Qeqertarsuatsiaani anorthosit-inut suliassamut VVM-imut aamma VSB-imut nassuiaatit aamma tusarniaaneq pillugu nalunaarusiat tassunga atasut Naalakkersusiut

Qeqertarsuatsiaani anorthosit-inut suliassamut VVM-imut aamma VSB-imut nassuiaatit aamma tusarniaaneq pillugu nalunaarusiat tassunga atasut Naalakkersusiut akueraat

Greenland Anorthosite Mining A/S-ip Avatangiisinut Sunniutaasussanik Nalilersuinera (VVM-imut nassuiaat) aamma Inuiaqatigiinni piujuaannartitsisumik ingerlatsinermik naliliinera (VSB-imut nassuiaat) tusarniaaneq pillugu nalunaarusiat taakkununnga atasut ilanngullugit, akuerineqassasut Naalakkersuisut ulloq 26. juni 2025 aalajangiipput. Ingerlatseqatigiiffik Qeqertarsuatsiaat avannamut kangiani Piiaaffik Itersarmiut Allit-ni anorthosit-inik piiaanissamut akuersissummik tunineqarpoq.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen, oqarpoq:
”VSB-imut nassuiaatip akuerineqarnera 2025-mi Greenland Anorthosite Mining A/S-ip anguniagaasa ilaanni killiffiuvoq pingaaruteqartoq. VVM-imut nassuiaat ilanngullugu VSB-imut nassuiaat aatsitassarsiorfimmut matusinissamullu pilersaarutissanut, suliassamik aatsitassarsiorfimmik ingerlatsinissamut qaninnerulersitsisussanut, tunngavissiivoq. Tamatuma saniatigut VSB-imut nassuiaat ”IBA”-mik taagorneqartumut, tassaasumut ingerlatseqatigiiffiup, kommunip aamma Naalakkersuisut akornanni isumaqatigiissut, sinaakkutissiivoq. Tassani ingerlatseqatigiiffiup aammalu najukkami sumiiffiup akornanni suliniutissat erseqqissarneqassapput. Kommuneqarfik Sermersooq qanimut suleqatigalugu ingerlatseqatigiiffiup pilersitsiviulluartumik oqaloqatiginerata ingerlateqqinnissaa qilanaaraara.”

Isumaginninnermut, Suliffeqarnermut, Nunamullu Namminermut Avatangiisinullu Naalakkersuisoq, Bentiaraq Ottesen, oqarpoq:
” Aatsitassarsiornermi sulianik ineriartortitsinermi pinngortitap najukkatta avatangiisittalu illersorneqarnerisa ataqatigiinnissaat Naalakkersuisunut pingaaruteqarpoq. Ullumikkut ulloq kisiat eqqarsaatigissanngilarput – aammali kinguaariinnut tullissatsinnut akisussaaffeqarnerput eqqarsaatigissavarput. Akisussaaffik tigusarput sulianik ilisimasaqarnermik, ersarissuseqarnermik aammalu najukkani inuiaqatigiit eqqorneqartut akuutinneqarnerinik tunngaveqassaaq. Greenland Anorthosite Mining A/S-ip ASN-imut nassuiaasiaanik akuersineq tunngavigalugu erseqqissaatigissavara, tamannarpiaq pingaartillugu tunngavigigakku. Ineriartortitsinermi eqqarsaqqissaarnissaq aammalu pinngortitami nalilinnik inuussutigisatsinnik ataqqinninneq tunngavigineqassaaq. Tamatuma peqatigisaanik suliassami suliffissanik nutaanik pilersitsisoqarsinnaavoq, aammalu najukkani suliffissaqarneq nukittorsarneqarsinnaalluni. Periarfissap taassuma atornissaa qilanaaraara.”

Alloriarnissaq tulleq
Greenland Anorthosite Mining A/S aatsitassarsiorfimmut matusinissamullu pilersaarummik nassiussinissamut 31. december 2026 tungaanut piffissalerneqarpoq. Allatut akuersissuteqartoqarsimanngippat, aatsitassarsiorfimmi ingerlatassat kingusinnerpaamik ulloq 31. december 2028 aallartinneqassapput. Piiaanermi ingerlatassat aallartinneqannginneranni IBA-mut isumaqatigiissut inissitsinneqareersimasussaavoq.

Sammisaq taanna pillugu nutaarsiassat allat
• 21. maj 2025: Naalakkersuisut Greenland Anorthosite Mining A/S-imut piiaanissamut akuersissummik tunniussipput
• 24. januar 2025 Greenland Anorthosite Mining-ip anorthosit-isiorfissaa pillugu tusarniaalluni ataatsimiititsinerit
• 20. december 2024 Greenland Anorthosite Mining-ip anorthosit-isiorfissaanut VSB-imut aamma VVM-imut nassuiaatinut missingiutit tamanut ammasumik tussarniaassutigineqarnerat
• 21. juli 2022: Naalakkersuisut Qeqertarsuatsiaat eqqaanni anorthosit-inut suliassamut VSB-mut aamma VVM-imut suliakkiussanut najoqqutassiat akueraat

