dep_for_Boliger_og_Infrastruktur/Publikationer?sc_lang=kl-GL 

Oqaaseqaataasinnaasut Ineqarnermut Attaveqaasersuutinullu Naalakkersuisoqarfimmut kingusinnerpaamik ullormi 16. septembari 2024 nal. 12:00 nassiuteqquneqarput. Oqaaseqaatit naalakkersuisoqarfiup pisortatigoortumik e-mailianut box909@nanoq.gl-imut imaluunniit uunga:

Ineqarnermut Attaveqaasersuutinullu Naalakkersuisoqarfik
Postboks 909
3900 Nuuk