Uunga siunnersuummut tusarniaaneq: Illuliortiternernut aningaasalersuineq pillugu inatsisip allanngortinnissaa pillugu Inatsisartut Inatsisaat (Tulleriiaarinissamut uppernarsaaneq, sanaartortitsinernut naatsorsuutit, kaaviiaartitsinissamut inerteqqut, piffissaq sioqqullugu taarsigassarsianik akiliineq il.il.)

Maanna nassiunneqarpoq tusarniaaneq uunga siunnersuummut: Illuliortiternernut aningaasalersuineq pillugu inatsisip allanngortinnissaa pillugu Inatsisartut Inatsisaat (Tulleriiaarinermut uppernarsaaneq, sanaartortitsinernut naatsorsuutit, kaaviiaartitsinissamut inerteqqut, piffissaq sioqqullugu taarsigassarsianik akiliineq il.il.)

Siunnersuummi tunuliaqutat siunertallu
2022-mut aningaasanut inatsisissap isumaqatiginninniutigineqarnerani Ineqarnermut Attaveqaasersuutinullu Naalakkersuisoq inissiaqarnermut suliassaqarfimmi aningaasalersuisarnermut aaqqissuussinerup nalilersuiffiginissaanut suliaqaqqullugit peqquneqarsimavoq. Nalilersuineq marlunnut avinneqarsimavoq, siullerlu november 2023-mi tunniunneqarluni.

Nalilersuinerup immikkoortuani siullermi paasissutissat atortussallu kommuuninit tunniunneqartut tunngavigalugit illuliortitsinermut aningaasalersuisarnermut aaqqissuussinermut kommuunit suliarinnittarnerat atuisarnerallu pineqarpoq. Nalilersuinerup immikkoortuani siullermi inerniliunneqartut Namminersorlutik Oqartussat kommuunillu akornanni artornartunut suliassanullu agguataarisarnermut tunngatillugu innersuussutissanut arlalinnut tunngaviliipput.

Nalilersuinerup immikkoortuata tulliani suliassaqarfimmut inatsisit inatsisilerinikkut misissuiffiginissaannik kiisalu aaqqissuussinerit allaffissornikkut aqutsinikkullu kommuunit naalakkersuisoqarfiullu misilittagaannik tunngaveqarput. Kommuunit aaqqissuussinerup allaffissornikkut suliarinissaanut akisussaasuupput, naalakkersuisoqarfillu inatsisip paasinissaanut akisussaasuulluni.

Nalilersuisimaneq tunngavigalugu kommuunit aaqqissuussinernut aqutsinerisa oqinnerulernissaat anguniarlugu aammalu inuiaqatigiit aningaasaataannik pitsaanerpaamik atuisoqarnissap qulakkeernissaa anguniarlugu pissutsit arlallit erseqqissaaffigineqartariaqartut paasineqarsimapput. Allannguutissatut siunnersuut ataatsimut isigalugu innuttaasut aaqqissuussinermut periarfissaannik isersinnaanerannullu pitsanngorsaataassaaq.