Attaveqarfissaq
Tusagassiortunit saaffiginninnerit: Jørgen T. Hammeken-Holm, tlf. 346800 imaluunniit asn@nanoq.gl
Saaffiginninnerit allat: Aatsitassanut Ikummatissanullu Aqutsisoqarfik, tlf. 346800 imaluunniit mlsa@nanoq.gl



Pissusiviusut

Piiaanissamut akuersissut sunaava?
peqarfimmik piiarneqarsinnaasumik paasinarsisitsisimaguni killissalersuisimallunilu, ingerlatseqatigiiffik aatsitassamik taassuminnga piiaanissamut akuersissummik qinnuteqarsinnaavoq. Tamatuma saniatigut ingerlatseqatigiiffik suliassamut suliakkiussanut najoqqutassamik, Naalakkersuisunit akuersissuteqarfigineqartussamik, nassiussisussaavoq.

Piiaanissamut akuersissummi ingerlatseqatigiiffik sumiiffimmi aatsitassanik peqarfimmi piiaanissamut kisermaassisussaatitaalertarpoq. Piiaanissamut akuersissut piffissamut ukiunik 30-nik sivisussuseqartartumut tunniunneqartarpoq, sivitsorneqarnissaa periarfissaqartinneqarluni. Taamaattoq piiaanissamut akuersissut aatsitassanut tunngasunik suliaqarnerup aallartinnissaanut killeqanngitsumik periarfissiisanngilaq. Akuersissuteqarnerit arlallit inissitsinneqaqqaartussaapput.

Sumi aamma suna
Greenland Anorthosite Mining A/S-imut piiaanissamut akuersissut Kalaallit Nunaata kitaani Qeqertarsuatsiaat avannamut kangiani inissisimavoq. Sumiiffik atserneqarpoq Piiaaffik Itersarmiut Allit. Nunap assingi najoqqutassat il.il. Aatsitassanut Ikummatissanullu Aqutsisoqarfiup nittartagaani takuneqarsinnaapput. Piiaanissamut akuersissummi ilaatinneqarpoq anorthosit, tassaniillutik plagioklas feldspat, alkali feldspat, epidot, clino-zoisit, zoisit, amfibol, biotit, klorit aamma kvarts. Anorthosit-it ilaatigut glasfiberini, oqorsaatinut atortussani aammalu qalipaatini immiutissatut atorneqartarpoq.

Suliat ingerlaneri
Piffissami 18. december 2024 – 19. februar 2025, ingerlatseqatigiiffiup Avatangiisinut Sunniutaasussanik Nalilersuinermut (VVM-imut nassuiaat) aamma Inuiaqatigiinni Piujuartitsiviusumik ingerlatsinissamut nalilersuinermut (VSB- imut nassuiaat) missingiusiai tamanut ammasumik tusarniaassutigineqarput. Tusarniaanermut najoqqutassat aamma tusarniaanermut akissuteqaatit tiguneqartut Naalakkersuisut tusarniaanermut nittartagaanni takuneqarsinnaapput. Ingerlatseqatigiiffiup tamatuma kingorna nassuiaatit iluarsaattussavai aammalu tusarniaaneq pillugu nalunaarusiaq suliarisussallugu. Allakkiat taakkua maannakkut Naalakkersuisunit akuerineqarput aammalu piaartumik tusarniaanermut nittartakkami tamanut saqqummiunneqassallutik.

Tusarniaaneq pillugu nalunaarusiami tusarniaanermut akissuteqaatit ataatsimoortinneqarput. Tusarniaaneq pillugu nalunaarusiami tusarniaanermut akissuteqaatit ataasiakkaat tamarmik ingerlatseqatigiiffinnit oqartussaniillu akissuteqarfigineqartarput.

Maannakkut ingerlatseqatigiiffiup aatsitassarsiorfimmut pilersaarut aamma matusinissamut pilersaarut suliarisussanngorpai. Pilersaarutini taakkunani aatsitassarsiorfiup sanaartorfiunissaanut, ingerlanneqarnissaanut, tamatumalu kingorna matuneqarnissaanut pilersaarutit pingaarnerit nassuiarneqarput. Aatsitassarsiorfissamut pilersaarut aamma matusinissamut pilersaarut akuerineqareerpata, ingerlatseqatigiiffiup ingerlatassanut pilersaarutit, ingerlatassanik ataasiakkaanik tamaginnik sukumiinerusumik nassuiaaviusut, suliarissavai, soorlu tammaarsimaffiliineq, umiarsualiviliorneq, qaartiterutissanut toqqorsiviliorneq, suliareqqiisarfik il.il.

Piiaanermi ingerlatassat aallartinnginneranni inuiaqatigiinni piujuartussamik sunniuteqartitsinissaq pillugu isumaqatigiissut (amerlanertigut taagorneqartoq Impact Benefit Agreement imaluunniit ”IBA”) isumaqatigiissutigineqassaaq. Isumaqatigiissut ingerlatseqatigiiffiup, Kommuneqarfik Sermersuup aamma Naalakkersuisut akornanni isumaqatigiissutigineqassaaq.