Utoqqarmiut Kangerluarsunnguanni innaallagissiorfiup allineqarnissaa pillugu ASN-imut nassuiaatip tamanut ammasumik tusarniaassutigineqarnera
Nassuiaat
Nuummi nukissiutinik pisariaqartitsineq ukiuni amerlanerusuni annertusiartuaarsimavoq (siunissamilu annertusiartornera ingerlaannassalluni), ullumikkullu Utoqqarmiut Kangerluarsunnguani innaallagissiap pilersuutigineqarsinnaasup annerpaaffissaa tikinneqangajalereerpoq. Utoqqarmiut Kangerluarsunnguaniit erngup nukinganik pilersuinermi 2010-p kingorna erngup, maanna tasermut atorneqartumut ukiumut kuuttartup agguaqatigiissillugu annertussusianiit annertunerusumik atuisoqarpoq. Tamannalu Utoqqarmiut Kangerluarsunnguanni innaallagissiorfiup allineqarnissaata pisariaqartinneqarneranik ersersitsivoq.
Utoqqarmiut Kangerluarsunnguanni innaallagissiorfiup allineqarnerani innaallagissiorfimmi pioreersumi innaallagissiorfik nutaaq, erngup nukinganik innaallagissiorfiup innaallagissiorfianit pioreersumiit pilersuinermut aqqusersuummut atassuserneqassaaq.
Erngup nukinganik innaallagissiorfimmut imeq kuuttoq Isortuarsuup Tasiata (ISTA), Kangerluarsunnguup Tasiata (KANG) maanna atorneqartup kujammut 16 km-it missaannik ungasissusilimmiittup atorneqalerneratigut alliliisoqassaaq, KANG-ip aamma ISTA-p akornanni kuuffissamik sulluliortoqassalluni.
Aamma erngup nukinganik innaallagissiorfimmik alliliinermi illut pisariaqartinneqartut allat, kiisalu sulinermut aqqusernit sanaartorfiullu tungaanut qamutinut assakaasulinnut aqqusernit sananeqassapput. Nuummut pilersuinermut aqqusiussaq allanngortinneqassanngilaq, kisiannili alliliinerup kingunerisaanik aqqusersuutip ilusiligaanermini pisinnaasaa 100 MW-iusoq tamakkiisumik atorneqassaaq.
Utoqqarmiut Kangerluarsunnguanni innaallagissiorfiup allineqarnissaa pillugu ASN-imut misissuinissaq – pisussaaffiuvoq, takuuk. Atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat nr. 5, 27. marts 2013-meersoq (ASN pillugu – nalunaarut). ASN-ip isumaa tassaavoq Avatangiisit Sunniutaanut Nalilersuineq.
Matumani sanatitsisoq ASN-mut nassuiaammik suliaqarsimavoq, suliap avatangiisinut qanoq kinguneqartitsisisumik sunniuteqarsinnaanera, illuutinikaamma ingerlatsinerup ingerlaneranut tunngassutilimmik.
Suliassap piviusunngortinneqarnissaanut Nuup kiisalu Qasigiannguit Aasiaallu pilersorneqarnerannut erngup nukinganik nukissiorfinnik taakkununngalu atatillugu atortunik sanaartornermut, aningaasalersuinermut ingerlatsinermullu killiliussatut atugassarititaasut pillugit Inatsisartut inatsisaat tunngavigineqarpoq.
Innuttaasunik ataatsimiititsineq
Atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat naapertorlugu sanatitsisoq ASN-imut nassuiaat pillugu innuttaasunik ataatsimiititsisussaavoq, tak. § 9, imm. 2, nr. 2. Sanatitsisoq innuttaasunik ataatsimiititsinermi sumiiffissaq piffissarlu pillugit najukkani tusagassiuutit aqqutigalugit nalunaaruteqassaaq.
Tusarniaaneq
Suliassamut soqutiginnittut tamarmik tusarniaanermi akissuteqarnissamut kajumissaarneqarput tusaniaanermi akissuteqaatit tiguneqartut Naalakkersuisut tusarniaanernut iserfissiaannut ivertinneqassapput.
Tusarniaanermi najoqqutassat ukuninnga imaqassapput:
- Utoqqarmiut Kangerluarsunnguanni innaallagissiorfiup allineqarnissaanut ASN-imut nassuiaat
- Ilanngussaq 1: Pissutsinut pilersaarut
- Ilanngussaq 2: Takussutissiornermut pilersaarut
- Ilanngussaq 3: Betoniliornermi akoorissut
- Ilanngussaq 4: Ujaqqanik aserorteriffik
- Ilanngussaq 5: Oqaatsinut nassuiaatit allattorsimaffiat
Tusarniaaneq ulloq 10.09.2023-imut killilerneqarpoq.
Tusarniaanermut akissuteqaat Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmut nassiunneqassaaq, atortut elektroniskiusut atorlugit e-mailadresse pan@nanoq.gl-imut, imaluunniit allakkatigut postboks 1614, 3900 Nuuk-mut