Kommuninut kommunillu ataatsimooqatigiiffiinut
Kommuninut kommunillu ataatsimooqatigiiffiinut KommuneKreditimi taarsigassarsinissamik kissaateqartut, KommuneKreditimut taarsigassarsinissamik qinnuteqaammik nassitsinissaq sioqqullugu aalajangiinermi isumagineqartussat tulliuttut naammassisimassavaat:

a) Taarsigassarsinissamik aalajangerneq (taarsigassarsinissami siunertaq, aningaasartat taarsersuinissallu sivisussusaa) kommunini peqataasuni kommunalbestyrelsimi aalajangerneqarsimassaaq.

b) Taarsigassarsinissamik inaarutaasumik akuersineq Naalakkersuisuni Aningaasaqarnermut Akileraartarnermullu Naalakkersuisoqarfimmi akuerineqarsimassaaq. (Akuersinermut piumasaqaatit alloriarneq 2-mi nassuiarneqarput).

Ingerlatseqatigiiffinni kommuninit pigineqartuni
Ingerlatseqatigiiffiit kommuninit pigineqartut KommuneKreditimi taarsigassarsinissamik kissaateqartut, KommuneKreditimut taarsigassarsinissamik qinnuteqaammik nassitsinissaq sioqqullugu aalajangiinermi isumagineqartussat tulliuttut naammassisimassavaat:

c) Suliffeqarfiup siulersuisuini taarsigassarsinissaq aalajangerneqassaaq (imaluunniit tamanna piumasarineqassappat piginnittut ataatsimiinneranni/ataatsimeersuarneranni).

d) Taarsigassarsinissamik inaarutaasumik akuersineq (taarsigassarsinissami siunertaq, aningaasartat taarsersuinissallu sivisussusaa) kommunalbestyrelsimit aalajangerneqassaaq.

e) Taarsigassarsinissamik inaarutaasumik akuersineq Naalakkersuisuni Aningaasaqarnermut Akileraartarnermullu Naalakkersuisoqarfimmi akuerineqarsimassaaq. (Akuersinermut piumasaqaatit alloriarneq 2-mi nassuiarneqarput).

Kommuni ingerlatseqatigiiffilluunniit kommunimit pigineqartoq KommuneKreditimut taarsigassarsinissamik kissaateqarpat, taarsigassarsinissaq Naalakkersuisunit akuerineqaqqaartussaavoq. Taamatut piumasaqarneq Kommunit Namminersorlutillu Oqartussat missingersuutaat naatsorsuutaallu pillugit Inatsisartut inatsisaat (missingersuutinut inatsit) malillugu piumasaqaataavoq.

Taarsigassarsinissamik akuerineqarnissaq Aningaasaqarnermut Akileraartarnermullu Naalakkersuisoqarfimmi Naalakkersuisut sinnerlugit suliarineqartarpoq. Aningaasaqarnermut Akileraartarnermullu Naalakkersuisoqarfik KommuneKreditimi taarsigassarsinissamik kissaateqarnermik isummissagaangat, qinnuteqaatip akuerinissaanut pissutsit tulliuttut tunngavissaatinneqartarput.

a) Siunertanik taarsigassarsiffiusinnaasunik nassuiaatit
Siunertat taarsigassarsiffiusinnaasut aallaavittut inissianut, inuussutissarsiutinut attaveqaatinulluunniit aningaasaliinerupput, tassani atuisut akiliutaat, pisortat aningaasartuutaasa annikillinerat malitseqaataasumilluunniit pisortat isertitaqarnerussutaasa taarsigassarsianut atasumik ernianut akilersuutinullu aningaasalersuissutaasinnaasut. Peqatigisaanik aningaasaliinerit ungasissumut sammisumik aningaasaqarnermut politikip patajaatsuuneranut ikorfartuisuussapput.

