Suleriutsit inissinneqarnerisa maleruagassaasa inatsit ataatsimoortitanngorugit siunnersuutigineqarnerat aamma siunnersuummut tunngatillugu nalunaarutit sisamat pillugit tusarniaaneq

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik (ataani Naalakkersuisoqarfittut taaneqartassaaq) matumunnga tamanut tusarniaassummik siunnersuusiarisaminnik nassiussaqarpoq:

- Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaata allanngortinneqarnissaanut, Inissianik attartortitsisarneq pillugu Inatsisartut peqqussutaat pillugu Namminersorlutik Oqartussat nalunaarutaata allanngortinneqarnissaanut, Unammilleqatigiinneq pillugu Inatsisartut inatsisaata allanngortinneqarnissaanut, Siusinaartumik pensionisiat pillugit Inatsisartut inatsisaata allanngortinneqarnissaanut, Pisortat Pisiortortarneranni Neqerooruteqartitsinermi Maalaaruteqartarfik pillugu Inatsisartut inatsisaata allanngortinneqarnissaanut, Pinngortitamik illersuineq pillugu Inatsisartut inatsisaata allanngortinneqarnissaanut siunnersuutit (Suleriaatsit inissinneqartarneri pillugu inatsisinik allannguineq)
- Unammilleqatigiinnermut Ataatsimiititaliap suliassai pillugit Namminersorlutik Oqartussat nalunaarutaannut siunnersuut
- Ineqarneq pillugu maalaaruteqartarfiup sulinera pillugu Namminersorlutik Oqartussat nalunaarutaannut siunnersuut
- Siusinaartumik pensionisiaqarnermut maalaaruteqartarfik pillugu Namminersorlutik Oqartussat nalunaarutaannut siunnersuut
- Pinngortitap illersorneqarnera pillugu naammagittaalliuuteqartarfik pillugu Namminersorlutik Oqartussat nalunaarutaannut siunnersuut

Tusarniaassummut oqaaseqaatit Naalaakkersuisoqarfimmut kingusinnerpaamik ulloq 23. april 2024 nassiunneqarsimassapput. Oqaaseqaatit uunga mailerluni nassiunneqassapput isiin@nanoq.gl

Siunertaq:
Inatsisartut Inatsisaannut siunnersuut maalaaruteqartarfiup aalajangiisartullu allatseqarfiisa maalaarutinik suliaqarnerinut sukkatsisaataanissaa siunertarineqarpoq, tamannalu innuttaasunut suliffeqarfinnullu iluaqutaasussaalluni, tassani sullissineq pilertornerusumik assigiimmillu nalingiisitsilluni sullissineq ingerlanneqalersinnaaniassammat.

Siunnersuut maalaaruteqartarfinnut, siunnersuummi eqqaanertunut, suleriusissaat namminneq inatsisitigut tunngavissaqarlutik inissititersinnaaniassavaat. Ullumikkut tamanna Naalakkersuisuniit suliarineqartarpoq, taakkunannga maalaaruteqartarfiit arlallit suleriusissaat inissititertarmassuk, taamaasilluni aalajangiisartut maalaaruteqartarfiillu tamarmik immikkut suleriuseqarlutik.

Maannakkut suleriuseq atorneqartoq pissusissamisooranilu ingerlatsinermi oqimaatsumik ingerlanneqarpoq, taamaattumik assigiimmik sukkanerusumillu aamma ajornannginnerusumik suleriuseqarnissaq kissaatigineqarluni.

Nalunaarutit sisamat pillugit siunnersuutit
Inatsit ataatsimoortup pilersinneqarnissaanut siunnersuut atuutsinneqalerpat nalunaarutit sisamat atorunnaarsinneqassapput.

Nalunaarutinut siunnersuutit nutaat sammineqartuni nalunaarutit atuuttut aallaavigalugit siunnersuutigineqarput.

Nalunaarutinut siunnersuutit nutaat suleriutsinut tunngasunik paragraffitaqanngillat.

Nalunaarutini atuuttuni oqaatsit atorneqartut nalimmassarneqarput, tamannalu pisariaqarsimavoq, assersuutigalugu ”Landstinget” ”Inatsisartut”-nut allanngortinneqarsimalluni aamma ”Landsstyret” ”Naalakkersuisut”-nut allanngortinneqarluni.

Aammattaaq inatsisitigut nalunaarutini atuutsinneqareersunut siunnersuutini iluarsisaqalaarnikuuvugut.

Nalunaarutinut siunnersuutit nutaat suliarineqarnerini inatsisinik katerssat atuutsinneqalernissaa siunertarineqarpoq, aamma nalunaarutini atuutsinneqareersuni allannguutissatut siunnersuutigineqartut allannguutigineqareerpata, annikinnerpaamik allanngueqqittoqartarnissaa siunertarineqarluni.