Matumuuna angallatit tunitsiviusartut, nunami tunisassiorfiit usinillu nuussisarnerit pillugit Namminersorlutik Oqartussat nalunaarutissaattut siunnersuut tusarniutigineqarluni nassiunneqarpoq.

Ilanngussatut ilanngunneqarput:

- Angallatit tunitsiviusartut, nunami tunisassiorfiit usilersoqqittarnerlu pillugit Namminersorlutik Oqartussat nalunaarutaat


Siunnersuummut oqaaseqaatit Aalisarnermut, Piniarnermut, Nunalerinermut, Imminullu Pilersornermut Naalakkersuisoqarfimmit tiguneqareersimassapput kingusinnerpaamik

Julip 24-ani 2026 nal. 12.00

Siunnersuummut oqaaseqaatit emailikkut nassiuteqquneqarput uunga APN@nanoq.gl kiisalu cc. jepa@nanoq.gl aamma auje@nanoq.gl imaluunniit allakkatigut uunga:

Aalisarnermut, Piniarnermut, Nunalerinermut, Imminullu Pilersornermut Naalakkersuisoqarfik
Imaneq 1A, 701
Postboks 296
3900 Nuuk

Siunnersuut uanittaaq takuneqarsinnaavoq: Tusarniaanerit

Siunnersuummi tunuliaqutaasoq

Siunnersuut Aalisarnermut Inatsisip 16. maj 2024 akuersissutigineqartup nalunaarutit attuumassuteqartut suliaralugit timitalersorneqarneranut ilaavoq. Siunertaavoq nalunaarummi angallatit tunitsiviusartut, nunami tunisassiorfiit usilersoqqittarnerlu pillugit aalajangersaavigineqarnissaat. Nalunaarut tassaavoq angallatinik tunitsiviliinerit nunami tunisassiorfiit usinillu nuussisarnerit aalisarnerni tamaginni ataatsimut malittarisassiuunneqarnerat.

Siunnersuummi taamaasilluni angallatinik tunitsiviliineq nunami tunisassiorfiit usinillu nuussisarnerit pillugit ataatsimut malittarisassiuunneqarput aalajangersakkat atuutereersunut nutarterinerulluni nutaartaqarlunili aamma. Aammalu angallammik umiarsualiinermi periusissat ilanngunneqarlutik.

Allannguutit makkuupput:

• Taaguutinut nassuiaatinullu ataatsimut isigalugu nutarsaaneq, takuuk aalisarnermut inatsit nutaaq

Angallatit tunitsiviusartut, nunami tunisassiorfiit usilersoqqittarnerlu pillugit nalunaarummi taasassat nutaat

1. Angallatit tunitsiviusartut
• Akuersissut piumasarineqarpoq: Naalakkersuisut immikkorluinnaq piumasaqarnikkut angallatit tunitsiviusartut atulernissaannut akuersissuteqarsinnaapput (§ 3).
• Siunertaq: Nunami tunisassiorfinnut aserfallatsaalillugit nutarterneqartunut nutaamilluunniit sanaartorneq pissutigalugu tunitsiviliigallartarneq, sumiiffinni tunitsivissaqanngitsuni tunisisarnerup qulakkeernissaa imaluunniit saarullinnut uninngatitsiviit imaartarnissaat.
• Angallatinut piumasaqaatit:
o Kalaallit Nunaanni nalunaarsorneqarsimassaaq.
o Angallammi nakkutilliissummik (VMS) atorluarsinnaasumik peqassaaq.
o Angallat ≥ 24 meterinik takissuseqarsimatillugu inuttalersuinermi piumasaqaatinik naammassinnissimassaaq.
o Pisat nalunaarsortarnissaannut atortuuteqassaaq (oqimaalutaavik oqimaalutaanissaminut nikinganngitsumik inissilluarneqarsimasoq, qarasaasiaq).
• Nunami sumiiffitsigut piffissalersuinikkullu killilersuineq: Sumiiffinni piffissanilu killilersuineq taamaallaat sinerissamiit aamma 3 sømilit tikillugit (amerlanerpaamik qaammatini 12-ini).
• Ataatsikkut tunitsiviutigaluni aalisarsinnaanermut akuersissuteqarnissap inerteqqutaanera: Angallat angallatitut tunitsiviutigaluni aalisarsinnaanermut akuersissummik peqarsinnaanngilaq (§ 6).
Tamanna aalisarsinnaanermut akuersissutit pillugit nalunaarummut tunngatillugu nutaarluinnaavoq, tassanimi angallatit aalisarnermut atorneqartut attartornerillu kisimik malittarisassiuunneqarput, kisianni angallatit tunitsiviusartut pinnagit.

