Quppernerup imarisaanut ingerlaqqigit
Oqaaseq toqqaruk

Kalaallisut ( Toqqarneqarpoq )

Qallunaatut

🔈 Atuartiguk

Naalakkersuisut Greenland Anorthosite Mining A/S-imut piiaanissamut akuersissummik tunniussipput

Nassiussisuuvoq: Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik

Ulloq 21. maj 2025 Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisup Naaja H. Nathanielsenip Greenland Anorthosite Mining A/S-imi pisortaaneq Claus Stoltenborg peqatigalugu, Qeqertarsuatsiaat avannamut kangiani Piiaaffik Itersarmiut Allit-ni ukiuni 30-ni anorthosit-inik piiaanissamut akuersissut atsiorpaa.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen, nalliuttorsiorpalaartumik atsiornermi oqarpoq:

”Aatsitassanut suliassaqarfimmi piiaanissamut akuersissummik nutaamik tunniussisinnaaneq nuannaarutigisorujussuuara.  Aatsitassanut suliassaqarfimmi aaqqissuusseqqinnissaq, sulianillu ingerlatitsisarnerup pisariinnerulersinnissaa, peqatigisaanillu avatangiisit paarilluarnissaat inuiaqatigiillu soqutigisaasa isumaginissaat pillugit tunngaviusumik naleqartitatta aalajangiusimaannarnissaat,  Naalakkersuisut ukiorpassuarni sulissutigaat. Suliaqarneq taanna maannakkut inerititaqarfiuvoq. Aatsitassarsiorfissanik ineriartortitsineq imminut nammattumik aningaasaqarnissaq pillugu anguniagaqarnerup siuarsarnissaanut Naalakkersuisut sakkussaraat. Ingerlatseqatigiiffik pilluaqquara aammalu tamatsinnut iluaqutaasumik suleqatigiinnerup ingerlaannarnissaa qilanaaraara.”

Isumaginninnermut, Suliffeqarnermut, Nunamut Namminermut Avatangiisinullu Naalakkersuisoq Bentiaraq Ottosen nalliuttorsiorpalaartumik atsiornermi oqarpoq:

”Greenland Anorthosite Mining A/S-ip piianissaanut akuersissutip nalunaarutigineqarneranut atatillugu erseqqissassavara, aatsitassarsiornermi suliat pinngortitaq avatangiiserpullu ataqqillugit ineriartortinneqarnissat pingaartittorujussuugakku. Taamaattumik avatangiisinik naliliinermi inuiaqatigiinnilu piujuartitsinissamut atatillugu suliat ammasumik, piviusorsiortumik najugaqartullu akuutillugit ingerlanneqarnissaat pingaaruteqarpoq. Matumani maannarpiaq avatangiisinik illersuinissaq kisimi pineqanngilaq – aammali kinguaariinni tulliuttut pinngortitamik nuannaaruteqarnissaasa qulakkeernissaa pineqarpoq. Tamatuma peqatigisaanik suliassap sumiiffimmi najugallit suliffissaannik pilersitseqataaffiulernissaa suliffeqarnermillu nukittorsaaqataalernissaa qilanaaraara”.

Greenland Anorthosite Mining A/S-imi pisortaaneq, Claus Stoltenborg, nalliuttorsiorpalaartumik atsiornermi oqarpoq:

”Ukiorpassuarni GAM aatsitassanut isumalluutinut uppernarsaaniarluni, suliareqqiinissamut pilersaarummik suliffissuarni assigiinngitsuni pisisussanit piumasaqaatinik naammassinnittumik misissuilluni pilersitsiniarlunilu, inuiaqatigiinni piujuartussamik sunniuteqartitsinissamut aammalu avatangiisinut sunniutaasussanik misissuinerit ingerlallugit kiisalu pilersitsinerup ingerlatsinerullu immikkoortuini akigititassat uppernarsarniarlugit, ilanngullugulu suliffissuit pisisartussat isumaqatigiissuteqarfigalugit, ilungersorluni naammagittarlunilu sulilluni aningaasaleereernermi, ullumi maani Nuummiissinnaagama aammalu GAM-imut piiaanissamut akuersissut atsiorsinnaagakku, nuannaarutigisorujussuuara. Suliassatta aallartinnissaat aammalu Kalaallit Nunaanni sullivissanik pitsaasorpassuarnik pilersitsinissaq, qilanaaraagut. GAM-ip anorthosit-init isumalluutaasa qaffasissumik pitsaassuseqarnerat aallaavigalugu, naatsorsuutigaarput ingerlatseqatigiiffik Kalaallit Nunaanni aammalu nunarsuarmi suliffissuarni arlalinni siunissami piujuartitsinissamut, pingaarutilimmik inissisimalissasoq.”

Alloriarnerup tullia
Greenland Anorthosite Mining A/S maannakkut aatsitassarsiorfimmut matusinissamullu pilersaarummik nassiussinissamut 31. december 2026 tikillugu piffissalerneqarpoq. Allatut akuersissuteqartoqarsimanngippat, aatsitassarsiorfimmi ingerlatassat kingusinnerpaamik ulloq 31. december 2028 aallartinneqartussaapput.