b) Tamatuma saniatigut siunertat taarsigassarsiffiusinnaasut tassaasinnaapput pisortat sanaartukkanik suliniutaat allat, kommunit pingaarnertut suliassaannut toqqaannartumik attuumassutillit, kommunillu inatsisit malillugit isumagisassaat.

c) Taarsigassarsiamik pisariaqartitsinermut nassuiaatit
Nassuiaammi aningaasaliissutit sooq, taamaalillunilu taarsigassarsinerup kommunimut ingerlatseqatigiiffimmulluunniit kommunip pigisaanut pisariaqarnera Naalakkersunut itisiliisuussaaq.

d) Ukiumut naatsorsuuseriffiusumut kingullermut ukiumoortumik naatsorsuutit akuerisat
Ukiumut naatsorsuusiorfiusumut, qinnuteqarnerup nalaani missingersuutinut inatsit malillugu ukiumoortumik nalunaarummik saqqummiussaasumut ukiumoortumik nalunaarut akuerisaq kukkunersiuisunillu oqaaseqarfigineqartoq.

e) Piffissamut missingersuusiorfiusussamut tullermut missingersuutissamut siunnersuut
Ukiunut missingersuusiorfinnut sisamanut aggersunut missingersuutinut siunnersuut, iluarsartuussinermut aningaasartuutit ilanngullugit.

Taarsigassarsiassatut qinnutigineqartumut iluarsartuussinissanut aningaasartuutinik naatsorsuutit, KommuneKreditip naatsorsuinermut sakkua, KommuneKreditip nittartakkakkut quppernerani pissarsiarineqarsinnaasoq atorlugu naatsorsuusiorneqassaaq.

KommuneKreditip naatsorsuinermut sakkuanut linki

Malugiuk! Taarsigassarsiap sinneranut ukiumut 0,15 procentimik qularnaveeqqusiinermut akiliut ilanngunneqartassaaq.

f) KommuneKreditimut taarsigassarsinissamut qinnuteqaammut missingiut
KommuneKreditimut taarsigassarsinissamut qinnuteqaammut tamarmiusumut missingiut, tak. KommuneKreditimut Uppernarsaasiinissamut piumasaqaat pillugu immikkoortoq (Taarsigassarsinissamut qinnuteqaammut piumasaqaatit alloriarneq 3-mi nassuiarneqarput).

Aningaasaqarnermut Akileraartarnermullu Naalakkersuisoqarfik atortussianut akuersinissamik suliaqarnermut atatillugu nassiunneqartussanut sukkulluunniit immikkut piumasaqarsinnaavoq. Taamattaaq Aningaasaqarnermut Akileraartarnermullu Naalakkersuisoqarfik taarsigassarsinissamut qinnuteqaatip nalilernissaanut aalajangiiviginissaanullu paasissutissanik erseqqinnersunik ilanngussisinnaavoq.

Akuerineqarnissamut qinnuteqaat uunga nassiunneqassaaq:
Taarsigassarsinissamik akuerineqarnissamut qinnuteqaammut atugassat atortussiat tamakkiisut KommuneKreditimi suliarinneqqinnissaq pillugu qallunaatuunngorlugit nassiunneqassapput.

Atortussiat mailikkut uunga nassiunneqassapput: oed@nanoq.dk

KommuneKreditimut taarsigassarsinissamut qinnuteqaat KommuneKreditimit immersugassami suliarineqassaaq. KommuneKreditip pisariitsumik assigiiaartumillu paasissutissanut suliarinninnissamut naggataagullu taarsigassarsinissamut qinnuteqaatinik akuersinissamut pisariaqartunik tigusinissaanik immersugassaq qularnaarinnittuussaaq.

