Matumuuna Aalisarneq pillugu Inatsisartut inatsisaata nr. 29, 23. maj 2024-meersup allanngortinneqarnissaa pillugu Inatsisartut inatsisissaattut siunnersuut susassaqartut iluini tusarniaassutigineqarpoq.

Tusarniaassutigineqartumut ilanngussat makkuupput:

- Aalisarneq pillugu Inatsisartut inatsisaata allanngortinneqarnera pillugu Inatsisartut inatsisissaattut siunnersuut
- Siunnersuummut nassuiaatit

Siunnersuummut oqaaseqaatit kingusinnerpaamik Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmeeriissapput kingusinnerpaamik

25. maaji 2026 nal. 16.00

Siunnersuummut oqaaseqaatissat uunga e-mailimut nassiunneqassapput apn@nanoq.gl kiisalu thra@nanoq.gl imaluunniit allakkatigut, uunga

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik
Imaneq 1A, 701
Postboks 296
3900 Nuuk

Siunnersuummut tunngaviusoq

Aalisarneq pillugu inatsit ulloq 1. januar 2025 atuutilerpoq, tassungalu atatillugu siunnersuutigineqarpoq, naleqqussaalluni aaqqiissuteqartoqassasoq, tassani aaqqiissutissat amerlanerpaartaat allaqqasunik allannguinerullutik. Siunnersuulli allannguutinik piviusorsiornerusunik imaqarpoq, tassa immikkut ilisimasalittut siunnersuisoqatigiinnik Naalakkersuisunut siunnersuisartussanik atuutsilernissaq pillugu § 54 a, tassa Aningaasaqarnermut Siunnersuisoqatigiit Naalakkersuisunut siunnersuisarnerannut assingusumik pilersitsisoqassaaq, aamma § 10, imm. 1-imi allannguisoqarpoq, tassani oqaaseqatigiit pingajuat peerneqassasoq siunnersuutigineqarpoq, taamaalilluni akuersissummik piginnittup nammineerluni tunisinermi peqataasarnissaanut piumasaqaat atorunnaarsinneqarpoq.

Allannguutissatut inatsimmi uku allanngortinneqassasut siunnersuutigineqarpoq:

• § 3, nr. 15-imi oqaatsimut ”Piareersaaneq”-mut nassuiaat allanngortinneqarpoq, ilaatinneqanngitsunut pisanik qerititsisarneq maannamiit ilaalersillugu. Piareersaanermut maannamut nassuiaataareersoq malillugu avataasiorlutik aalisartut pisat piareersarneqarsimanngitsut 30%-iinik tunisassiorfinnut tunisaqarnissamik piumasaqaat naammassisinnaasanngilaat.

• Siusinnerusukkut taaneqartartoq ”Kalaallit Nunaanni Aalisarsinnaanermut Akuersissutinik Nakkutilliisoqarfik”, maanna ”Kalaallit Nunaanni Aalisarnermut Piniarnermullu Nakkutilliisoqarfik"-mik taaguuteqalernikuuvoq, tamannalu § 3, nr. 27-mi kiisalu § 5, imm. 1-imi 2-milu takuneqarsinnaassasoq siunnersuutigineqarpoq.

• § 10, imm. 1-imi oqaasertaliussat pingajuat atorunnaarsinneqassasoq siunnersuutigineqarpoq. Umiatsiaaqqanik 6 meterit inorlugit takissusilinnik aalisarnermi tamanna pingaaruteqarpoq, tassa allannguutip malitsigisaanik akuersissummik piginnittup nammineerluni aalisartariaqarnera pisariaarutissammat. Allannguinermut umiatsiaaqqat maanna nalunaarsorneqarsimasussaanerat, taamalu nakkutilliinermi periarfissap pitsaanerungaatsialersimanera pissutaavoq, taamaammallu aalajangersagaq iliuuseqarnissamut killiliisoq pisariaqarunnaarluni.

• Inatsimmi atuuttumi § 32, imm. 8 innersuussummik imaqanngimmat aaqqiissuteqarfigineqassasoq siunnersuutigineqarpoq.

• Tunumi avataasiorluni qaleralinniarnermut tunngatillugu pisassiissutinik pigisaqarsinnaanerup sivisussusissaa inatsimmi atuuttumi aalajangersaaffigineqarsimanngilaq. Inatsimmi taamatut ittumik piffissaliisoqassasoq siunnersuutigineqarpoq.

• Inatsimmik iluarsaassinermut atatillugu Aalisarneq pillugu Siunnersuisoqatigiinnut atugassarititaasunik allannguisoqalaassasoq siunnersuutigineqarpoq, tassani siunnersuisoqatigiit Naalakkersuisullu eqaannerusumik suleqatigiilernissaat anguniarlugu. Naalakkersuisut taamaalillutik inatsimmi allassimasut pillugit apeqqutinut aalajangersimasunut tunngatillugit siunnersuisoqatigiit isummernissaannut qinnuiginninnissamut pisussaaffeqarunnaassapput, illuatungaatigullu siunnersuisoqatigiit inatsimmi allassimasunik oqallisiginninnissamut killiligaanatik.

• Partiit naalakkersuisooqataasut naalakkersuisooqatigiinnissamik isumaqatigiissutaasa (”Kalaallit Nunaat toqqissisimasoq, kiffissaanngissuseqartoq ineriartorfiusoq ataatsimoorfigaarput”) kinguneranik siunnersuutigineqarpoq, siunnersuisoqatigiit immikkut ilisimasallit atuutsinneqalissasut, taakku arlaannaannulluunniit attuumassuteqassanngillat aamma aalisarnermut aningaasarsiornermullu tunngasunik Naalakkersuisunut siunnersuisassallutik. Tamanna siunnersuummi § 54 a-mi takuneqarsinnaavoq. Aalajangersagaq malillugu immikkut ilisimasalittut siunnersuisoqatigiit allattoqarnerat Naalakkersuisunit isumagineqassaaq, siunnersuisoqatigiit suleriaasissaannik aamma aalajangersaasinnaasunit kiisalu siunnersuisoqatigiinnut allatigut atugassarititaasunik sulisarnissaannullu nalunaarusiorsinnaasunit.