Uunga siunnersuummut tusarniaaneq: Namminersornerullutik Oqartussat kommuunillu inissiaataannik inissiaataannik attartortittakkanik inissiatut imaluunniit illutut nammineq pigisatut tigusisarneq pillugu Inatsisartut peqqussutaata allanngortinneqarnera pillugu Inatsisartut inatsisaat (Inissianik attartortittakkanik pigisatut inissianngortitsineq, kaaviaartitsinissamut inerteqqut, piffissaq sioqqullugu taarsigassarsianik akiliineq il. il.)

Uunga siunnersuut: Namminersornerullutik Oqartussat kommuunillu inissiaataannik attartortittakkanik inissiatut imaluunniit illutut nammineq pigisatut tigusisarneq pillugu Inatsisartut peqqussutaata allanngortinneqarnera pillugu Inatsisartut inatsisaat (Inissianik attartortittakkanik pigisatut inissianngortitsineq, kaaviaartitanut tunngasunut inerteqqutit, piffissaq sioqqullugu taarsigassarsianik akiliineq il. il.) tamanut tusarniutigineqarpoq.

Siunnersuutip immikkoortui pingaarnerit

• Pisortat inissiaataasa attartortakkat inissianut nammineq pigisanut allanngortinneri tunineqarnerilu. Naalakkersuisut imaluunniit kommunalbestyrelsip namminneq suliniuteqarnerisigut pisortat inissiaataasa attartortittakkat inissiatut nammineq pigisatut allanngortinnissaannut aalajangiisinnaanngortillugit periarfissaannik aalajangersakkamik ilanngussisoqarpoq.  Inissiat nammineq pigisatut allanngortinneqartut tamatuma kingorna attartortooreersunut tunineqarnissaannut neqeroorutigineqassapput. Attartortup inissiaq attartukkani pisiarerusussanngippagu, attartornermi atukkat allanngortinneqaratik ingerlaannassapput. Inissiaq nammineq pigisaq inigineqarunnaaraangat inissiaq nammineq pigisassatut tamanut ammasumik tuniniarneqartassaaq.  
  
  Naalakkersuisut kommunalbestyrelsilu inissianik nammineq pigisanik atorneqanngitsunik tamanut ammasumik neqerooruteqartitsinermi inissianik nammineq pigisassanik nutaanik, siunissami qaninnerusumi ungasinnerusumilu, tamakkiisumik ilaannakuusumilluunniit ilaneqarsinnaanerinik nalilersuisassapput.   
  
  
• Inissianik nammineq pigisanik tuniniaaneq Pisortat inissiaataasa tuniniarnerinik aallaavittut niuerfinni naligitinneqartut naleqqataannik akilersillugit tuniniarneqartassasut aalajangertoqarpoq. Inissiaq tamarmiusoq kvadratmeterimut minnerpaamik  7.000 kr.-mut akeqartinneqartassasoq aalajangertoqarpoq. Akip akikinnerpaaffissaanik aalajangersaanermi illoqarfiit anginerusut avataanni inissianik nammineq pigisanik allanngortitsineq inissiat nammineq pigisat piviusumik pisiarinerini akikinnerusumik akeqarsinnaasarneri pingaartinneqarput. 
  
  Inatsisartuni Aningaasaqarnermut Akileraartarnermullu Ataatsimiititaliap tigussaasumik nalileereernerata aamma akuersisereernerata kingorna inissiat attartortittakkat allanngortinneqarsimasut niuernermi nalingi inorlugit minnerpaamillu akii inorlugit neqeroortitsisoqarsinnaavoq.  Soorlu inissiamut nammineq pigisamut neqeroorutigineqartumut neqeroorutinik tigusaqartoqarsimatinnagu niuernermi akimut imaluunniit minnerpaamik akimut aalajangersagaq atorneqarsinnaavoq. 
  
  
• Attartortunut tunisinermi akip procentikkaarlugu tamanut atuuttumik milliartortinneqarnera. Attartortup ukiunik attartorsimanera aallaavigalugu tunisinermi akimik maannakkut akikillisaaneq nalinginnaasumik procentinngorlugu akikillisaassutigineqartassaaq. Maannakkut attartortumut tunisinermi aki 20 %-imik akikilliliisoqartassasoq siunnersuutigineqarpoq.  Inoqarfinni illuummik qularnaveeqqusiilluni taarsigassarsiamik pissarsiffiusinnaanngitsuni pisinermi aki 30 %-imik akikillineqartassaaq.  
  
  
• Inoqarfinni aningaaserivinnit attartortitsiviusinnaanngitsuni pisortanit attartortoqartarpoq. Inoqarfinni aningaaserivinnit attartortitsiviusinnaanngitsuni pisortanit attartornissamut periarfissalinni tunisinermi akip 50 %-ia angullugu attartorsinnaaneq aalajangersakkamik atuutilersitsisoqarpoq. Taamaalilluni pisineq akit nikingassutaannut qularnaveeqqusiissutai 30 %-imik, pisortat attartortittagaat 50 %-imik aamma aningaaseriviup attartortitai 20 %-it atorlugit aningaasalersorneqarsinnaavoq. Taarsigassarsiat ukiuni qulini ernialersorneqaratillu taarsiissutitaqassanngillat tamatumalu kingorna ukiut 20-t ingerlaneranni ukiumut assigiiaartumik taarsigassarsiatut akilersorneqassapput. 
  
