2022-imi ukiakkut ataatsimiinnissamut inatsisissatut siunnersuummik saqqummiiniartoq Pele Broberg, Naleraq sinnerlugu tusarniaanermut siunnersuut nassiunneqarpoq.
Tunuliaqutaasoq
Ukioq 2013-imi Inatsisartuni annikitsumik amerlanerussuteqartut uran-imik piiaanissamut ”uran-italinnik akuersaanngilluinnarnerup” atorunnaarsinneqarnissaa aalajangiuppaat. Taamatuttaaq ukiumi 2021-imi, Inatsisartuni annikitsumik amerlanerussuteqartut, uran-imik il.il., misissueqqaarnermut, ujaasinermut piiaanermullu inerteqquteqarneq pillugu Inatsisartut inatsisaat akuersissutigaat.
Qanoq annertutigisumik innuttaasut Inatsisartunut qinersinermi aamma uran-i pillugu isummernerminnik ersersitsisarnersut, taamaattumillu, uran-i pillugu apeqqummut isumaqataanertik isumaqataannginnertilluunniit taamaallaat tunngavigalugu inissisimaffeqarlutik, Inatsisartunut politiker-inik taasisartunik, innuttaasut ilaqartarsinnaaneri pillugit, ukiut arlallit ingerlanerini partiit arlallit oqaluuseraat. Tamanna, innuttaasut aqutseqataanerannut (demokrati-mut) imaluunniit ataatsimut isigalugu nunap ineriartorneranut iluaqutaanngitsoq Naleraq isumaqarpoq.
Missingersuutaasumik innuttaasunik taasisitsinikkut, nunami innuttaasunit, uran-imik piiaaneq pillugu apeqqummut isummiussinermik erseqqissumik, Inatsisartunut saqqummiussisoqarumaarnera, siunnersuutip kingunerissavaa.
Siunnersuutip pingaarnertut imarisaa
Uran-imik il.il., misissueqqaarnermut, ujaasinermut piiaanermullu inerteqquteqarneq pillugu Inatsisartut inatsisaata nr. 20-p, 1. december 2021-imeersup atorunnaarsinneqarnissaa pillugu missingersuutaasumik innuttaasunik taasisitsisoqassasoq, siunnersuutip kingunerissavaa.
Uran-imik il.il., misissueqqaarnermut, ujaasinermut piiaanermullu inerteqquteqarneq pillugu Inatsisartut inatsisaannik atorunnaarsitsinissaq pillugu Inatsisartut inatsisaannut siunnersuut kingusinnerpaamik sapaatit akunneri pingasut tamanna sioqqullugu Naalakkersuisut saqqummiutissagaat, siunnersuummik innersuussutaavoq. Tamanna inatsisissatut siunnersuut Naalakkersuisunit saqqummiunneqartoq, missingersuutaasumik inunnik taasisitsinermi, qinersisartut isummernerannut tunngaviliisuussaaq, qinersisartullu, missingersuutaasumik inunnik taasisitsinermi isummernerat, Inatsisartut tamatuma malitsigisaanik inatsisissatut siunnersuummut isummernerannut tunngaviliisuussalluni.
Tamanna missingersuutaasumik inunnik taasisitsineq, Inatsisartunut qinersinermut atuuttut malittarisassat assingi malillugit piareersarneqassallunilu ingerlanneqassaaq.
Piffissaritaasoq
Tusarniaanermut akissutaajumaartut, inatsisartut@inatsisartut.gl-imut aamma Cc-eerlugit inlun@ina.alla.gl-imut nassiunneqassasut qinnutigineqarput.
Inatsisartut allattoqarfianiit, inatsisissatut siunnersuummut nassuiaataasinnaasunik kingusinnerpaamik ulloq 5. august 2022, nal. 12:00 tigusiumaarsinnaaneq qinnutigineqarpoq.