Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik

Kommunini nunalerinermik ingerlatsiviusuni, nunalerineq pillugu Inatsisartut Inatsisaat nr. 5, 2. maaji 1996-imeersoq naapertorlugu nakkutilliinermut ataatsimiititaliaqartussaavoq, nunalerinermik nakkutilliisussamik.

Nunalerinermik Siunnersorteqarfik ingerlatsinerup nalilersorneqarnissaanut nakkutilliinermut ataatsimiititaliat suleqatigalugit paasissutissanik katersisarpoq. Nunalerinermik Siunnersorteqarfimmit inassuteqarneq malillugu nakkutilliinermut ataatsimiititaliat nunaatilinni anigorniagassaqartuni nakkutilliiartorsinnaapput. Tamatuma saniatigut ukiumoortumik nunaatillit tulleriissaanngitsumik toqqakkat takusarneqartarput.

Ataatsimiititaliat kommunit ingerlatsiviineersunik kommunimit toqqagaasunik ilaasortaqarput aammalu SPS-imit toqqagaasunik ilaasortaqarlutik. Piumasaqaataavoq kommunit nakkutilliinermut ataatsimiititaliani amerlanerussuteqassasut. Pisariaqartitsineq malillugu ilinniarsimasunik pisariaqartunik, assersuutigalugu uumasut nakorsaat, aalajangiisinnaatitaanngitsunik peqataatitsisinnaapput.

Nakkutilliinermut ataatsimiititaliat ukiumoortumik Naalakkersuisunut nassuiaasiortarput.

Ataatsimiititaliani ilaasortat kommunimit pineqartumit aamma SPS-imit inassutigineqartarput. Tamatuma kingorna ilaasortat Nunalerinermut Naalakkersuisumit akuerineqartarput, aammalu ataatsimiititaliaq ukiunut sisamanut pilersinneqartarluni.

Nunalerinermik Siunnersorteqarfik ataatsimiititalianut allattoqarfimmi sullissisuuvoq. Ataatsimiititalianut attaveqarneq siunnersorteqarfik aqqutigalugu pisinnaavoq uani info@nunalerineq.gl imaluunniit +299 64 23 06.