Ilinniartitaanermut, Kultureqarnermut, Timersornermut Ilageeqarnermullu Nalaakkersuisoqarfiup pingaarnertut suliassaqarfii ukuupput:

Suli atualinngitsunut tunngaviusumillu atuarfimmut, efterskolinut folkehøjskolinullu kiisalu ilinniagaqalernissamut piareersaataasumik ilinniarnernut, inuussutissarsiutitigut ilinniartitaanernut nangitsiviusumillu ilinniarnernut tunngatillugit suliaqarfinnik nutaanik atuutereersunillu pilersitsinermut atatillugu pilersaarusiorneq maleruagassanillu aalajangersaaneq, imarisassanik aalajangersaaneq, ilinniarfissanik sivisussusiliineq aqutsinerlu. Tamakku saniatigut kultureqarnermi, timersornermi aamma ilageeqarnermi suliassat Naalakkersuisoqarfimmit isumagineqartarput.

Meeqqat atuarfiinut sulilu atualinngitsunut susassaqarfiit kommunit isumagisassaraat kiisalu Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmi suliassat nakkutilliinermut ineriartortitsinermullu kiisalu ingerlatat pitsaassusiannik ingerlalluarneqarnerannillu qularnaareqataanermut killilerneqarput.

Naalakkersuisoqarfimmi suliassaqarfinni Inatsisartunut Naalakkersuisunullu atugassanik kisitsisitigut uppernartunik paasissutissiorluarnissaq Naalakkersuisoqarfimmi qularnaarneqassaaq.

Naalakkersuisoqarfimmi ilinniartitaanermut tunngasuni EU-mut suleqatigiinnissamik isumaqatigiissut allaffissornikkut isumagineqarpoq taamatuttaaq Inatsisartunut taamatullu EU-mut nalunaaruteqartarneq.

Naalakkersuisoqarfimmi ilinniarnerni piareersarfiusuni, inuussutissarsiutitigut tunngaviusumik ilinniarnerni aamma ilinniarnerni sivikitsuni, akunnattumik sivisussusilinni ingerlaqqiffiusunilu ilinniartunut ilinniagaqarnersiutit tunniunneqartarneranni suliassat tamakkerlugit isumagisarai.