Sanaartornermi maleruaqqusaq 2024 (BR24) nutaaq tusarniaassutigineqarpoq

Matumuuna sanaartornermi maleruaqqusaq 2024 pillugu Namminersorlutik Oqartussat nalunaarutaannut siunnersuut tamanut ammasumik tusarniaassutigalugu nassiunne¬qarpoq.

Sanaartornermi maleruaqqusamik nutaamik nassiussinissamut pissutaavoq, silap pissusaata allanngoriartornerata aammalu CO₂-mik aniatitsinerup annikillisinnissaa siunertaralugu suliniutissanik nutaanik ujartuinerup, inuiaqatigiinni nalinginnaasumik eqqumaffigineqariartuinnavinnerat. Tassani aamma illuliornermut sanaartornermullu suliassaqarfik, nukissiamik atuinerup annertunerpaartaanik atuiffiusartoq, pineqartunut ilaavoq.

Illuutit pisoqaanersaasa ilaannaanniinngitsoq, kisianni aamma illuliani nutaani illup iluata silaannaa, tamatumalu malitsigisaanik oqoqaleriartortarneq, isugutak pissutaalluni ajornartorsiutaasarnera ataasiakkaatigut ilungersunartorsiorfiusarpoq.

Naatsumik oqaatigalugu sanaartornermi maleruaqqusami allannguutit makkua atuutsinneqalerput:

• Illuliani nutaani kiassarnermut silaannarissarnermullu nukissiamik atuinermut piumasaqaatit sukaterneqarput, taamaalilluni atuinissaq 25-30 pct-inik annikillisinneqarluni.
• Illuni pioreersuni allanngortiterinermi nukissiamik atuinnginnerulernerit piviusunngortinnissaat pillugit piumasaqaatit atuutsinneqalerput.
• Illup sannai aamma illuliornermi atortut isugutaqqusaanngitsut pillugit piumasaqaatit atuutsinneqalerput, iserternermi oqoqalersinnaaneranut aarlerinartorsiortitsisussaammata.
• Pujuliornernut kalerrisaarutinik inissiani, akunnittarfinni ilinniartut inaanni il.il. sarfamik pilersuinermut aalajangersimasumik atassuserlugit, atortulersuisarneq pillugu piumasaqaatit atuutsinneqalerput.
• Illuliani tikikkuminartitsinissaq pillugu piumasaqaatit erseqqissarneqarput aammalu titartaganngorlugit takussutissianik tunngavilersorneqarlutik.
• Sanaartugassamut pilersaarusiornermut tunngavissat, illup sannaannik suliaqarneq misissuisarnerlu, Kalaallit Nunaanni, nunami namminermi eurocodes-inut ilanngussanik ataatsimoortunik atuutsitsilernikkut, nutarterneqarput.
• Siunissami (maannamuugallartoq ukiuni marlunni) illuliat nutaat, sannaasa najummisuini ajutoornermi annertuumik sunniuteqarsinnaanera aarlerinaate-qartut, siunnersortinit akuersissummik allagartaqartunit sanaartugassartai pilersaarusiorneqassasut misissorneqartassasullu, atuutsinneqalerpoq (taamaaliornermi kommunit illuliani pisariusuni illut sannaanik misissuinermik suliaqartarunnaassallutik).

Naliliisoqarpoq suliniutissat taakkua illulianut nutaanut, illuliap piffissaq atuuffissaata ingerlanerani, aningaasartuutitigut sunniuteqassanngitsut.

Illuliani nutaani nukissiamik atuinermut piumasaqaatit sukaterneqarnissaannik siunnersuutigineqartut, illuliap akisunerulernerani maannakkut kinguneqartussaapput. Paarlattuanik akisunerulernera nukissiamik atuinerup annikillisinneratigut sipaarute¬qarnermik siunissami nalimmatsinneqassasut ilimagineqartariaqarpoq. Nukissiamik atuinnginnerulerneq ataatsimut isigalugu, siunissami pisortat nukissiamik pilersui¬nissaannik pisariaqartitsinissap annikillisinneqarnera pissutigalugu, silap pissusaanut pitsaasumik sunniuteqarnissaata saniatigut, inuiaqatigiit aningaasaqarnerannut iluaqutaasumik sunniuteqartussaavoq.

Illuliani pioreersuni nukissiamik atuinnginnerulernissamut iliuusissat pillugit piumasa-qaatini siunertarineqarpoq, nukissiamik atuinermi sipaaruteqarnissaq aningaasaliinermut tunngatillugu isumatusaartumik ingerlanneqassappat, iliuusissat aatsaat suliarine¬qassasut. Tamatuma kingunerisaanik illunik piginnittut, piumasaqaatip malitsigisaanik allanngortiterisussat, allanngortiterinermik suliaqarnermut aningaasartuuteqassasut ilimanarpoq, kisianni nukissiamik atuinermi sipaaruteqarnerup anguneqarnerani, aningaasaliissutit imminut akilertussaapput.

Taamatuttaaq takorloorneqartariaqarpoq, isugutammut piumasaqaatit sukaterneqartus¬satut siunnersuutigineqartut, illuliami toqqaannartumik aningaasartuutit qaffannerannik kinguneqarnissaa ilimanarpoq. Illuliap qajannaannerulernera, siunissami toqqaannartu¬mik aningaasartuutinik qaffasinnerulersunik tamakkiisumik nalimmatsitsisussatut ilimagineqartariaqartoq, iluanaarutaasussaassaaq.

Siunnersuutigineqarpoq BR24 1. januar 2025 atuutilersinneqassasut. 30. juni 2025 tungaanut piffissami ikaarsaarfiusumi, sanaartornermi maleruaqqusaq BR24 nutaaq imaluunniit Illuliornermi malittarisassat 2006 atorunnaartut malinniarnerlugit, nammineq aalajangerneqarsinnaassaaq.

Tusarniaanermut akissuteqarnissamut killigititaq
Sanaartornermi maleruaqqusaq 2024-mut siunnersuummut oqaaseqaatissaqaraanni, taakkua Ineqarnermut Attaveqaasersuutinullu Naalakkersuisoqarfimmut nassiuteqquneqarput uunga e-mail:box909@nanoq.gl assilinera uunga nassiunneqassalluni 
e-mail:jks@nanoq.gl.

Oqaaseqaatit Naalakkersuisoqarfimmi tiguneqareersimassapput kingusinnerpaamik tallimanngornermi ulloq 4. oktober 2024.

Siunnersuummut apeqqutissaqaraanni saaffigineqarsinnaavoq Janus Køster uani 
e-mail:jks@nanoq.gl  imaluunniit tlf. 34 54 54.

Inussiarnersumik inuulluaqqusillunga
Med venlig hilsen

Janus Køster