Ullut erfalasulerfissat pillugit Namminersorlutik Oqartussat nalunaarutissaattut siunnersuutip tusarniutigineqarnera

Ataqqinartorsuup Dronningip 14. januar 2024-mi tunuarnerata kunnginngortitsinerullu kingorna pisortatigoortumik ullut erfalasulerfissat kunngikkormiut aqqinut naapertuutilersillugit iluarsineqarnissaat piumasarineqarpoq. Kunnginngortoqarnerata kingunerisaanik Kunngikkormiutut Ataqqinassusilimmik malunnartitsiniarluni ulloq 15. oktober pisortatigoortumik ulloq erfalasulerfissatut ilanngunneqartariaqalerpoq. Kunngissap Christianip inuuia.

Allannguutit nalunaarummik nutaamik atuutilersitsinermik kinguneqartariaqarmata pisortatigoortumik ullut erfalasulerfissat tamarmik nalunaarummi maanna atuuttumi nr. 26, 11. november 2008-meersumi atuutilersinneqartut misissorneqarput nalilersoqqinneqarlutillu.

Nalunaarutip paasiuminartuunissaa eqqarsaatigalugu pisortatigoortumik ullut erfalasulerfissat nalunaarummut Ilanngussami 1-imi allattorsimasuutigineqassasut Erfalasorpullu atornagu allanik erfalasulernissamut pisinnaatitaaffiit pisussaaffiilluunniit nalunaarummut Ilanngussami 2-mi allattorsimasuutigineqassasut siunnersuutigineqarput.

Erfalasulertarneq pillugu malittarisassanut maannamut atuuttunut sanilliullugit nalunaarummut missingiutip imarisaata allannguutai imatut eqikkarneqarsinnaapput:

1) Kunngikkormiuni taaguutit allanngortinneqarnerisa kingunerisaanik ullut 5. februar (Ataqqinartorsuup Dronning Maryp inuuia) aamma 26. maj (Ataqqinartorsuup Kunngip inuuia) erfalasulerfissat taaguutaat nutarterneqarput.

2) Tamatuma saniatigut pisortatigoortumik ullut erfalasulerfissat nutaat uku siunnersuutigineqarput:

- Nunat Avannarliit ulluat (23. marts)
- Tussiarfissuaq
- Meeqqat ulluat (1. juni)
- Nunat Avannarliit Killiit ulluat (23. september)
- Kunngissap Christianip inuuia (15. oktober)
- Piniartut aalisartullu ulluat (15. november)
- Ukiutoqaq (31. december)

Nunat Avannarliit ulluat, Meeqqat ulluat, Nunat Avannarliit Killiit ulluat kiisalu Piniartut Aalisartullu ulluat ullut nalliuttorsiorfittut ullutsinni naleqquttutut, kalaallit ileqquinik, naleqartitaannik aamma Nunani Avannarlerni Nunanilu Avannarlerni Killerni nunat tamalaat ataqatigiinnerinik malunnartitsisutut nalilerneqarput.

Tussiarfissuaq Kalaallit Nunaanni ilagiit ulluattut naleqartillugu nalliuttorsiorfiusarpoq Ukiutoqarlu ukiup taarsinnginnerani ullorsiutigalugu malunnartinneqartarluni.

Kunngissap Christianip inuuia kunngissap allanngornerata kingunerisaanik malunnartinneqassaaq.

3) Taamatuttaaq ullut erfalasulerfissat tullinnguuttut nunatta nunanik sanilerisanik ataqateqarneranik malunnartitsisut siunnersuutigineqarput:

- Islandimi inuiattut ullorsiorfik (17. juni)
- Nunavut-ulluat (9. juli)
- Savalimmiuni inuiattut ulloq nalliuttorsiorfik, Olaip ullua (29. juli)

Nalunaarummut Ilanngussaq 2 naapertorlugu ulluni inuiattut ullorsiorfinni taakkunani Erfalasorput atornagu paarlattuanik nunat erfalasuinik atuinissamut pisinnaatitaaffeqassasoq pisussaaffeqassasorlu siunnersuutigineqarput. Danmarkimi inuiattut ullorsiorfimmut, Inatsisitaarfimmut malittarisassap taamaaqataa siunnersuutigineqarpoq.

Allamik erfalasulernissamut periarfissami naalagaaffeqatigiinnermi ulluni inuiattut ullorsiorfiusuni, tassa imaappoq Danmarkimi Savalimmiunilu inuiattut ullorsiorfinni, taama tulleriissillugit Dannebrog imaluunniit Merkið pisortat illorsuini tamani amuneqarnissaa piumasaqaataavoq. Paarlattuanik Islandip Nunavulluunniit erfalasuanik ulluni erfalasulerfinni pineqartuni Erfalasutsinnut taarsiullugit erfalasulertoqarsinnaavoq.

4) Ukiumut ullut erfalasulerfiit amerlassusaat naleqquttuutinniarlugit manna tikillugu ullut erfalasulerfiusimasut pingaaruteqannginnerusut tullinnguuttumiittut nalunaarummiit peerneqarnissaat siunnersuutigineqarput:

- Prinsesse Mariep inuuia (6. februar)
- Prinsesse Benediktep inuuia (29. april)
- Prins Joachimip inuuia (7.juni)
- Valdemarip ullua/ataatsimuuleqqiffik (15. juli)
- Hans Egedep ullua (3. juli)

Tamatuma saniatigut 1. maj manna tikillugu "Namminersornerulernerup eqqunneqarfianik / Sulisartut ulluannik" taagorneqareersoq "Sulisartut ulluannik" taaneqartalernera oqaatigineqassaaq.

Tamatuma saniatigut nalunaarummi § 2-p allanngortinnissaa siunnersuutigineqarpoq, taamaalilluni erfalasup kingusinnerpaamik nalunaaqutaq 9.00 amuneqartarneranut malittarisassap attanneqarnera pissutigalugu erfalasoq siusinnerpaamik nal. 6.00 amuneqartassalluni.

Tusarniaanermut akissuteqartoqassappat taakku kingusinnerpaamik ulloq una nassiuteqquneqarput: 21 november 2024 nal. 12.00.

Tusarniaanermut akissutit e-mailadressemut uunga nassiunneqassapput: nsninatsit@nanoq.gl