KommuneKreditimut taarsigassarsinissamik qinnuteqaatinut immersugassaq

KommuneKreditimit immersugassami uppernarsaatissatut piumasarineqartunut tulliuttut ilaapput.

a) Aningaasanik peqquserluutinik malunnarunnaarsitsisarneq pillugu inatsit sukkulluunniit atuuttoq naapertorlugu paasissutissat KommuneKreditip sullitanik ilisimaarinninnissamik periusaanik naammassinninnissamut atugassat, tassani Kalaallit Nunaanni kommunimi ingerlatsivimmi piginnittuiit pillugit paasissutissat ilanngullugit.

b) Inatsisinik toqqammaviit naapertuuttoq innersuussutigalugu siunertamut taarsigassarsiffiusinnaasumut sumut taarsigassarsiap aningaasalersuutaanissaanik paasissutissat, tak. Sinaakkutitut isumaqatigiissummi imm. 1-imi nassuiaat ”Pisortat sanaartornermi suliniutaannut allanut aningaasaliineq”, ”Ineqarnermut attaveqaatinilu suliniutinut aningaasaliineq” aamma ”Inuussutissarsiornermi suliniutini aningaasaliineq”.

c) Aningaasat taarsigassarsiassat taarsersuinerullu sivisussusaanik paasissutissat.

d) Taarsigassarsinissamik qinnuteqartumi atsiorsinnaanermut malittarisassat atsiorsinnaatitaasullu pillugit uppernarsaatit.

e) Siulersuisut ataatsimiinnerannik imaqarniliaq taarsigassarsinissaq pillugu taarsigassarsinissamik aalajangernermik uppernarsaasiisunik issuaanernik imaqartoq (Suliffeqarfiit kommunimit pigineqartut pineqartillugit).

f) Kommunini akuusuni/peqataasuni kommunalbestyrelsimi taarsigassarsinissap akuerineqarnera pillugu suliarinninnermik aalajangernermillu imaqarniliaq.

g) Aningaasaqarnermut Akileraartarnermullu Naalakkersuisoqarfiup Naalakkersuisut sinnerlugit taarsigassarsinissamik akuersineranut uppernarsaat, tassani taarsigassarsisussap Kalaallit Nunaanni kommunimit pigineqartumik ingerlatsiviuneranik kiisalu taarsigassarsiap Siunertanut Taarsigassarsiffiusinnaasunik aningaasalersuinnissamut tunnganeranik uppernarsaat ilanngullugu.

Taarsigassarsinissamik qinnuteqaat uunga nassiunneqassaaq:
Taarsigassarsinissamik qinnuteqaat mailikkut uunga nassiunneqassaaq: kunde@kommunekredit.dk

KommuneKreditip taarsigassarsiamut qinnuteqaatersi tiguguniuk
Taarsigassarsinissamik qinnuteqaammik tigusinermi kingorna KommuneKrediti taarsigassarsiami atugassarititaasut aalajangersimasut (Taarsigassarsiap tamarmiusoq, erniat, ernianut tapiliussat/ilanngaatit, piffissaq taarsersuiffissaq, taarsersuutit, qularnaveeqqusiinermi akiliut il.il.) suussusersinissaat siunertaralugu taarsigassarsinissamik qinnuteqartumi akisussaasumik attaveqassaaq. Kingorna Taarsigassarsisitsisoqarsinnaaneranik KommuneKredit aalajangiissaaq.

Taarsigassarsinermik isumaqatigiissut digital qarasaasiakkut atsiorneq atorlugu atsiorneqassaaq
Taarsigassarsisitsisoqassappat Kommunekredit taarsigassarsinermut allakkamik taarsigassarsisoq sinnerlugu qarasaasiakkut atsiorneq atorlugu atsiorneqartussamik nassitsissaaq.

Aningaasat tunniunneqarnerat
Taarsigassarsiaqarnermut allakkiaq atsiorneqarpat taarsigassarsiat tunniunneqassapput. Taarsigassarsiaq Naalakkersuisut akuersinerisa kingorna kingusinnerpaamik qaammatit 12-it qaangiunneranni tunniunneqarsinnaavoq.