2. Nunami tunisassiorfiit
• Kommunimi akuersissuteqarneq: Nunami tunisassiorfiup pilersinnissaanut akuersissut kommuninit tunniunneqartarpoq (§ 13).
• Qinnuteqartumut piumasaqaat:
o CVR-mi nalunaarsorsimanissaq.
o Nunaminertamik atuinissamut akuersissut.
o Ukioq naallugu ingerlatsinermut missingersuut.
o Sarfamik imermillu pilersuineq pillugu Nukissiorfimmiit uppernarsaaneq.
o Inuussutissanik tunisassiornermut piumasaqaatinut uppernarsaaneq (akuersissuteqartarneq avammullu niuerneq).
• Nalunaarsuineq: Ingerlatsilernissaq sioqqullugu tunisassiorfik Naalakkersuisuni nalunaarsorneqarsimassaaq (§ 13).
Aalisarsinnaanermut akuersissutit pillugit nalunaarut angallatinut pisassiissutinullu malittarisassiorfiuvoq, kisianni nunami tunisassiorfiit pilersinnissaat ilaanani. Tamanna malittarisassioriaasiuvoq nutaarluinnaasoq.

3. Usilersoqqittarneq
• Akuersissut piumasarineqarpoq: Kalaallit Nunaata Aalisarnermut Oqartussaaffigisaani imaluunniit tamatuma avataani kalaallit angallataasa usilersoqqittarnerat immikkut akuersissuteqartoqarnissaanik pisariaqartitsiffiupput (§ 14).
• Qinnuteqaat makkuninnga imaqassaaq:
o Tunngavilersuineq
o Angallat nuussisarfik angallallu tigooraasoq.
o Sumiiffik piffissarlu.
• Akuersissut aatsaat immikkorluinnaq pisoqarsimatillugu tunniunneqartarpoq: assersuutigalugu motoorip ajutooqqanerani (§ 15).
• Kalaallit Nunaata aalisarnermut oqartussaaffigisaani angallatit nunami allamiut pigisaasa marluk akornanni usilersoqqittarnermut inerteqquteqartitsineq, matumani NEAF/NAFO-umiarsualiviit akuerisaasut minillugit (§ 17).
• Nunami allamiut angallataannut uppernarsaasarnissamut piumasaqaatit: Naalagaaffimmiit erfalasulimmiit IMO-normu, nunami sorlermi najugaqarnermut uppernarsaat, uuttuummut uppernarsaat, VMS-imik uppernarsaaneq (§ 18).
Aalisarsinnaanermut akuersissutit pillugit nalunaarummi usilersoqqittarnerit pinnagit attartortarnerit angallatinillu paarlaattarnerit pigineqarput. Tamanna malittarisassiorneruvoq nutaaq, pingaartumik nunani tamalaani piumasaqaatit (NEAFC/NAFO) eqqarsaatigalugit.

4. Immikkut akuersissuteqartarneq aallarnisaasutullu suliniutit
• Immikkut akuersissuteqartarneq: Angallammut piumasaqaatinit immikkut akuersissuteqarallartarnissamut periarfissaqartitsineq (§ 8–9).
• Aallarnisaasutut suliniutit: Immikkut akuersissuteqarnerit immikkorluinnaq ittut suliniutinut uumassusilerinikkut aningaasaqarnikkullu piujuartitsinermik tunngaveqarluni ilanngunneqarsinnaasutut nalilerneqartunut tunniunneqarsinnaapput (§ 10).
Aalisarsinnaanermut pisassiissutinullu akuersissutit pillugit nalunaarut akuersissutit atortarnissaannut ukiunullu piumasaqaatinut immikkut akuersissuteqarfiuvoq, kisianni aalajangersagaq taanna aallarnisaasutut suliniutilinnut atuutinngilaq. Tamanna nutaaliornissamut ammaaneruvoq nutaaq.

5. Pineqaatissiinerit pillaasarnerillu
• Angallatit tunitsiviusartut, nunami tunisassiorfiit usilersoqqittarnerillu pillugit malittarisassanik unioqqutitsinerit akiliisitsinernik arsaarinninnermillu malitseqarsinnaapput (§ 20).
• Ingerlatseqatigiiffit akiliisitsinernik akileeqquneqarsinnaapput.
Aalisarsinnaanermut akuersissutit pisassiissutillu pillugit nalunaarut pineqaatissiisarnermut aalajangersakkanik assingusunik imaqarpoq, kisiannili uani suliassaqarfinnik nutaanik (nunami tunisassiorfiit usilersoqqittarnerillu) ilaneqarluni.