Aningaasaqarnerup ineriartornerata aningaasaqarnikkullu politikip patajaatsuunerata nalilersornissaa Aningaasaqarnermut siunnersuisooqatigiit pingaarnertut suliassaraat. Aningaasaqarnerup ineriartornera tunisassiornermut, piumanninnermut, suliffissaqartitsinermut il.il. ataatsimut taaguutaavoq. ”Aningaasaqarnermut politiki” pisortat aningaasartuutaasa isertitaasalu allanngornerannut ataatsimut taaguutaavoq.

Aningaasaqarnermut Siunnersuisooqatigiit, Aningaasaqarnermut Siunnersuisoqatigiit pillugit Namminersorlutik Oqartussat nalunaarutaat nr. 3, 25. januar 2024-meersoq naapertorlugu siulittaasoqarfimmit tallimanit arfinilinnilluunniit inuttalikkamik siulersorneqarpoq, taakkulu saniatigut 14-t tikillugit ilaasortaqarluni.

Siulittaasoqarfik maanna ukuninnga inuttaqarpoq:

• Torben M. Andersen (siulittaasoq),
• Ulla Lynge (siulittaasup tullia),
• Søren Bjerregaard (ilaasortaq),
• Midtdlarak Lennert (ilaasortaq),
• Anders Blaabjerg (ilaasortaq).

Taamaalilluni Siulittaasoqarfik nalunaarusianik suliarinninnermik, isumasioqatigiisitsinernik ingerlatsinermik isumaginnittuuvoq, Aningaasaqarnermullu Siunnersuisooqatigiit ilaasortaasa sinneri siulittaasoqarfiup sulinerani ilapittuisuullutillu isummersueqataasarput.

Aningaasaqarnermut Siunnersuisoqatigiit pillugit Namminersorlutik Oqartussat nalunaarutaanni § 1, imm. 4 naapertorlugu, uku innersuussaqarnerisigut Aningaasaqarnermut Siunnersuisooqatigiit ilaasortai allat ukiuni pingasuni atuuttussatut toqqarneqartarput:

"1) ilaasortat 2-t Aningaasaqarnermut Naalakkersuisumit inassutigineqartut,
2) ilaasortat 3-t kommuninit ataatsimoorullugu inassutigineqartut,
3) ilaasortaq 1 Ilisimatusarnermit inassutigineqartoq,
4) ilaasortaq 1 Pinngortitaleriffimmit inassutigineqartoq,
5) ilaasortaq 1 Sulinermik Inuussutissarsiuteqartut Kattuffiannit (SIK) inassutigineqartoq,
6) ilaasortat 2-t Atorfillit Katuffianit (AK), Ilinniartitsisut Meeqqat Atuarfianneersut Kattuffiannit (IMAK), Nunatsinni Perorsaasut Kattuffianit (NPK), Peqqinnissaq Pillugu Kattuffiannit (PPK) aamma Ilinniagartuut Kattuffiannit (IK/ASG) ataatsimoorullugu inassutigineqartut,
7) ilaasortaq 1 Sulisitsisunit inassutigineqartoq,
8) ilaasortaq 1 aningaaserivinnit Kalaallit Nunaanni angerlarsimaffeqartunit imaluunniit aalajangersimasumik ingerlatsiveqartunit inassutigineqartut, aamma
9) ilaasortat 2-t aalisarnermut kattuffiannit ataatsimut inassutigineqartut.
Imm. 5. Inassuteqarnermi suiaassutsit akornanni naligiissitaaneq pillugu aalajangersakkat sukkulluunniit atuuttut malinneqarnissaat qulakkeerneqassaaq."

Aningaasaqarnermut Siunnersuisooqatigiit ullumikkut ukuninnga ilaasortaqarput:

• Nikolai S. Christensen
• Ruth Lindhardt
• Tine Pars
• Ole Jakobsen
• Dorthe Løvstrøm Mathiesen
• Javier Arnaut
• Karl B. Zinglersen
• Jess G. Berthelsen
• Elna Heilmann
• Ken Jensen,
• Tine Romby Lundberg,
• Martin B. Kviesgaard