Qulequtaq taanna pillugu nutaarsiassat allat

Attaveqarfissaq
Tusagassiortut saaffiginnissutaat: Jørgen T. Hammeken-Holm, tlf. 346800 imaluunniit asn@nanoq.gl
Saaffiginnissutit allat: Aatsitassanut Ikummatissanullu Aqutsisoqarfik, tlf. 346800 imaluunniit mlsa@nanoq.gl

  • Emil Nørgaard Stach, Justin Case Productions

  • Emil Nørgaard Stach, Justin Case Productions

  • Emil Nørgaard Stach, Justin Case Productions

Pissusiviusut allassimaffii

Piiaanissamut akuersissut sunaava?
Ingerlatseqatigiiffik aatsitassarsiorluni misissuinissamut akuersissutip ataani aatsitassanik peqarfimmik paasisaqarsimaguni killissalersuisimallunilu, ingerlatseqatigiiffik aatsitassamik taassuminnga piiaanissamut akuersissummik qinnuteqarsinnaavoq. Ingerlatseqatigiiffik tamatuma saniatigut suliassamut suliakkiussanut najoqqutassamik, Naalakkersuisunit akuerineqartussamik, nassiussisussaavoq.

Piiaanissamut akuersissummi ingerlatseqatigiiffik sumiiffimmi aatsitassanik peqarfimmut kisermaassisussaatitaalersinneqartarpoq. Piiaanissamut akuersissut ukiunik 30-nik piffissalerneqarajuppoq, sivitsorneqarnissaa periarfissaqartinneqartarluni. Taamaattoq piiaanissamut akuersissut aatsitassarsiorluni ingerlatassat aallartinnissaannut killeqanngitsumik periarfissaqalersitsinngilaq. Akuersissuteqarnerit arlallit inissitsinneqaqqaartussaapput.

Sumi aamma suna
Piiaanissamut akuersissut Kalaallit Nunaata kitaani Qeqertarsuatsiaat avannamut kangiani inissisimavoq. Sumiiffik atserneqarpoq Piiaaffik Itersarmiut Allit. Nunap assingi najoqqutassat il.il. Aatsitassanut Ikummatissanullu Aqutsisoqarfiup nittartagaani takuneqarsinnaapput. Piiaanissamut akuersissummi ilaatinneqarpoq anorthosit, tassaalluni plagioklas feldspat, alkali feldspat, epidot, clino-zoisit, zoisit, amfibol, biotit, klorit aamma kvarts. Anorthosit-it ilaatigut glasfiberini, oqorsaatinut atortussani aammalu qalipaatini immiutissatut atorneqartarpoq.

Suliat ingerlaneri
Piffissami 18. december 2024 – 19. februar 2025, ingerlatseqatigiiffiup Avatangiisinut Sunniutaasussanik Nalilersuinermut  (VVM-imut nassuiaat) aamma Inuiaqatigiinni Piujuartitsiviusumik ingerlatsinissamut nalilersuinermut (VSB- imut nassuiaat) missingiut tamanut ammasumik tusarniaassutigineqarpoq. Tusarniaanermut najoqqutassat aamma tusarniaanermut akissuteqaatit tiguneqartut Naalakkersuisut tusarniaanermut nittartagaanni takuneqarsinnaapput. Ingerlatseqatigiiffiup tamatuma kingorna VSB-imut nassuiaat pillugu suliaqarneq naammassivaa, aammalu maannakkut VVM-imut nassuiaat inaarsarlugu suliaralugu. Nassuiaatit tamarmik pigineqalerpata, nassuiaatit aamma tusarniaaneq pillugu nalunaarusiat taakkununnga atasut Naalakkersuisunut akuerineqartussanngorlugit saqqummiunneqassapput. 

Tusarniaaneq pillugu nalunaarusiami tusarniaanermut akissuteqaatit ataatsimoortinneqarput. Tusarniaaneq pillugu nalunaarusiami tusarniaanermut akissuteqaatit ataasiakkaat tamarmik ingerlatseqatigiiffinnit oqartussaniillu akissuteqarfigineqartarput.

VVM-imut aamma VSB-imut nassuiaatit akuerineqareerpata, ingerlatseqatigiiffik aatsitassarsiorfissamut pilersaarummik aammalu matusinissamut pilersaarummik suliaqassaaq. Pilersaarutini taakkunani aatsitassarsiorfiup sanaartorfiunissaanut, ingerlanneqarnissaanut, tamatumalu kingorna matuneqarnissaanut pilersaarutit pingaarnerit nassuiarneqarput. Aatsitassarsiorfissamut pilersaarut aamma matusinissamut pilersaarut akuerineqareerpata, ingerlatseqatigiiffiup ingerlatassanut pilersaarutit, ingerlatassanik ataasiakkaanik tamaginnik sukumiinerusumik nassuiaaviusut, suliarissavai, soorlu tammaarsimaffiliineq, umiarsualiviliorneq, qaartiterutissanut toqqorsiviliorneq, suliareqqiisarfik il.il. 

Piiaanermi ingerlatassat aallartinnginneranni inuiaqatigiinni piujuartussamik sunniuteqartitsinissaq pillugu isumaqatigiissut (amerlanertigut taagorneqartoq Impact Benefit Agreement) isumaqatigiissutigineqassaaq. Isumaqatigiissut ingerlatseqatigiiffiup, Kommuneqarfik Sermersuup aamma Naalakkersuisut akornanni isumaqatigiissutigineqassaaq.