Siunnersuutip immikkoortui pingaarnerit

• Najugaqarfissatut atuisarneq: Inissiaq Inissianut aningaasalersuisarneq pillugu Inatsisartut inatsisaat naapertorlugu taarsigassarsiat atorlugit tunniunneqartut taamaallaat piginnittumit taassumalu inoqutigiivinit imaluunniit pisariaqarsimappat attartortumit atorneqarsinnaanera erseqqissarneqarpoq. Inissiamik piginnittoq imaluunniit attartortoqarsimappat taassuma inissiamiit inuussutissarsiummik namminersortumik mikinerusumik ingerlatsiuaannarsinnaassapput.
• Taarsigassarsianik allanngortitsisarneq allatullu pingaarnersiuisarneq: Aalajangersakkamik taarsigassarsiat siuliani taaneqartut allanngortinnissaannut imaluunniit illuutip allatut pingaarnersiuiffiginissaanut ilaasumik taarsigassarsiarititaasimasut pillugit pisortani oqartussaasup ataqqinninnermut nalunaaruteqartarnissaanut periarfissaqartitsisumik eqqussisoqassaaq. Illuummi pisortat taarsigassarsititsinerannut qularnaveeqqusiisarnissap suli isumannaatsuunissaata qulakkeernissaa anguniarlugu inissiamik piginnittup taarsigassarsiarisaanut nutaanut taarsigassarsisarnermut qummut killissarititamik ilanngussisoqassaaq.
• Iluarsaanernut taarsigassarsiat ingerlaavartumik tunniuttarnerat: Aalajangersakkamik inissiat pioreersut iluarsartuunnissaannut, pitsanngorsaaffiginissaannut imaluunniit allilernissaannut taarsigassarsianik ingerlaavartumik tunniussisarnissamut kommunalbestyrelsimut piginnaatitsisumik eqqussisoqassaaq. Ingerlaavartumik tunniussisarnerit aatsaat pisinnaapput sulinermut suliarineqartumut atortunullu tunniunneqartunut sanaartortitsisartumit akiliuteqarnerit tunngavigalugit.
• Piffissaq sioqqullugu taarsigassarsianik akiliineq - kingumut tunniussisarnermut erniaqartitsineq: Kommuunit aningaasalersuisarnermut aaqqissuussinerup nalilersuiffigineranut atatillugu pisortanit taarsigassarsiaritinneqartut nalingani ernialiinermi erniap atuuttup massakkullu aningaasat naleerukkiartornerata akornanni assiginngissutsip kingunerisaanik suujunnaarsikkiartulerneqarumaartut erseqqissarsimavaat. Unammilligassaq tamanna piareersimaffiginiarlugu kingumut nuussinermi erniaritinneqartoq Naatsorsueqqissaartarfiup qaammatinut 12-inut kingullernut atuisunut akinut naleqqersuutinut kingullermik naatsorsuutaanut 1 procentpointimik ilallugit naapertuuttumik ernialerlugit allanngortinneqassasoq siunnersuutigineqarpoq.
• Pisortani qularnaveeqqusiinermut allakkat – kaaviiaartitsinermut allakkanik inerteqquteqarneq: Malittarisassat atuuttut malillugit Illuliortitsinernut aningaasalersuisarneq pillugu Inatsisartut inatsisaat massakkut atuuttoq imaluunniit illuliortiternermut aningaasalersuisarneq pillugu siusinnerusukkut inatsisaasimasut naapertorlugit Naalakkersuisut kommunalbestyrelsillu qularnaveeqqusiussaqarluni taarsigassarsinermut pisortanit qularnaveeqqusiinikkut tunniunneqartut tunisarnissaannut imaluunniit qularnaveeqqusiassanut allagartat tuniniarsinnaanissaannut malittarisassiortoqarsimanngilaq. Tunngaviatigut qularnaveeqqusiinermut allakkat kaaviiaartinneqarsinnaapput, paarlattuanik kaaviiaartitatut atorneqartanngikkaluartut soorlu tamakkuninnga tuniniaasoqartanngikkaluartoq imaluunniit taarsigassarsititsisoqartanngikkaluartoq.
  
  Sanaartukkanut naatsorsuutit uppernarsakkat: Kiap sanaartukkanut uppernarsaasarnissaanut erseqqissaanermik ilanngussisoqassaaq.
  
  Siunnersuummut, tassani siunertamut imarisanullu tunuliaqutaasut sukumiinerusumik paaserusunneqarpata siunnersuummut nassuiaatit ilanngullugit nassiunneqartut kiisalu inissianut aningaasalersuisarnerit pillugit aaqqissuussinerit, immikkoortoq 2-miittut Naalakkersuisut nittartagaanni nassaarineqarsinnaasut innersuussutigineqarput: https://naalakkersuisut.gl/Departementer/Dep_for_Boliger_og_Infrastruktur/Publikationer?sc_lang=kl-GL
  
  Oqaaseqaataasinnaasut Ineqarnermut Attaveqaasersuutinullu Naalakkersuisoqarfimmut kingusinnerpaamik ullormi septembarip 9-ani 2024 nal. 12 nassiuteqquneqarput. Oqaaseqaatit naalakkersuisoqarfiup pisortatigoortumik e-mailianut box909@nanoq.gl-imut imaluunniit uunga:
  
  Ineqarnermut Attaveqaasersuutinullu Naalakkersuisoqarfik
  Postboks 909
  3900 Nuuk