  
• Inuusuttunut periarfissat pitsaanerit. Inuusunnerit inissianik pisisarnissaannut periarfissat pitsanngorsarniarneqarput, siullermeerlutik pisiniartut inuusuttut 30-t tungaanut ukiullit, inissiamik allanngortitikkamik namminerlu pigineqartumik inuttaqanngitsumik tamanut tuniniakkamik neqeroorlutik pisisut, piginnittut allat assigalugit pineqassapput. Inuusuttunut 30-t tungaanut ukiulinnut attartortut inissianik attartukkanik allanngortinneqarsimasunik pisisunut piumasaqaatit assigalugit akimik akikillisaaffigineqarlutillu pisortanit aningaasalersuisoqarnissaanik pissarsisinnaassapput. Inuusuttoq 30-t tungaanut ukiulik inissiamik nammineq pigisamik imaluunniit illumik nammineq pigisamik piginnittooreeruni imaluunniit piginneqataareeruni pisortat aningaasaleeqataaffigisaannik inissiamik nammineq pigisamik pineqartoq pisisinnaassanngilaq. 
  
  
• Taarsigassarsianik allanngortitsisarneq pingaarnersiuisarnermillu allannguinerit: Aalajangersakkamik taarsigassarsiat siuliani taaneqartut allanngortinnissaannut imaluunniit illuutip allatut pingaarnersiuiffiginissaanut ilaasumik taarsigassarsiarititaasimasut pillugit pisortani oqartussaasup ataqqinninnermut nalunaaruteqartarnissaanut periarfissaqartitsisumik atuutsitsilertoqarpoq. Illuummi pisortat taarsigassarsititsinerannut qularnaveeqqusiisarnissap suli isumannaatsuunissaata qulakkeerneqarnissaa anguniarlugu illumik piginnittup taarsigassarsiarisaanut nutaanut taarsigassarsisarnermut amerlanerpaanik killissarititamik ilanngussisoqarpoq.   Taarsigassarsititsinermut killiliussaq inissianut ukiut 20-t angullugit pisoqaassusilinnut niuerfinni inissiap nalingata 90 %-ianut aalajangersarneqassaaq.  Tamatuma kingorna taarsigassarsisinnaanermut killiliussaq 80 %-inut millilerneqassaaq.  
  
  
• Piffissaq sioqqullugu akiliineq - kingumut tunniussisarnermut erniaqartitsineq. Kommuunit aningaasalersuisarnermut aaqqissuussinerup nalilersuiffiginerani pisortanit taarsigassarsiaritinneqartut nalingani ernialiinermi erniap atuuttup massakkullu aningaasat naleerukkiartornerata akornanni assiginngissutsip kingunerisaanik suujunnaarsikkiartulerneqarumaartut erseqqissarsimavaat.   Unamminartoq tamanna aaqqiiviginiarlugu kingumut nuussinermi erniaritinneqartoq Naatsorsueqqissaartarfiup qaammatinut 12-inut kingullernut atuisunut akinut naleqqersuutinut kingullermik naatsorsuutaanut 1 procentpointimik ilallugit naapertuuttumik ernialerlugit allanngortinneqassasoq siunnersuutigineqarpoq. 
  
  
• Piginnittut nikinnerinut akiliut. Siunnersuutigineqarpoq siunissami pisortani taarsigassarsiani taarsigassarsiat atsiorneqarnerminni angissusiata 15 %-ianik piginnittut nikinnerini akiliummik akiliisoqartalissasoq. Siunnersuut illuliortiternernut aningaasalersuineq pillugu Inatsisartut inatsisaanni malittarisassap taamaaqataatut isikkoqarpoq. 
  
  
• Pisortani qularnaveeqqusiussaqarluni taarsigassarsinermi allagartaq - 
  taarsigassarsinermi kaaviiartitassatut allagartaanngitsut: Namminersornerullutik Oqartussat kommuunillu inissiaataannik attartortittakkanik inissiatut imaluunniit illutut nammineq pigisatut tigusisarneq pillugu Inatsisartut peqqussutaanni massakkut atuuttumi imaluunniit tamanna pillugu siusinnerusukkut inatsisit naapertorlugit pisortat taarsigassarsisitsinerannut ilaasumik pisortanut atulersinneqartut  qularnaveeqqusiussaqarluni taarsigassarsinermi allagartat akiitsullu allagartai tunisinerni, taarsigassarsianut qularnaveeqqutitut imaluunniit akiligassaqarfiit malersornerinut atorneqartannginnissaat aalajangersaavigineqarput.

Siunnersuummut, taassuma siunertaanut imarisaanullu tunuliaqutaasut sukumiinerusumik paaserusunneqarunik siunnersuutip nassuiaatitai ilanngullugit nassiunneqartut kiisalu inissianut aningaasalersuisarnerit pillugit aaqqissuussinerit nalilersorneqarneri, immikkoortoq 2-miittut Naalakkersuisut nittartagaanni nassaarineqarsinnaasut innersuussutigineqarput: https://naalakkersuisut.gl/Departementer/Dep_for_Boliger_og_Infrastruktur/Publikationer?sc_lang=kl-GL 

Oqaaseqaataasinnaasut Ineqarnermut Attaveqaasersuutinullu Naalakkersuisoqarfimmut kingusinnerpaamik ullormi 14. september 2024 nal. 12 nassiuteqquneqarput. Oqaaseqaatit naalakkersuisoqarfiup pisortatigoortumik e-mailianut box909@nanoq.gl-imut imaluunniit uunga:

Ineqarnermut Attaveqaasersuutinullu Naalakkersuisoqarfik
Postboks 909
3900 Nuuk