Naalakkersuisut Qeqertarsuatsiaat eqqaanni anorthosit-inut suliassamut VSB-mut aamma VVM-imut suliakkiussanut najoqqutassiat akueraat

Greenland Anorthosite Mining ApS Qeqertarsuatsiaat eqqaanni anorthosit-inut suliassamut VSB-imut aamma VVM-imut suliakkiussanut najoqqutassiamut akuerineqarpoq. Suliakkiussanut najoqqutassat aatsitassamik anorthosit-imik piiaanissamut akuersissummik qinnuteqarnissamut suliap ingerlanerata immikkoortortaraa siulleq.

Aatsitassanut Inatsisillu Atuutsinneqarnerannut Naalakkersuisoq, Aqqaluaq B. Egede oqarpoq:

”Ingerlatseqatigiiffiup aammalu najukkami innuttaasut oqaloqatigilluarnerisa ingerlaannarnissaa qilanaaraara. Naalakkersuisut suliassamut inaarutaasumik isumminnginneranni qinnuteqaatip suliarineqarnera sivisuumik ingerlasussaavoq. Nunatsinni aatsitassarsiornermi suliassani nunami namminermi najukkamilu piujuartitsiviusumik ineriartortitsinerup qulakkeernissaata annertuumik ukkatarinissaa pingaartumik pingaartippara. Siunissami qanittumi najukkami sumiiffimmeersut tusaaniarlugit ilinniarniarlugillu Qeqertarsuatsiaat tikeraarnissaa naatsorsuutigaara.”

Greenland Anorthosite Mining ApS Kalaallit Nunaata kitaani Qeqertarsuatsiaat qanitaani aatsitassarsiorluni misissuinissamut akuersissummik peqarpoq.  Piiaanissamut akuersissummik qinnuteqarnissamut ingerlatseqatigiiffik inuiaqatigiinni piujuaannartitsisumik ingerlatsinermik nalilersuinermik (VSB) aammalu avatangiisinut sunniutaasussanik nalilersuinermik (VVM) suliaqarnissamik pisussaaffeqarpoq.

Greenland Anorthosite Mining ApS VVM-imut aamma VSB-imut nassuiaatinut suliakkiussanut najoqqutassianut missingiutit 2021-mi tunniuppai. Suliakkiussanut najoqqutassat 2021-mi ukiaanerani tamanut ammasumik tusarniaassutigineqarput. Suliakkiussanut najoqqutassiat tamatuma kingorna tusarniaanermit oqaaseqaatit tunngavigalugit iluarsaanneqarput.

Suliakkiussanut najoqqutassiat akuerineqareersut VSB-imut aamma VVM-imut nassuiaatinut killissaliussanik aalajangersaaviupput. VSB-imut aamma VVM-imut nassuiaatinut missingiutit naammassippata sapaatit akunnerini 8-ini tamanut ammasumik tusarniaassutigalugit nassiunneqassapput.

VVM aamma VSB suuppat?

Avatangiisinut sunniutaasussanut nalilersuineq (VVM): Aatsitassarsiorfissap avatangiisinut qanoq sunniuteqarnissaa naatsorsuutigineqarnersoq, kiisalu sunniutaanerluttussat annikillisinniarlugit qanoq iliuuseqartoqarniarnersoq, ingerlatseqatigiiffiup nassuiassavai.

Inuiaqatigiinni piujuaannartitsisumik ingerlatsinermik nalilersuineq (VSB): Aatsitassarsiorfissap inuiaqatigiinnut tunngasunut qanoq sunniuteqarnissaa naatsorsuutigineqarnersoq ingerlatseqatigiiffiup nassuiassavaa. Assersuutigalugu suliffissaqartitsiniarneq aamma siuariartortitsinissamut periarfissat.

Najoqqutassiat

Suliakkiussanut najoqqutassiat akuerineqareersut ingerlatseqatigiiffiup tusarniaanermut akissuteqaatinut tiguneqartunut akissutai (tusarniaaneq pillugu nalunaarusiaq) ilanngullugit uani tamanut saqqummiunneqarput.

Quppernermi matuma siuliani taaneqartumi tusarniaanermit najoqqutassat takuneqarsinnaapput, ilanngullugit tusarniaanermut akissuteqaatit tiguneqartut tamarmik.

Tusagassiortut saaffiginnissutaat

Attaveqarfigiuk Naalakkersuisumut allatsi Lars Salik H. Kielsen +299345317 imaluunniiit lsak@nanoq.gl