Nalunaarasuartaatinik pingaarnersiuineq pillugu nalunaarutissatut siunnersuutip tamanut tusarniutigineqarnera
Nalunaarasuartaatinik pingaarnersiuineq pillugu nalunaarutissatut siunnersuut ilanngussatut ilanngunneqartoq nassiunneqarpoq.
Immikkut ittumik pisoqartillugu piginnaasat killeqartillugit, nalunaarasuartaatitigut attaveqarnermi piginnaasat pingaarnersiorneqarnissaannut inatsisitigut tunngavissaqarnissaq qulakkiissallugu nalunaarutitigut siunertaavoq.
Nalinginnaasumik pisoqartillugu niunermi tunngaviit malillugit piginnaasat agguataarneqassapput, nalunaarasuartaatigullu attaveqaat sumut atorneqarnissaa aallaavigalugu Tusass atuisunik immikkoortitereqqusaanngilaq. Nalunaarasuartaatinik neqerooruteqartartut, taakkualu atuisui salliunneqarnissamik ullumikkut pisisinnaapput. Taamaalilluni nalunaarasuartaatitigut attaveqarnerat allanit salliusarpoq.
Immikkut ittumik pisoqartillugu niuernermik tunngaveqarluni taamatut pingaarnersiuineq inuiaqatigiinni datamik pisariaqartitsinerup matussusernissaanut naammassinnaanngilaq, nalunaarasuartaatitigullu attaveqarsinnaanngikkaanni inuiaqatigiinni pisariaqavissut eqqorneqarsinnaallutik. Immikkut ittumik pisoqartillugu nalunaarasuartaatitigut attaveqarnermik pingaarnersiuinissaq pillugu Nalunaarasuartaateqarnermi Aqutsisoqarfik aalajangiisinnaanissaannut, nalunaarut inatsisitigut tunngavissiivoq.
Taamaattoqassappat piginnaasat atorneqarsinnaasut, inuiaqatigiinnilu pisariaqavissut eqqorneqarsinaasut tunuliaqutaralugit pingaarnersiuinissamik Nalunaarasuartaateqarnermi Aqutsisoqarfik aalajangiissaaq. Taamatut suliaqarnermi Nalunaarasuartaateqarnermi Aqutsisoqarfiup upalungaarsimasut, upalungaarsimatitaasullu ataqatigiissaareqatigissavai.
Ajornartoorneq pingaarnersiuisoqarnissaanik pisariaqartitsinertalik marlunnik immikkoortoqassaaq. Inuunermik qulakkeerinissamut kiisalu oqartussat ajornartoornermi aqutsinissaasa aallartinneqarnissaannut pingaaruteqarlutik inuiaqatigiinni pisariaqavissunik sisamanik, immikkoortumi siullermi Tusass pingaarnersiuissaaq.
Pinartumik immikkut ittumik pisoqartillugu piginnaasat killeqarnerisigut tulliuttumi inuiaqatigiinni pisariaqavissut eqqugaasinnaatillugit, Tusass nammineq suliniuteqarnermigut nalunaarasuartaatitigut attaveqarneq taakkununnga pingaarnersiussavaa.
Inuiaqatigiinni pisariaqavissut pingaarnersiorneqartut aallaavittut tassaapput:
- Normut kallerisaariviit
- Politiit
- Illersornissaqarfik
- Peqqinnissaqarfik
Taassumap kingorna Tusass-ip Nalunaarasuartaateqarnermi Aqutsisoqarfik ilisimatissavaa, pisorlu immikkoortoq 2-mut pissalluni.
Pisoq tunuliaqutaralugu immikkoortoq 2-mi Nalunaarasuartaateqarnermi Aqutsisoqarfik pingaarnersiuineq pillugu aalajangiissaaq. Pisoq apeqqutaatillugu Nalunaarasuartaateqarnermi Aqutsisoqarfiup assersuutigalugu tulliuttut pingaarnersiorsinnaavai: timmisartut, imarsiortullu attaveqarnerat angalanerallu, KNR radio aamma TV, innaallagissamik, imermik, kiammillu pilersuiviit, oqarasuaatinik angallattagaqarneq, innuttaasunik eqqugaasinnaasunik kommunit nakkutiginninnerat, aningaaseriviit, nerisassaarniarfinni akiliisarfiit.
Nalunaarut naapertorlugu tulleriiaarinissamut ilitsersuummik, Ineqarnermut Attaveqaasersuutinullu Naalakkersuisoqarfiup Nalunaarasuartaateqarnermi Aqutsisoqarfik tunisinnaavaa.
Nalunaarasuartaateqarnermi attaviit pingaarnersiorneqarnissaannut nalunaarut periarfissiivoq.
Inuiaqatigiinni pisariaqavissunut akisussaaffeqarlutik ingerlatsisut, nalunaarasuartaatitigut killilimmik attaveqarnermi imaluunniit attaveqannginnermi inuiaqatigiinni pisariaqavissortami atatiinnarneqarsinnaanissaanut sapinngisamik pilersaarusiornissaannut, nalunaarutitigut pinngitsoortinneqanngillat.
Illoqarfiit nunaqarfiillu akornanni, nunallu avataanut attaviit ikitsuinnaammata, Kalaallit Nunaanni nalunaarasuartaatitigut attaviit eqqugaasinnaapput. Ilutigisaanik silarlutsillugu attaviit eqqorneqarsinnaasarput. Taamaalilluni nalunaarasuartaatitigut attavinnik atuinermi sivikinnerusumik imaluunniit sivisunerusumik killeqaratarsinnaanngikkuni attaveeruttarsinnaavoq.
Tusarniaanermut 2024-mi oktobarip 10-ia kingusinnerpaamik akissuteqarfissaavoq.
Tusarniaanermi akissutit box909@nanoq.gl-imut, dojm@nanoq.gl CC-rlugu nassiunneqassapput.
Inussiarnersumik inuulluaqqusillunga
Dorte Juul Munch
Toqq/direkte 345256
dojm@nanoq.gl