Issittumi Siunnersuisoqatigiinni siulittaasuuneq Nuummi ataatsimoorluni aaqqissuussinermi malunnartinneqarpoq

Ataasinngorneq 4. august 2025-mi Kunngeqarfik Danmarkip Issittumi Siunnersuisoqatigiit Siulittaasoqarfiat, UiT - Norgemi Issittoq pillugu Ilisimatusarfik, Arctic Mayors’ Forum aamma Arctic Frontiers umiarsuarmi tingerlaataannalimmi Statsraad Lehmkuhl-imi Norgemeersumi umiarsuarmut takornariartitsivoq kaffillernermullu qaaqqisisuulluni. 

Aaqqissuussinermi siunertaavoq Kalaallit Nunaata Issittoq pillugu suleqatigiinnermi inissisimanerata siuttuunneratalu pisussami malunnartinniarnera aammalu inuiaqatigiit umiarsuarmut takornariartitseqqullugit qaaqqusisarnerisigut Issittumilu Siunnersuisoqatigiit pillugit sulianik paasisaqarfiginneroqqullugit. Aaqqissuussineq tamanna Issittumi Siunnersuisoqatigiinni siulittaasuunerup Norgemiit Kunngeqarfimmut Danmarkimut maajimi 2025-mi nuunneqarneranut, kiisalu augustimi Arctic Mayors’ Forumimi Siulersuisuuneq Norgemi Tromsø-miit Kalaallit Nunaanni Kommuneqarfik Sermersuumut nuunneqarneranut atatillugu.

Ullup qeqqata siornatigut pilersaarutini pisussat pingaarnerit nalunaaqutaq 9.00-miit immikkut ilisimasallit akornanni oqallinnermi Kommuneqarfik Sermersuup Siulersuisuunissaani pingaarnertut sammisassat annermik eqqartorneqarsimapput. Tassanilu takornariaqarneq pillugu eqqartuisimapput. Inuusuttut Tarnikkut Peqqissusaat Atugarissaarnerlu, kiisalu ilinniartitaaneq pillugu eqqartuisoqarpoq. 
Pilersaarut tamakkiisoq immikkuualuttullu allat takuniarukkit, una alakkaruk arcticfrontiers.com/abroad/greenland 

Ualikkut Kaffillertoqarpoq, tassanilu innuttaasut Issittumi Siunnersuisoqatigiit siulittaasoqarfiannik suleqateqartunik naapitsinissaminnik siulittaasoqarfiullu pingaartitaanik paasisaqarnissaminnut periarfissinneqrput —  Nunat Inoqqaavisa ilisimasaasa ilanngunnissaat, silap pissusaa, aningaasaqarnerup piujuartitsisumik ineriartortinnera, imartat uumassusillillu assigiinngisitaarnerat pillugit paasisaqarnissaannut qaaqquneqarsimapput. 
Kaffillerneq aallarnerlugu Isumaginninnermut, Suliffissaqarnermut, Nunap Iluani Pissutsinut Avatangiisinullu Naalakkersuisoq Bentiaraq Ottosen oqalugiarpoq erseqqissarlugulu Kalaallit Nunaat Issittumi ilisimasanut ingerlatsinermullu akisussaaffeqarlunilu pisussaaffeqartoq:

“Oqalugiaatinni oqariartuutiga tassaavoq maani Nunatsinni pinngortitaq nukissatut isigiinnarnagu aamma atassuteqaatitut isigigipput. Atassuteqaatitut oqaluttuarisaanitsinnut, kinaassutsitsinnut siunissatsinnullu attaveqaatitut isigaarput, taamaattumillu pinngortitatta, avatangiisitta silaannattalu akisussaaffigiuarnerisigut eriagisassaraagut. CAFF-imi, Issittumi Siunnersuisoqatigiit suleqatigiiffiisa ilagisaanni, aqutsinitsinni ukiuni kingullerni marlunni akisussaaffimmik annertuumik tigusisimavugut. Ukiunut 10-nut suliniutissatut pilersaarusiamik Issittumi tamarmi inuiaqatigiinnut, uumasunut pinngortitamilu ataqatigiinnermut allannguisussamik annertuumik kivitsisimavugut. Tamanna piviusuuvoq. Tamanna akisussaaffiliivoq. Tamatumalu uppernarsarpaa isiginnaartuuginnanngitsugut, siuttuullutali suliniuteqartugut”, taamatut oqaaseqarpoq Isumaginninnermut, Suliffissaqarnermut, Nunap Iluani Pissutsinut Avatangiisinullu Naalakkersuisoq Bentiaraq Ottosen

Isumaginninnermut, Suliffissaqarnermut, Nunap Iluani Pissutsinut Avatangiisinullu Naalakkersuisoq Bentiaraq Ottosen-ip oqalugiaataa kalaallisut aamma qallunaatut uani atuarsinnaavatit 

uani atuarneqarsinnaavoq: 
arctic-council.org/news/arctic-council-kaffemik-open-ship-at-statsraad-lehmkuhl

Rosa Thorsen
rsth@nanoq.gl
Toqq/direkte +299 34 50 00