Oqaluttuatoqqani oqaluttuarineqarpoq, pinngortitap piginnaasai inuttulli anersaaqartut tarneqartullu – tassalu ”inua”. Pinngortitap Paarsisuisa qangarsuaaniilli nukitik pinngortitap oqimaaqatigiinnissaanut piujuartitsiviunissaanullu sorsuuteqarnerminni atorpaat. Annertunerusunik iliornissannut sapinngisannik eqqarsaatigisanniit annertunerusumik sapiissuseqalersippaatsit. Taakkua peqatigalugit pinngortitaq sorsuutigiuk:

Anorip Inua

Anori nunarsuarmi silap pissusaanut ilaavoq, pinngortitamut sunniisartoq. Anorip Inuata pinngortitaq ukiup ingerlanerani isumannaartarpaa aammalu nukissiamik pilersitsisarluni aammalu Pinngortitap Paarsisui allat ikiorsinnaallugit.

Erngup Inua

Imeq naasunik imaanilu uumasunik uumatitsisuuvoq. Erngup inuata imartatta, kuuit, tatsillu mingutsinneqannginnissaa sorsuutigaa.

Qaarsup Inua

Qaqqat qaarsullu inuuffigaagut aammalu isumalluutinik pingaarutilinnik taakkunaniittoqarpoq. Qaarsup Inuata inuuffitta paarilluarnissaat mingutsinneqannginnissaallu sorsuutigaa.

Pinngortitap Inua

Pinngortitap naggorinnera uumasunut inunnullu nerisassaqartitsivoq inuuniarnermullu tunngaviliilluni. Pinngortitap Inuata pinngortitamik paarsilluarnissaq mingutsinneqannginnissaallu sorsuutigai.

Innerup Inua

Inneq nukissiamik pilersitsisarpoq aammalu kiassaasarluni, kisianni aamma ikuallatsitsisinnaavoq aseruisinnaallunilu. Innerup Inuata inneq nakkutigaa aammalu ikuallattoornerit akiorniarnissaannut ikiorluta, taamaalilluni uumasut inuillu najortagai pingaarutillit ajoqusinnginniassammata.

Uumasut Inua

Uumasut nerisassaqartitsisarput aammalu uagutsinnut inunnut inuuniarnermut tunngavissaliillutik aamma pinngortitami nerisareqatigiinni ilaallutik. Uumasut Inuata uumasut najortagaasa mingutsinneqannginnissaat akornusersorneqannginnissaallu sorsuutigaa.

Kingunerutissat pillugit paasititsiniaaneq

Naalakkersuisoqarfiup 2020-mi paasititsiniaaneq aallartippaa, tassani kikkut tamarmik errorsinermut qaqorsaatinik avatangiisinut nalunaaqutsigaasunik atuisarnissaat aammalu kingunerutinik atuinnginnissaq kaammattuutigineqarluni.

Kalaallit Nunaanni imermik errortuivikoq, imaanut kuutsinneqannginnerani, akuutissat uumaatsut atorlugit salinneqartanngilaq. Taamaattumik ataasiakkaat errorsinermut qaqorsaatinik kingunerutinillu atuinermut tunngatillugu qanoq toqqaasarnersut, annertoorujussuarmik pingaaruteqarpoq.

Errorsinermut qaqorsaatit avatangiisinut nalunaaqqutsigaasut toqqarneqarneranni akuutissat uumaatsut arlallit, avatangiisinut peqqissutsimullu ajoqusiisinnaasut, pinngitsoorneqassapput. Kingunerutit iluaqutaasumik atorneqanngilluinnarsinnaapput.

Kingunerutissat pillugit paasititsiniaanermi ilaatigut assinik aalasulianik ilanngutassiisoqarpoq, 2020-mi aggustimi KNR TV-mi aallakaatinneqartunik.

Imeqarfiit killeqarfiinut paasititsiniaaneq

Tatsit kuuillu imermik imerneqarsinnaasumik aallertarfigut kaajallallugit illersuiffiusunik killeqarfiliisoqarpoq. Taakkua taasarpagut imeqarfinnut killeqarfiit. Imeqarfinnut killeqarfiit taakkua iluanni, erngup imerneqarsinnaasup mingutsinneqarnissaata aarlerinaateqarnera annikinnerulersinniarlugu, ingerlatassat arlallit inerteqqutigineqarput.

Imeqarfinnut killeqarfiit pillugit paasititsiniaanerup aallartinneqarnerani, maleruagassat suut imeqarfinnut killeqarfinni atuunnersut aammalu sooq maleruagassaqarnersoq, paasineqarnerulersinneqarnissaa kissaatigineqarpoq. Sumiiffiit suli atorsinnaassagivut, kisianni imerput imerneqarsinnaasoq minguitsoq mingutsinnagu, paasititsiniaaneq iluaqutaassaaq.

Paasititsiniaanermi filmiliaaqqat pingasuupput aammalu unammisitsisoqarluni, tassani imeqarfinnut killeqarfiit nunami qanoq pitsaanerusumik nalunaaqutsersinnaanerivut innuttaasut siunnersuuteqarsinnaallutik aammalu imeqarfinnut killeqarfinnut pitsaanerusumik taaguusiinissamut siunnersuuteqarsinnaallutik. Paasititsiniaaneq KNR-imi, mittarfinni, filmertarfinni aammalu Pinngortitap Paarsisuisa facebook-imi qupperneranni takutinneqarpoq.     

Imeqarfinnut killeqarfiit iluini soqqusaanersoq aamma soqqusaannginnersoq filmiliaq takuuk.

Sooq imeqarfinnut killeqarfiit inissisimaffii taamaannersut filmiliaq takuuk.